അജ്മാനില്‍ നാലു മണിക്കൂര്‍ ബസ്സിനകത്ത് കുടുങ്ങിയ ബാലന്‍ ശ്വാസം മുട്ടി മരിച്ചു; മൂന്നു പേര്‍ അറസ്റ്റില്‍

ദുബായ്: യാത്രയ്ക്കിടെ ഉറങ്ങിപ്പോയ കുട്ടിയെ പുറത്തിറക്കാതെ മിനി ബസ്സില്‍ അടച്ചതിനെ തുടര്‍ന്ന് ശ്വാസംമുട്ടി മരിച്ചു. അജ്മാനിലാണ് ദാരുണമായ സംഭവം. മൂന്നര വയസുള്ള കുട്ടിയാണ് ടാലന്റ് ഡെവലപ്മെന്റ് കേന്ദ്രത്തിലേക്ക് പരിശീലന പരിപാടിയില്‍ പങ്കെടുക്കാനുള്ള യാത്രാ മധ്യേ പരിശീലന കേന്ദ്രത്തിന്റെ ഉടമസ്ഥതയിലുള്ള മിനി ബസ്സില്‍ ഉറങ്ങിപ്പോയത്. മറ്റു കുട്ടികളൊക്കെ ഇറങ്ങിപ്പോയെങ്കിലും ഉണരാതിരുന്ന കുട്ടിയെ അകത്താക്കി ബസ്സ് അടച്ചിടുകയായിരുന്നു.

നാലു മണിക്കൂറിന് ശേഷമാണ് കുട്ടിയെ അവശനിലയില്‍ കണ്ടെത്തിയത്. ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. അറബ് വംശജരായ പ്രവാസി കുടുംബത്തിലെ കുട്ടിയാണ് കൊടും ചൂടില്‍ ബസ്സിനകത്ത് ശ്വാസം കിട്ടാതെ മരണപ്പെട്ടത്. രാവിലെ പരിശീലന കേന്ദ്രത്തിലേക്ക് വരുന്ന വഴിയില്‍ ബസ്സില്‍ ഉറങ്ങിപ്പോയ കുട്ടിയെ പുറത്തിറക്കാതെ ജീവനക്കാരന്‍ ബസ്സ് അടച്ചിട്ട് പുറത്തുപോവുകയായിരുന്നു. പിന്നീട് ഉച്ച ഭക്ഷണ സമയത്താണ് കുട്ടിയെ കാണാനില്ലെന്ന വിവരം പരിശീലന കേന്ദ്രം നടത്തിപ്പുകാര്‍ അറിയുന്നത്. ഉച്ചഭക്ഷണ വേളയില്‍ ലഞ്ച് ബോക്‌സ് ഉള്‍പ്പെടെയുള്ള ഒരു ബാഗ് ആളില്ലാതെ കിടക്കുന്നത് കണ്ട പ്രോഗ്രാം സൂപ്പര്‍വൈസര്‍ നടത്തിയ അന്വേഷണത്തെ തുടര്‍ന്നായിരുന്നു ഇത്. കുട്ടിയുടെ ബാഗ് ബസ്സില്‍ നിന്ന് അറ്റന്‍ഡര്‍ പരിശീലന കേന്ദ്രത്തിലേക്ക് കൊണ്ടുവന്നിരുന്നു. എന്നാല്‍ കുട്ടി ബസ്സില്‍ ഉറങ്ങിക്കിടന്ന കാര്യം ശ്രദ്ധിച്ചിരുന്നില്ല.

Also Read: ഖത്തര്‍ പ്രവാസികളുടെ കണക്കെടുപ്പുമായി ഇന്ത്യന്‍ എംബസി; എന്തിനെന്നറിയാതെ പ്രവാസികള്‍

ഉറക്കമുണര്‍ന്ന കുട്ടി പുറത്തുകടക്കാന്‍ ശ്രമം നടത്തിയിട്ടുണ്ടാവാമെങ്കിലും പൂര്‍ണമായും അടച്ചിട്ട ബസ്സില്‍ നിന്ന് കുട്ടിയുടെ ശബ്ദം പുറത്തുകേട്ടിരിക്കാന്‍ ഇടയില്ലെന്ന് പോലിസ് അറിയിച്ചു. ശക്തമായ ചൂടില്‍ ശ്വാസം കിട്ടാതെയാണ് കുട്ടി മരണപ്പെട്ടതാണെന്നാണ് പ്രാഥമിക നിഗമനം. അവശനിലയില്‍ കണ്ടെത്തിയ കുട്ടിയെ ഉടന്‍ തന്നെ അജ്മാനിലെ ആമിന ആശുപത്രിയില്‍ പ്രവേശിപ്പിച്ച് പ്രാഥമിക ചികില്‍സ നല്‍കിയെങ്കിലും ഫലമുണ്ടായില്ലെന്ന് അജ്മാന്‍ പൊലീസ് ഓപറേഷന്‍സ് ഡയറക്ടര്‍ ജനറല്‍ ബ്രിഗേഡിയര്‍ അബ്ദുല്ല സെയ്ഫ് അല്‍ മത്രൂഷി പറഞ്ഞു. ബസ് സൂപ്പര്‍വൈസറുടെ ജാഗ്രതക്കുറവാണ് ദുരന്തത്തിന് കാരണമായതെന്നാണ് പ്രാഥമിക വിലയിരുത്തല്‍.

പിന്നീട് പോലിസ് നടത്തിയ അന്വേഷണത്തില്‍ ടാലന്റ് ഡവലപ്മെന്റ് കേന്ദ്രം അനധികൃതമായാണ് പ്രവര്‍ത്തിക്കുന്നതെന്ന് കണ്ടെത്തിയതായും പോലിസ് പറഞ്ഞു. കേന്ദ്രത്തിന്റെ കൊമേഴ്സ്യല്‍ ലൈസന്‍സ് ഒരു വര്‍ഷം മുന്‍പ് കാലാവധി കഴിഞ്ഞിരുന്നു. എന്നുമാത്രമല്ല, ലൈസന്‍സ് പ്രകാരം അനുവാദമുള്ള പ്രവര്‍ത്തനങ്ങളല്ല അവിടെ നടക്കുന്നതെന്നും പോലിസ് കണ്ടെത്തി.

സംഭവത്തെ തുടര്‍ന്ന് പരിശീലന കേന്ദ്രത്തിന്റെ മാനേജര്‍, ബസ് ഡ്രൈവര്‍, അറ്റന്‍ഡര്‍ എന്നിവരെ പോലിസ് അറസ്റ്റ് ചെയ്തു. ശക്തമായ ചൂട് കാലാവസ്ഥ നിലനില്‍ക്കുന്ന സാഹചര്യത്തില്‍ ഒരു കാരണവശാലും കുട്ടികളെ വാഹനത്തില്‍ ഇരുത്തി പോവരുതെന്ന് പോലിസ് പലവട്ടം മുന്നറിയിപ്പ് നല്‍കിയിരുന്നുവെങ്കിലും ഇത്തരം സംഭവങ്ങള്‍ തുടരുകയാണ്. കുറ്റക്കാര്‍ക്കെതിരേ ശക്തമായ നടപടികള്‍ കൈക്കൊള്ളുമെന്നും പോലിസ് അറിയിച്ചു.