നന്ദിതയെ ശ്രീദേവ് എസ്എസ് സോമൻ ലൈംഗികാധിക്ഷേപം നടത്തുന്ന വീഡിയോ വൈറൽ; സംഭവം ക്ലബ്ബ് ഹൗസ് ചർച്ചക്കിടെ; മുസ്ലിമായതിനാൽ സവാദിനെ ലക്ഷ്യം വെക്കുന്നെന്ന് ആരോപണം
Authored by Pranav Melethil | Samayam Malayalam | Updated: 9 Jun 2023, 1:58 pm
നന്ദിത ശങ്കര മസ്താനിയെ കോൺഗ്രസ് നേതാവ് ശ്രീദേവ് എസ്എസ് സോമൻ ലൈംഗികാധിക്ഷേപം നടത്തിയെന്ന് ആരോപണമുയരുന്നു. ഒരു ക്ലബ്ബ് ഹൗസ് ചർച്ചയിലാണ് നേതാവ് കേട്ടാലറയ്ക്കുന്ന തെറികൾ വിളിച്ച് നന്ദിതയെ അധിക്ഷേപിച്ചത്.
ഒരു കോടതിയിലെന്ന പോലെയാണ് ക്ലബ്ബ് ഹൗസ് റൂമിൽ വിചാരണ നടക്കുന്നത്. താൻ ഈ ദിവസങ്ങളിൽ കടന്നുപോകുന്ന പ്രയാസങ്ങളെക്കുറിച്ച് പറയുമ്പോൾ കോടതിയിൽ കൊടുക്കാനുള്ള തെളിവുകൾ പുറത്തുവിടണമെന്നാവശ്യപ്പെടുകയാണ് ചാറ്റ് റൂമിലുള്ളവർ. സവാദ് മോശമായി പെരുമാറുന്ന സമയത്ത് വിദേശത്തുള്ള സുഹൃത്തുമായി ചാറ്റ് ചെയ്യുകയായിരുന്നു താനെന്ന് നന്ദിത പറഞ്ഞതിൽ പിടിച്ചായി മറ്റൊരു ചർച്ച. ഈ ചാറ്റ് പുറത്തുവിടണമെന്നാണ് ചർച്ചക്കാരിലൊരാൾ ആവശ്യപ്പെടുന്നത്.
സവാദ് വിദ്യാസമ്പന്നനും ഹൈ ഡിസ്റ്റിങ്ഷനോടെ ഡിഗ്രി പാസ്സായയാളുമാണെന്ന് ചർച്ചയിൽ പങ്കെടുത്തവരിലൊരാൾ സാക്ഷ്യപ്പെടുത്തുന്നുണ്ട്. സവാദിന്റെ സഹോദരൻ ഡോക്ടറാണെന്നും, വീട്ടുകാരാരും മോശപ്പെട്ടവരല്ലെന്നും സാക്ഷ്യം പറയുന്നു. ഇക്കാരണത്താൽ സവാദിനെതിരെ ഉന്നയിക്കുന്ന ആരോപണം നിലനില്‍ക്കില്ലെന്നാണ് വാദം.
ഇൻസ്റ്റഗ്രാം പ്രൊഫൈലിൽ നന്ദിതയിട്ട വീഡിയോകളും ചിത്രങ്ങളും മുൻനിർത്തിയാണ് ചിലർ ചോദ്യം ചെയ്യൽ നടത്തുന്നത്. ഇത്തരം വീഡിയോകളിടുന്നയാൾക്ക് ഇങ്ങനെയുള്ള പെരുമാറ്റങ്ങളും നേരിടേണ്ടി വരും എന്ന നിലയിലേക്ക് ചർച്ചകൾ പോകുന്നു. ഇതിനിടയിൽ മുസ്ലിം ഇരവാദവും ഉന്നയിക്കപ്പെടുന്നുണ്ട്. സവാദ് മുസ്ലിമായതു കൊണ്ടാണ് അയാൾക്കെതിരെ നീക്കം നടക്കുന്നത് എന്നാണ് ചിലരുടെ വാദം. ഇതിനിടയിലാണ് പച്ചത്തെറിയും, ലൈംഗികാധിക്ഷേപവുമായി ശ്രീദേവ് എസ്എസ് സോമൻ രംഗപ്രവേശം ചെയ്യുന്നത്.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
