ബലി പെരുന്നാള്‍ ആഘോഷം; ആരോഗ്യ ജാഗ്രതാ മുന്നറിയിപ്പുമായി യുഎഇ

അബുദാബി: ബലി പെരുന്നാള്‍ അവധിക്ക് ആഘോഷങ്ങള്‍ അതിരുകടക്കരുതെന്ന് യുഎഇ അധികൃതര്‍ വ്യക്തമാക്കി. വീട്ടിലായിരിക്കുമ്പോഴും പുറത്തിറങ്ങുമ്പോഴും കൊവിഡ് പെരുമാറ്റച്ചട്ടങ്ങള്‍ കൃത്യമായി പാലിച്ചുകൊണ്ടായിരിക്കണമന്ന് അധികൃതര്‍ ഓര്‍മപ്പെടുത്തി. പെരുന്നാള്‍ അവധിക്ക് ശേഷം കൊവിഡ് കേസുകളും മരണവും വര്‍ധിക്കാനുള്ള സാധ്യത മുന്നില്‍ക്കണ്ടാണ് അതീവ ജാഗ്രതാ നിര്‍ദ്ദേശം നല്‍കിയിരിക്കുന്നത്. കഴിഞ്ഞ പെരുന്നാള്‍, പുതുവര്‍ഷ അവധിക്കാലത്തെ കണക്കുകളുടെ അടിസ്ഥാനത്തിലാണ് ഈ മുന്നറിയിപ്പ്.



കഴിഞ്ഞവര്‍ഷം ബലിപെരുന്നാള്‍ അവധിക്കാലത്ത് യുഎഇയില്‍ പ്രതിദിന കൊവിഡ് കേസുകള്‍ അഞ്ചിരട്ടിയായി വര്‍ധിച്ചതതായി യുഎഇ ആരോഗ്യവിഭാഗം ഔദ്യോഗിക വാക്താവ് ഡോ. ഫരീദ അല്‍ ഹുസ്‌നി അറിയിച്ചു. പുതുവല്‍സര അവധിക്കാലത്താവട്ടെ കേസുകള്‍ രണ്ടിരട്ടിയായി കൂടി. മരണനിരക്ക് മൂന്നിരട്ടിയായാണ് വര്‍ധിച്ചത്. കഴിഞ്ഞ ചെറിയ പെരുന്നാള്‍ ആഘോഷ വേളയില്‍ പ്രതിദിന കൊവിഡ് കേസുകള്‍ 60 ശതമാനവും മരണം ഇരട്ടിയായും വര്‍ധിച്ചതായും അവര്‍ പറഞ്ഞു. ഈ മുന്‍ അനുഭവങ്ങള്‍ മുന്‍നിര്‍ത്തിയാണ് ബലി പെരുന്നാള്‍ അവധി ദിനത്തില്‍ കനത്ത ജാഗ്രത പാലിക്കണമെന്ന് നിര്‍ദ്ദേശം നല്‍കിയിരിക്കുന്നത്. കൊവിഡ് പെരുമാറ്റച്ചട്ടം ലംഘിക്കുന്നവര്‍ക്കെതിരേ കര്‍ശനമായ നടപടികള്‍ സ്വീകരിക്കുമെന്നും അധികൃതര്‍ മുന്നറിയിപ്പ് നല്‍കി.

Also Read: അജ്മാനില്‍ നാലു മണിക്കൂര്‍ ബസ്സിനകത്ത് കുടുങ്ങിയ ബാലന്‍ ശ്വാസം മുട്ടി മരിച്ചു; മൂന്നു പേര്‍ അറസ്റ്റില്‍

അതിനിടെ, യുഎഇയില്‍ ബലിപെരുന്നാള്‍ ദിവസം ഈദ് ഗാഹുകള്‍ക്ക് നിബന്ധനകള്‍ക്കു വിധേയമായി അനുമതി നല്‍കി. കൊവിഡ് നിയന്ത്രണങ്ങളോടെ ബലി പെരുന്നാളിന് പള്ളികളിലും ഈദ് മുസല്ലകളിലും ഈദുല്‍ അദ്ഹ പ്രാര്‍ഥന നടക്കും. ചെറിയ പെരുന്നാളിന് നല്‍കിയ അനുമതിയുടെ അതേ മാതൃകയിലാണ് ബലി പെരുന്നാളിനും അനുമതി നല്‍കിയിരിക്കുന്നത്. നമസ്‌കാരം തുടങ്ങുന്നതിന് 15 മിനിറ്റ് മുമ്പ് മാത്രമേ വിശ്വാസികള്‍ പ്രാര്‍ഥനാ വേദിയിലേക്ക് പ്രവേശിക്കാവൂ. നമസ്‌കാരവും ഖുതുബയും 15 മിനിറ്റില്‍ കൂടരുത്. പ്രാര്‍ഥന പൂര്‍ത്തിയായാല്‍ ഉടന്‍ പള്ളികളും ഈദ്ഗാഹും അടക്കും. ഹസ്തദാനം ആലിംഗനം ചുംബനം തുടങ്ങി പരസ്പരം സമ്പര്‍ക്കമുണ്ടാവുന്ന കാര്യങ്ങള്‍ ചെയ്യരുത്. മാസ്‌ക് ധാരണവും സാമൂഹിക അകലം തുടങ്ങിയ കൃത്യമായി പാലിക്കണമെന്നും നിര്‍ദ്ദേശമുണ്ട്.