അമിത് ഷാ വന്നപ്പോൾ തെരുവ് വിളക്ക് കത്തിയില്ല; ബിജെപി – ഡിഎംകെ രാഷ്ട്രീയപ്പോര്

ചെന്നൈ നഗരത്തിന്റെ വിവിധ ഭാഗങ്ങളിൽ വൈദ്യുതി നഷ്ടപ്പെട്ടിരുന്നു. തെരുവ് വിളക്കുകൾ അടക്കം അണയുകയും ചെയ്തിരുന്നു. സംഭവത്തിൽ ഗുരുതരമെന്ന് സുരക്ഷാവീഴ്ചയുണ്ടായെന്നും അന്വേഷണം വേണമെന്നും ആവശ്യമാണെന്ന് കാണിച്ച് ബിജെപി പ്രവർത്തകർ പ്രതിഷേധിച്ചിരുന്നു. ഡിഎംകെയ്ക്കെതിരെ ബിജെപി ഗുരുതര ആരോപണമുന്നയിരിക്കുന്നത്.

“സംഭവത്തേക്കുറിച്ച് അന്വേഷിക്കണം. നേതാവും കേന്ദ്ര ആഭ്യന്തര മന്ത്രിയുമായ അമിത് ഷാ ചെന്നൈ വിമാനത്താവളത്തിൽ എത്തുമ്പോൾ എങ്ങനെയാണ് പെട്ടെന്ന് വൈദ്യുതി മുടങ്ങുന്നത്? ഇതൊരു സുരക്ഷാ വീഴ്ചയാണ്. ഇത് ഗൗരവമായി അന്വേഷിക്കണം,” തമിഴ്‌നാട് ബിജെപി സംസ്ഥാന വൈസ് പ്രസിഡന്റ് കാരു നാഗരാജൻ വാർത്താ ഏജൻസിയായ എഎൻഐയോട് പറഞ്ഞു.

സംഭവത്തിൽ പ്രതികരണവുമായി ഡിഎംകെയുമായി രംഗത്തുവന്നിട്ടുണ്ട്. വൈദ്യുതി നഷ്ടപ്പെട്ടതിന് പിന്നിൽ അസ്വാഭാവികത ഒന്നുമില്ലെന്നും ഡിഎംകെ വക്താവ് ടികെഎസ് ഇളങ്കോവൻ പറഞ്ഞു. വൈദ്യുതി മുടക്കത്തിന്റെ പേരിൽ ബിജെപി രാഷ്ട്രീയം കളിക്കുകയാണെന്ന് ഡിഎംകെ നേതാവ് ആരോപിച്ചു.

“ഈ മാസത്തിൽ, കനത്ത ചൂട് കാരണം സാധാരണ കാലങ്ങളെ അപേക്ഷിച്ച് പകൽ സമയങ്ങളിൽ വൈദ്യുതി ഉപഭോഗം കൂടും. ചിലപ്പോൾ പവർ കട്ടുകൾ സംഭവിക്കും, അത് കരുതിക്കൂട്ടി ചെയ്തതൊന്നും ആകില്ല. പ്രധാനമന്ത്രിയുടെ വാഹനവ്യൂഹം പോകുമ്പോൾ പുൽവാമ ആക്രമണം ഉണ്ടായി, ആരാണ് അതിന് ഉത്തരവാദി?… ബിജെപി ചിലപ്പോൾ ഇതിനും സിബിഐക്ക് കേസ് നൽകും. അവർ ഈ ഒരു പ്രശ്നവും രാഷ്ട്രീയ വത്കരിക്കുകയാണെന്നും” ഇളങ്കോവൻ വാർത്താ ഏജൻസിയായ എഎൻഐയോട് പറഞ്ഞു.
230 കെ വി ഹൈ ടെൻഷൻ വിതരണ ലൈൻ ഗ്രിഡിൽ നിന്ന് വിച്ഛേദിച്ചതാണ് വൈദ്യുതി തടസ്സപ്പെടാൻ കാരണമെന്നാണ് വൈദ്യുതി ബോർഡ് വൃത്തങ്ങൾ അറിയിച്ചിരിക്കുന്നത്. അമിത ഷാ സഞ്ചരിച്ച വിമാനത്താവള പരിസരത്ത് മാത്രമല്ല, പോരൂർ, സെന്റ് തോമസ് മൗണ്ട്, പൂനമല്ലി, പരിസര പ്രദേശങ്ങളിലും വൈദ്യുതി മുടങ്ങിയതായി വൈദ്യുതി വകുപ്പ് വൃത്തങ്ങൾ അറിയിച്ചു.

ശനിയാഴ്ച രാത്രി 9.30 മുതൽ 10.12 വരെ ചെന്നൈയുടെ വിവിധ ഭാഗങ്ങളിൽ വൈദ്യുതി മുടക്കം സംഭവിച്ചു. ഈ പ്രദേശങ്ങളിൽ മറ്റ് മാർഗങ്ങൾ വഴി വൈദ്യുതി എത്തിക്കാനുള്ള ശ്രമങ്ങൾ നടത്തിയെങ്കിലും ഒന്നും നടന്നിരുന്നില്ലെന്നും ഇലക്ട്രിസിറ്റി ബോർഡ് വൃത്തങ്ങൾ മാധ്യമങ്ങളോട് പറഞ്ഞു.

ഡിഎംകെ സർക്കാരിനും തമിഴ്‌നാട് ഊർജ വകുപ്പ് മന്ത്രി സെന്തിൽ ബാലാജിക്കുമെതിരെ മുദ്രാവാക്യം വിളിച്ച് ബിജെപി പ്രവർത്തകർ വ്യാപക പ്രതിഷേധം ഉയർത്തി.

Also Read : ബിപർജോയ് ചുഴലിക്കാറ്റ് കൂടുതൽ ശക്തമായി; മണിക്കൂറിൽ 145 കിലോമീറ്ററിൽ വീശുന്നു; എന്ന് കരതൊടും?

അതേസമയം, തമിഴ്നാട്ടിൽ കടുത്ത വൈദ്യുത പ്രശ്നമുണ്ടെന്ന് ഇപ്പോഴെങ്കിലും ഡിഎംകെ സമ്മതിച്ചല്ലോ എന്നാണ് സമൂഹമാധ്യമങ്ങളിലൂടെ നെറ്റിസൺ പറയുന്നത്.

Read Latest National News and Malayalam News