എട്ട് കോച്ചുകളുള്ള പുതിയ ഡല്‍ഹി-ഡെറാഡൂണ്‍ വന്ദേഭാരതിന്റെ ശരാശരി വേഗത 64 കിലോമീറ്റര്‍ ആണ്. ഗുവാഹത്തിക്കും ന്യൂ ജല്‍പായ്ഗുരിക്കുമിടയില്‍ എട്ട് കോച്ചുകളുള്ള മറ്റൊരു വന്ദേഭാരത് ഫ്ലാഗ് ഓഫ് ചെയ്യാനും ഇരിക്കുകയാണ്. ഇക്കഴിഞ്ഞ ഏപ്രിലില്‍ രാജ്യസഭയില്‍ പോലും വന്ദേഭാരതിന്റെ വേഗത ചര്‍ച്ചയായി. കേരളത്തിലൂടെ 130 കിലോമീറ്റര്‍ വേഗതയില്‍ വന്ദേഭാരത് ചീറിപ്പായുമെന്നും, കെ റെയില്‍ നാലര മണിക്കൂര്‍ കൊണ്ടാണ് തിരുവനന്തപുരം മുതല്‍ കാസര്‍കോഡ് വരെ സഞ്ചരിക്കുന്നതെങ്കില്‍ വന്ദേഭാരതിന് അരമണിക്കൂര്‍ കുറവ് മതി അത്ര ദൂരം സഞ്ചരിക്കാനെന്നുമെല്ലാം കേന്ദ്രമന്ത്രി വി. മുരളീധരന്‍ നടത്തിയ പ്രസ്താവനകള്‍ ആണ് സി.പി.ഐ.എം എം.പി. ജോണ്‍ ബ്രിട്ടാസ് സഭയില്‍ ചര്‍ച്ചാ വിഷയമാക്കിയത്. ഒന്നിന് 97 കോടി രൂപ മുടക്കിയാണ് രാജ്യത്തെ തന്നെ ഏറ്റവും വേഗമേറിയ ഈ ട്രെയിന്‍ നിര്‍മിച്ചിരിക്കുന്നത് തന്നെ. അതാണ് കുറഞ്ഞ വേഗതയിൽ ഓടിക്കൊണ്ടിരിക്കുന്നത്. റെയില്‍പാതകളിലെ വളവും വില്ലനാണ്.
ട്രെയിന്‍ മാത്രം പോര, വളവില്ലാത്ത ട്രാക്കും വേണം
54.6 സെക്കന്‍ഡില്‍ 100 കിലോമീറ്ററും 145 സെക്കന്‍ഡിനുള്ളില്‍ പരമാവധി വേഗതയും കൈവരിക്കാന്‍ ശേഷിയുള്ളവയാണ് ട്രെയിന്‍ 18 എന്ന് കൂടി അറിയപ്പെടുന്ന വന്ദേഭാരത് ട്രെയിനുകള്‍. കേരളത്തില്‍ തന്നെ വേഗതയേറിയ ട്രെയിന്‍ ജനശതാബ്ദിയാണ്. 3.17 മണിക്കൂറില്‍ തിരുവനന്തപുരത്തുനിന്ന് ആലപ്പുഴ വഴി എറണാകുളത്തെത്തുന്ന ഈ ട്രെയിന്‍ കോട്ടയം വഴി 4.10 മണിക്കൂറില്‍ എറണാകുളത്തെത്തുന്നു. 77 കിലോമീറ്ററാണ് ഇതിന്റെ വേഗത. വന്ദേഭാരത് ഈ ദൂരം 90കിലോമീറ്റര്‍ വേഗതയില്‍ മറികടക്കുമെന്നായിരുന്നു വാഗ്ദാനം.
ആ 90 കിലോമീറ്റര്‍ വേഗതയാണ് ഇപ്പോള്‍ 83ലേക്ക് എത്തിയത്. ടിക്കറ്റ് നിരക്കും വേഗതയും പരിഗണിക്കുമ്പോള്‍ എന്തുകൊണ്ടും സാധാരണ യാത്രക്കാര്‍ക്ക് അനുയോജ്യം ജനശതാബ്ധി തന്നെയാണ്. ദേശീയതലത്തില്‍ ന്യൂഡല്‍ഹി-വാരണാസി വന്ദേ ഭാരത് എക്‌സ്പ്രസ് ആണ് ഏറ്റവും വേഗതയില്‍ ഓടുന്ന ട്രെയിന്‍. മണിക്കൂറില്‍ 95 കിലോമീറ്റര്‍ വേഗത.
94 കിലോമീറ്റര്‍ വേഗതയിലാണ് റാണി കമലാപതി -ഹസ്രത്ത് നിസാമുദ്ദീന്‍ വന്ദേ ഭാരത് എക്‌സ്പ്രസ് സര്‍വീസ് നടത്തുന്നത്. വന്ദേഭാരത് ട്രെയിനിന്റെ പ്രശ്‌നമല്ല ഈ വേഗത കുറവിന് കാരണം. ട്രാക്കുകളുടെ മോശം അവസ്ഥയാണ് ഇതിന്റെ പ്രധാന കാരണങ്ങളിലൊന്ന്. കാസര്‍കോട് മുതല്‍ തിരുവനന്തപുരം വരെയുള്ള 560 കിലോമീറ്ററില്‍ 620 വളവുകളുണ്ടെന്നാണ് പറയപ്പെടുന്നത്. 200 കൊടും വളവുകളുമുണ്ട്. ഇത് നിവര്‍ത്താനുള്ള പഠനങ്ങള്‍ ഇപ്പോഴും തുടരുകയാണ്. വളവ് നിവർത്തൽ പ്രക്രിയ പൂർത്തിയാകണമെങ്കിൽ പതിറ്റാണ്ടിലധികം കാലമെടുക്കുമെന്നാണ് റിപ്പോര്‍ട്ടുകൾ. കെ റെയിലിനായി സ്ഥലമേറ്റടുപ്പ് നടത്താന്‍ ശ്രമിച്ചപ്പോള്‍ എതിര്‍ത്തവര്‍ പറഞ്ഞ ന്യായം നിലവിലെ ട്രാക്കിലൂടെ അതിവേഗതയില്‍ വന്ദേഭാരത് പായുമെങ്കില്‍ കെ റെയില്‍ എന്തിന്, പുതിയ ട്രാക്ക് എന്തിന് എന്നൊക്കെയായിരുന്നു അതില്‍ച്ചിലത്. അക്കൂട്ടര്‍ക്ക് വന്ദേഭാരത് ട്രെയിനിന്റെ വേഗത കുറവിന്റെ കാരണം വ്യക്തമായി അറിയുന്നുണ്ടാവുമെന്ന് കരുതാം.
