ഇതിനകം ഇന്ത്യയില്‍ നിന്നും അരലക്ഷത്തിലേറെ ഹജ്ജ് തീര്‍ഥാടകര്‍ മക്കയിലും മദീനയിലുമായി എത്തിയതായാണ് കണക്കുകള്‍. കേന്ദ്ര ഹജ്ജ് കമ്മിറ്റി വഴിയുള്ള 54643 ഹാജിമാരാണ് 185 വിമാനങ്ങളിലായി ഇതുവരെ പുണ്യ ഭൂമിയില്‍ എത്തിയത്. ഇതില്‍ 34,815 ഹാജിമാര്‍ മക്കയിലാണ്. 21826 ഹാജിമാര്‍ മദീന സന്ദര്‍ശനത്തിലുമാണ്. 2435 ഹാജിമാരാണ് കേരളത്തില്‍ നിന്നും ഇതുവരെ എത്തിയത്. മഹറം അഥവാ രക്തബന്ധുക്കളായ പുരുഷന്മാരുടെ സഹായമില്ലാതെ ഒറ്റക്ക് ഹജ്ജ് ചെയ്യാനെത്തുന്ന വനിതാ ഹാജിമാരുടെ ആദ്യസംഘം ഇന്നലെ മക്കയിലെത്തി. രാത്രിയോടെയാണ് ഇവര്‍ ജിദ്ദ ഹജ്ജ് ടെര്‍മിനലില്‍ ഇറങ്ങിയത്.
ബാലയ്യയ്ക്കൊപ്പമെത്തി മോഹൻലാലും തെലുങ്കിൽ കൈയ്യടി നേടി ദിലീപും | Cameo Roles
Also Read: വിഐഎം വിഎക്‌സ് 50; സ്വന്തം ഇലക്ട്രിക് വാഹന ബ്രാന്‍ഡ് പുറത്തിറക്കി ഖത്തര്‍
മഹ്‌റമുകളില്ലാതെ ഹജ്ജിനെത്തുന്ന ആദ്യ സംഘവുമായി യാത്ര തിരിക്കുന്ന വിമാനം ഇന്നലെ കരിപ്പൂര്‍ എയര്‍പോര്‍ട്ടില്‍ കേന്ദ്ര ന്യൂനപക്ഷ വകുപ്പ് സഹമന്ത്രി ജോണ്‍ ബര്‍ല ഫ്‌ളാഗ് ഓഫ് ചെയ്തു. വിമാനത്തിലെ നൂറ്റിനാല്പത്തിയഞ്ച് ഹജ്ജ് തീര്‍ത്ഥാടകരെ കൂടാതെ, പൈലറ്റ്, കോ പൈലറ്റ്, ക്യാബിന്‍ ക്രൂ ഉള്‍പ്പെടെ വിമാനത്തിലെ ജീവനക്കാര്‍ മുഴുവന്‍ വനിതകളായിരുന്നു. തീര്‍ത്ഥാടകരെ സ്വീകരിച്ചതും വിമാനത്തിന്റെ ഗ്രൗണ്ട് ഹാന്‍ഡ്‌ലിംഗ് ജോലികള്‍ ചെയ്തതും വനിതാ ജീവനക്കാരായിരുന്നു. ഇന്നലെ വൈകീട്ട് ആറ് നാല്പത്തിയഞ്ചിനാണ് വിമാനം പറന്നുയര്‍ന്നത്. ഏറ്റവും പ്രായം കൂടിയ തീര്‍ഥാടകയായ എഴുപത്തിയാറ് വയസ്സുള്ള കോഴിക്കോട് സ്വദേശി സുലൈഖയ്ക്ക് കേന്ദ്ര സഹമന്ത്രി ബോര്‍ഡിംഗ് പാസ് നല്‍കി.
ലേഡീസ് വിത്തൗട്ട് മഹ്‌റം വിഭാഗത്തില്‍ ഇന്ത്യയില്‍ നിന്ന് 4000 തീര്‍ത്ഥാടകരാണ് രജിസ്റ്റര്‍ ചെയ്തിരിക്കുന്നത്. ഇവരില്‍ 2700 ഓളം പേര്‍ കേരളത്തില്‍ നിന്നാണ് എത്തുന്നത്. സംസ്ഥാനത്തു നിന്ന് ആകെ 16 വിമാനങ്ങളാണ് വനിതാ തീര്‍ഥാടകര്‍ മാത്രമായി ഹജ്ജ് സര്‍വീസ് നടത്തുക. കരിപ്പൂരില്‍നിന്ന് 12, കണ്ണൂരില്‍ നിന്ന് 3, കൊച്ചിയില്‍ നിന്ന് ഒരു വിമാനവുമാണ് വനിതകള്‍ക്കു മാത്രമായി ഒരുക്കിയിരിക്കുന്നത്. പുരുഷന്മാരുടെ കൂടെയല്ലാതെ വരുന്ന ഇവര്‍ക്ക് പ്രത്യേക സൗകര്യങ്ങള്‍ മക്കയില്‍ അധികൃതര്‍ ഒരുക്കിയിട്ടുണ്ട്. ഇവര്‍ക്ക് ആവശ്യമായ സൗകര്യങ്ങള്‍ ഒരുക്കുകയും സഹായങ്ങള്‍ നല്‍കുകയും ചെയ്യുന്നതിനായി പ്രത്യേക വനിത വളണ്ടിയര്‍മാരും ഇന്ത്യയില്‍ നിന്ന് ഡെപ്യൂട്ടേഷനില്‍ ഹജ്ജിനെത്തുന്നുണ്ട്.
അതിനിടെ, ഹജ്ജ് തീര്‍ഥാടന ദിനങ്ങള്‍ പടിവാതിലില്‍ എത്തിനില്‍ക്കെ ലോകമെമ്പാടുമുള്ള തീര്‍ഥാടകരെ സ്വീകരിക്കാന്‍ സൗദി അറേബ്യയിലെ പുണ്യസ്ഥലങ്ങള്‍ ഒരുങ്ങിക്കഴിഞ്ഞു. തീര്‍ഥാടകര്‍ക്ക് സൗകര്യമൊരുക്കുന്നതിനായി പുതിയ ക്യാമ്പുകള്‍ തയ്യാറാക്കി ആവശ്യമായ എല്ലാ സൗകര്യങ്ങളും സജ്ജീകരിച്ചിട്ടുണ്ട്. മുന്‍നിര ക്യാമ്പുകള്‍ ആന്റി ഫയര്‍, ലൈറ്റ് പ്രൂഫ് ഫീച്ചറുകളോട് കൂടിയതാണ്. ഉയര്‍ന്ന നിലവാരമുള്ള സുരക്ഷാ ഉപകരണങ്ങള്‍ ഇവിടെ സജ്ജീകരിച്ചിട്ടുണ്ട്. ഓരോ ടെന്റിനും സ്വന്തമായ ശീതീകരണ സംവിധാനവും സഹായ സേവനങ്ങളും ഉണ്ട്.
കോവിഡ് പകര്‍ച്ചവ്യാധിക്ക് മുമ്പുള്ള നിലയിലേക്ക് തീര്‍ഥാടനം മടങ്ങുന്ന ഈ വര്‍ഷം തീര്‍ത്ഥാടകര്‍ക്ക് മികച്ച ആരോഗ്യ പരിരക്ഷയും ഭക്ഷണ സേവനങ്ങളും ഉറപ്പുവരുത്തുന്നതിനുള്ള വിപുലമായ സംവിധാനവും അധികൃതര്‍ ഒരുക്കിയിട്ടുണ്ട്. കൂടാതെ, ഹജ്ജ് തയ്യാറെടുപ്പുകളുടെ ഭാഗമായി തീര്‍ഥാടകര്‍ ഉപയോഗിക്കുന്ന റോഡുകളുടെ ഒരു നീണ്ട ശൃംഖല തന്നെ സൗദി അധികൃതര്‍ സജ്ജമാക്കിക്കഴിഞ്ഞു. തീര്‍ത്ഥാടകരുടെ ചുമതലയുള്ള കമ്പനികള്‍, ഇസ്ലാമിന്റെ ഏറ്റവും പുണ്യസ്ഥലമായ മക്കയിലെയും പരിസരങ്ങളിലെയും പുണ്യസ്ഥലങ്ങളില്‍ തങ്ങളുടെ ഫീല്‍ഡ് സേവന കേന്ദ്രങ്ങള്‍ സജ്ജീകരിക്കുന്നതിന് അന്തിമരൂപം നല്‍കി.
