‘ഭിന്നിച്ച് ഭരിക്കാമെന്നത് ചിലരുടെ മോഹം മാത്രം’: കൊങ്കുനാട് വിവാദത്തിൽ പ്രതികരിച്ച് കമൽഹാസൻ

ചെന്നൈ: തമിഴ്നാടിനെ വിഭജിച്ച് രണ്ട് സംസ്ഥാനമാക്കാൻ കേന്ദ്ര സർക്കാർ നീക്കം നടത്തുന്നുവെന്ന പ്രചാരണത്തിൽ പ്രതികരണവുമായി മക്കൾ നീതി മയ്യം നേതാവും നടനുമായ കമൽഹാസൻ രംഗത്ത്. തമിഴ്നാടിനെ ഭിന്നിച്ച് ഭരിക്കാമെന്ന ചിലരുടെ മോഹം മാത്രമാണ്. ഇത്തരം നീക്കങ്ങളൊന്നും സംസ്ഥാനത്ത് നടക്കില്ല. ഏത് തരത്തിലുള്ള നീക്കത്തെയും തമിഴ് ജനത ഒറ്റക്കെട്ടായി നേരിടുമെന്നും അദ്ദേഹം പറഞ്ഞു.



കൊങ്കുനാട്: ഡിഎംകെ പേടിക്കുന്നത് എന്തിനെന്ന് ബിജെപി; തമിഴ്നാട് വിഭജനത്തിനെതിരെ കോൺഗ്രസും

തമിഴ്നാടിൻ്റെ പടിഞ്ഞാറൻ മേഖലയെ വിഭജിക്കാനാണ് നീക്കം നടക്കുന്നത്. തമിഴ്നാടിൻ്റെ ഭൂപടം ഇപ്പോൾ ഉള്ളത് പോലെ തന്നെ ഇന്ത്യയുടെ ഭൂപടത്തിൽ തമിഴ്നാട് ഉണ്ടാകുമെന്നും കൽഹാസൻ പറഞ്ഞു. തമിഴ്നാടിൻ്റെ പടിഞ്ഞാറൻ മേഖലയായ കൊങ്കുനാട് എന്നറിയപ്പെടുന്ന പ്രദേശത്തെ കേന്ദ്രഭരണ പ്രദേശമാക്കാൻ നീക്കം നടക്കുന്നുവെന്ന റിപ്പോർട്ട് പുറത്തു വന്നതിന് പിന്നാലെ സമൂഹമാധ്യമങ്ങളിൽ ക്യാമ്പയ്ൻ ശക്തമാണ്.

തമിഴ്നാടിനെ വിഭജിക്കുമെന്ന വാർത്ത പുറത്തുവന്നതിന് പിന്നാലെ വിവാദം ശക്തമാണ്. എഐഎഡിഎംകെയുടെ പിന്തുണയോടെ ബിജെപിയാണ് ഈ നീക്കത്തിന് പിന്നിലെന്നാണ് റിപ്പോർട്ട്. തമിഴ്നാട് വിഭജിക്കാൻ ആരെക്കൊണ്ടും സാധിക്കില്ലെന്നും ഇക്കാര്യം ആരും ആവശ്യപ്പെട്ടിട്ടില്ലെന്നും ഡിഎംകെ നേതാവ് കനിമൊഴി വ്യക്തമാക്കിയിരുന്നു. നീക്കത്തിനെതിരെ കോൺഗ്രസും ഇടത് പാർട്ടികളും രംഗത്തുവന്നിരുന്നു.

കൊങ്കുനാട് കേന്ദ്രഭരണ പ്രദേശമാകുമോ? തമിഴ്നാടിനെ വിഭജിക്കാൻ കേന്ദ്ര നീക്കമെന്ന് റിപ്പോർട്ട്

കോയമ്പത്തൂർ ഉൾപ്പെടെയുള്ള തമിഴ്നാടിൻ്റെ നിർണായക ജില്ലകൾ ഉൾപ്പെടുന്നതാണ് കൊങ്കുനാട് പ്രദേശം. പത്ത് ലോക്സഭാ മണ്ഡലങ്ങളും 61 നിയമസഭാ മണ്ഡലങ്ങളും ഉൾപ്പെടുന്ന കൊങ്കുനാട് പ്രദേശത്ത് കോയമ്പത്തൂർ, തിരുപ്പൂർ, ഈറോഡ്, നാമക്കൽ, സേലം, ധർമപുരി, നീലഗിരി, കരൂർ, കൃഷ്ണഗിരി എന്നീ ജില്ലകളും ഉൾപ്പെടുന്നുണ്ട്. സമീപ പ്രദേശങ്ങളിൽ ചില മണ്ഡലങ്ങൾ കൂടി ഉൾപ്പെടുത്തി 90 നിയമസഭാ മണ്ഡലങ്ങളുള്ള കേന്ദ്രഭരണ പ്രദേശമാക്കാനാണ് നീക്കം നടക്കുന്നതെന്നാണ് തമിഴ് പത്രം റിപ്പോർട്ട് ചെയ്യുന്നത്.