കിറ്റക്സുമായി ചർച്ചയ്ക്ക് തയ്യാർ; നിയമാനുസൃതം പ്രവർത്തിച്ചാൽ പിന്തുണ: പി രാജീവ്

കൊച്ചി: കിറ്റക്സുമായി ഇപ്പോഴും ചർച്ചയ്ക്ക് തയ്യാറെന്ന് വ്യവസായ വകുപ്പ് മന്ത്രി പി രാജീവ്. വ്യവസായികളുമായി നടത്തിയ ചർച്ചയിൽ ഇന്ന് കിറ്റക്സ് പരാതിയുമായി എത്തിയിരുന്നില്ല. പരാതിയുണ്ടെങ്കിൽ ചർച്ച ചെയ്യാൻ ഇപ്പോഴും തയ്യാറാണെന്ന് പി രാജീവ് പറഞ്ഞു.



“നിങ്ങൾ ഇവിടേക്ക് വരൂ. നിങ്ങൾക്കിവിടെ ഒരു നിയമവും ബാധകമല്ല എന്ന് പറയാൻ സാധിക്കില്ല.” നിയമാനുസൃതം പ്രവർത്തിക്കുന്ന സ്ഥാപനങ്ങൾക്ക് പൂർണ്ണ പിന്തുണ നൽകുമെന്നും പി രാജീവ് പറഞ്ഞു.

വ്യവസായ സംരംഭകരുടെ ഭാഗത്തു നിന്നും നല്ല പിന്തുണയാണ് ലഭിക്കുന്നത്. വ്യവസായവുമായി ബന്ധപ്പെട്ട് ജില്ലകളിൽ ഉണ്ടാകുന്ന പരാതികൾ പരിശോധിച്ച് പരിഹരിക്കാൻ ഐഎഎസ് ഉദ്യോഗസ്ഥർക്ക് ചുമതല നൽകിയിട്ടുണ്ടെന്നും അദ്ദേഹം പറഞ്ഞു.

ഭൂമി പാട്ടത്തിന് നൽകുന്നതിന് ഏകീകൃത സംവിധാനം ഉണ്ടാക്കും. വ്യവസായങ്ങൾ സൂക്ഷിക്കേണ്ട രജിസ്റ്ററുകൾ സംബന്ധിച്ച് റിപ്പോർട്ട് തയ്യാറാക്കാൻ മൂന്നംഗ സമിതിയെ ചുമതലപ്പെടുത്തിയിട്ടുണ്ടെന്നും മന്ത്രി പറഞ്ഞു.