മുഖത്തുണ്ടാകുന്ന കറുത്ത പാടുകള്‍ പലരേയും അലട്ടുന്ന പ്രശ്‌നമാണ്. ഇതിന് കാരണങ്ങള്‍ പലതുണ്ടാകാം. പ്രായമേറുന്നത്, മുഖത്തെ കെമിക്കല്‍ പ്രയോഗം, അമിതമായി വെയില്‍ ഏല്‍ക്കുന്നത് തുടങ്ങി ഇതിന് കാരണങ്ങള്‍ പലതാണ്. ഇത്തരം പ്രശ്‌നങ്ങള്‍ക്ക് പരിഹാരമായി ചെയ്യാവുന്ന വീട്ടുവൈദ്യങ്ങള്‍ പലതാണ്. യാതൊരു ദോഷവുമില്ലാതെ തന്നെ മുഖത്ത് പ്രയോഗിയ്ക്കാവുന്ന ഇത്തരം കൂട്ടുകളില്‍ അടുക്കളയിലെ ചേരുവകള്‍ തന്നെയാണ് പ്രധാനമായും ഉപയോഗിയ്ക്കുന്നത്. ആരോഗ്യ കാര്യത്തിന് ഏറെ ഗുണം നല്‍കുന്ന ഗ്രീന്‍ ടീ കൊണ്ട് മുഖത്തെ കരുവാളിപ്പിന് ചേരുന്ന ചില പായ്ക്കുകള്‍ തയ്യാറാക്കാം.

തേൻ

കോശങ്ങളുടെ പുനരുജ്ജീവനം ശക്തമായ ആന്റിഓക്‌സിഡന്റുകളെ കൊണ്ടേ സാധിക്കുകയുള്ളൂ. ഇവിടെയാണ് ഗ്രീൻ ടീ നിങ്ങളുടെ സഹായത്തിന് എത്തുന്നത്. ആന്റിഓക്‌സിഡന്റുകൾ ശരീരത്തിൽ എത്ര കൂടുന്നുവോ, അത്രയും കുറവായിരിക്കും നിങ്ങൾക്ക് ചർമ്മ സംബന്ധമായ പ്രശ്‌നങ്ങളും അസുഖങ്ങളും. ഒരു ടീസ്പൂൺ ഓറഞ്ച് തൊലി പൊടിച്ചത്, അര ടീസ്പൂൺ തേൻ ഒരു ടീസ്പൂണ്‍ ഗ്രീൻ ടീ, എന്നിവ യോജിപ്പിച്ച് കുഴമ്പ് പരുവത്തിലുള്ള മിശ്രിതമാക്കുക. ശേഷം ഈ മിശ്രിതം മുഖത്ത് പുരട്ടി മസാജ് ചെയ്യുക. 20 മിനിറ്റിന് ശേഷം കഴുകിക്കളയുക.

​നാരങ്ങ

നാരങ്ങ നിങ്ങളുടെ ചർമ്മവും മുടിയും സംരക്ഷിക്കുവാനും ഒരു ഉത്തമ ഘടകമാണ്. പ്രകൃതിദത്തമായ ആൻറി ബാക്ടീരിയൽ ഘടകമാണ് നാരങ്ങകൾ. വിറ്റാമിൻ സി ഒരു നല്ല ആന്റിഓക്‌സിഡന്റായി പ്രവർത്തിക്കുന്നു, ഇത് കൊളാജന്റെ ഉത്പാദനം വർദ്ധിപ്പിക്കും. അങ്ങനെ ചർമ്മത്തെ മൃദുവും തിളക്കവുമുള്ളതാക്കുന്നു. ചർമ്മത്തിൽ പ്രായമാകുന്നത് മൂലം ഉണ്ടാകുന്ന പാടുകൾ, കറുത്ത പാടുകൾ, കരുവാളിപ്പ് എന്നിവ നാരങ്ങ കുറയ്ക്കുന്നുവെന്നതും മറ്റൊരു പ്രയോജനമാണ്.ഒരു ടീസ്പൂൺ ഗ്രീൻ ടീയിലേയ്ക്ക് നാരങ്ങാ നീര് ചേർക്കുക. നന്നായി യോജിപ്പിച്ച ശേഷം ഈ മിശ്രിതം മുഖത്ത് പുരട്ടുക. 15 മിനിറ്റിന് ശേഷം കഴുകിക്കളയുക.

തൈര്

ആരോഗ്യ സംരക്ഷണത്തില്‍ മാത്രമല്ല, സൗന്ദര്യ സംകക്ഷണത്തിലും മികച്ചതാണ് തൈര്. ചര്‍മത്തിന് ഈര്‍പ്പം നല്‍കുന്ന, ചര്‍മത്തിലെ ചുളിവുകള്‍ അകറ്റുന്ന, പ്രോട്ടീന്‍ ഗുണം നല്‍കുന്ന ഒന്നാണിത്. . ലാക്ടിക് ആസിഡ് അടങ്ങിയ ഇത് നല്ലൊരു ബ്ലീച്ചിംഗ് ഇഫക്ടാണ് നല്‍കുന്നത്.തൈരിൽ സമ്പുഷ്ടമായി അടങ്ങിയിരിക്കുന്ന കൊഴുപ്പ് ചർമ്മത്തിലെ ഈർപ്പം നിലനിർത്തുവാൻ സഹായിക്കും, ഇത് വളരെനേരം ചർമ്മത്തിൽ ജലാംശം നിലനിർത്തുന്നു. ചർമ്മത്തിലെ കരുവാളിപ്പ്, മങ്ങൽ, നിറവ്യത്യാസം എന്നിവ പരിഹരിക്കാനും ഇത് സഹായിക്കുന്നു. തൈരും തേനും ഒരു ടീസ്പൂണ്‍ ഗ്രീൻ ടീ പൊടിച്ചതും ചേര്‍ത്ത് മിശ്രിതമാക്കുക. ശേഷം ഈ മിശ്രിതം മുഖത്ത് പുരട്ടുന്നതും ചര്‍മ്മം തിളങ്ങാന്‍ സഹായിക്കും.

മഞ്ഞള്‍

സൗന്ദര്യം വര്‍ദ്ധിപ്പിയ്ക്കാന്‍ മാത്രമല്ല, പല സൗന്ദര്യ, ചര്‍മപ്രശ്‌നങ്ങള്‍ക്കുമുള്ള നല്ലൊരു മരുന്നു കൂടിയാണ് മഞ്ഞള്‍. ഇതിന് ആന്റിഫംഗല്‍, ആന്റിബാക്ടീരിയല്‍ ഗുണങ്ങളുണ്ട്.രണ്ട് ടീസ്പൂണ്‍ ഗ്രീൻ ടീ പൊടിച്ചതിലേയ്ക്ക് രണ്ട് നുള്ള് മഞ്ഞൾ ചേർക്കുക. അതിലേക്ക് രണ്ട് ടീസ്പൂൺ കടലപ്പൊടി കൂടി ചേർക്കാം. ശേഷം കുറച്ച് വെള്ളം ചേർത്ത് മിശ്രിതമാക്കുക. ഈ മിശ്രിതം മുഖത്ത് തേച്ചുപിടിപ്പിക്കുക. 30 മിനിറ്റിന് ശേഷം കഴുകി കളയാം. ആഴ്ചയിൽ ഒന്നോ രണ്ടോ തവണ ഇത് ചെയ്യാം.