2020 ജൂണ്‍ 17 നാണ് കേസിനാസ്പദമായ സംഭവം നടന്നത്. ദുബായിലെ അറേബ്യന്‍ റാഞ്ചിലെ മിറാഡോറിലെ വീട്ടില്‍ ഉറങ്ങുകയായിരുന്ന ഹിരേനെയും വിധി ആധിയയെയും നിര്‍മ്മാണ തൊഴിലാളിയായ പാകിസ്താന്‍ യുവാവ് കുത്തിക്കൊലപ്പെടുത്തുകയായിരുന്നു. അക്രമത്തില്‍ ദമ്പതികളുടെ മകള്‍ക്കും സാരമായി പരിക്കേറ്റിരുന്നു. അന്ന് 26 വയസ്സായിരുന്നു പാക് യുവാവിന്റെ പ്രായം. ദമ്പതികളെ കൊലപ്പെടുത്തിയ കേസില്‍ വാദം കേട്ട ദുബായ് ക്രിമിനല്‍ കോടതി കഴിഞ്ഞ വര്‍ഷം ഏപ്രിലില്‍ ഇയാള്‍ കുറ്റക്കാരനാണെന്ന് കണ്ടെത്തുകയും വധശിക്ഷയ്ക്ക് വിധിയിക്കുകയുമായിരുന്നു. ദുബായ് ഫസ്റ്റ് ഇന്‍സ്റ്റന്‍സ് കോടതിയിലും ദുബായ് അപ്പീല്‍ കോടതിയിലും പ്രതി ഭാഗം അപ്പീലുകള്‍ സമര്‍പ്പിച്ചെങ്കിലും അവ നിരസിക്കപ്പെടുകയായിരുന്നു.
ചിത്രങ്ങൾ പങ്കുവച്ച് ഉണ്ണി | Kavya Madhavan | Unni |
ദുബായ് പ്രാന്തപ്രദേശത്തുള്ള അറേബ്യന്‍ റാഞ്ചിലെ മിറാഡോര്‍ ജില്ലയിലെ വില്ലയിലാണ് ദമ്പതികളെ മരിച്ച നിലയില്‍ കണ്ടെത്തിയത്. രാത്രി ഒരു മണിയോടെയാണ് ഇയാള്‍ അകത്ത് പ്രവേശിച്ചത്. വില്ലയിലെ ലൈറ്റുകള്‍ അണഞ്ഞതിന് ശേഷം, പൂട്ടാതെ കിടന്ന ഒരു വാതിലിലൂടെ അയാള്‍ വില്ലയിലേക്ക് നുഴഞ്ഞു കയറി
താഴത്തെ നിലയിലെ ഒരു വാലറ്റില്‍ നിന്ന് 1,965 ദിര്‍ഹം മോഷ്ടിച്ച ശേഷം, സ്വര്‍ണാഭരണങ്ങള്‍ക്കായി ദമ്പതികള്‍ ഉറങ്ങുകയായിരുന്ന മുകള്‍ നിലയിലേക്ക് പോയി. തന്റെ കിടക്കയ്ക്ക് സമീപം ഡ്രോയര്‍ തുറക്കുന്ന ശബ്ദം കേട്ട് വീട്ടുടമ ആദിയ ഉണര്‍ന്നതോടെ ഇയാളെ പല തവണ കുത്തിപ്പരിക്കേല്‍പ്പിക്കുകയായിരുന്നു. ആദിയയുടെ തലയിലും നെഞ്ചിലും വയറിലും ഇടത് തോളിലുമായി 10 തവണ കുത്തേറ്റതായി ഫോറന്‍സിക് റിപ്പോര്‍ട്ടില്‍ പറയുന്നു. അതിനു ശേഷം ഇയാള്‍ ഭാര്യയ്ക്കു നേരെ തിരിയുകയും അവരുടെ തലയിലും കഴുത്തിലും നെഞ്ചിലും മുഖത്തുമായി 14 തവണ കുത്തിപ്പരിക്കേല്‍പ്പിക്കുകയായിരുന്നു. ഇവരുടെ പുതപ്പില്‍ പലതവണ കത്തി തുളച്ചുകയറിയതായി അന്വേഷണ ഉദ്യോഗസ്ഥര്‍ കണ്ടെത്തുകയുണ്ടായി.
മാതാപിതാക്കള്‍ കിടക്കുന്ന മുറിയില്‍ നിന്ന് നിലവിളി കേട്ട് മുറിയില്‍ നിന്ന് പുറത്തേക്കിറങ്ങിയ 18 വയസ്സുള്ള മകളുടെ കഴുത്തിനും ഇയാള്‍ കുത്തിപ്പരിക്കേല്‍പ്പിച്ചു. അതിനു ശേഷമാണ് ഇയാള്‍ വീട്ടില്‍ നിന്നും പുറത്തുകടന്നത്. 13 വയസ്സുള്ള ഇളയ മകളാണ് പോലീസിനെയും പിതാവിന്റെ ഒരു സുഹൃത്തിനെയും വിളിച്ച് സംഭവത്തെ കുറിച്ച് പറഞ്ഞത്. പോലിസ് എത്തുമ്പോഴേക്കും പ്രതി രക്ഷപ്പെട്ടിരുന്നു. അടുത്ത ദിവസം ഷാര്‍ജയില്‍ വെച്ചാണ് പോലിസ് ഇയാളെ അറസ്റ്റ് ചെയ്തത്. ചോദ്യം ചെയ്യലില്‍ ഇയാള്‍ കുറ്റം സമ്മതിക്കുകയായിരുന്നു. വീടിന്റെ ചുവരില്‍ കണ്ട രക്തം പുരണ്ട കൈമുദ്രയും കിടക്കയില്‍ നിന്ന് കണ്ടെത്തിയ മാസ്‌കില്‍ നിന്ന് എടുത്ത സാമ്പിളുകളും യുവാവിന്റെ ഡിഎന്‍എയുമായി പൊരുത്തപ്പെടുന്നതായി കണ്ടെത്തിയതോടെ കൊലപാതകത്തിനു പിന്നില്‍ ഇയാള്‍ തന്നെയാണെന്ന് ഉറപ്പിക്കുകയായിരുന്നു. ഇയാള്‍ കൊലപാതകത്തിന് ഉപയോഗിച്ച കത്തി വില്ലയില്‍ നിന്ന് 500 മീറ്റര്‍ അകലെ പിന്നീട് പോലിസ് കണ്ടെത്തി.
കൊലപാതകത്തിന് മൂന്ന് ദിവസം മുമ്പ് പാകിസ്താനിലുള്ള തന്റെ അമ്മയ്ക്ക് അസുഖം വന്നിരുന്നുവെന്നും അവര്‍ക്ക് പണം നല്‍കാനുള്ള വഴികളെക്കുറിച്ച് ആലോചിച്ചാണ് മോഷണത്തിന് പദ്ധതിയിട്ടതെന്നും ഇയാള്‍ പ്രോസിക്യൂട്ടര്‍മാരോട് പറഞ്ഞു. ആദ്യം കുറ്റം ഏറ്റുപറഞ്ഞ ഇയാള്‍ 2020 നവംബറില്‍ കോടതിയില്‍ ഹാജരായപ്പോള്‍ വാക്ക് മാറ്റുകയും എല്ലാ കുറ്റങ്ങളും നിഷേധിക്കുകയും ചെയ്തു. എന്നാല്‍ സാഹചര്യത്തെളിവുകളും ശാസ്ത്രീയ തെളിവുകളും സാക്ഷി മൊഴികളും പരിശോധിച്ച കോടതി ഇയാള്‍ക്കെതിരേ വധശിക്ഷ വിധിക്കുകയായിരുന്നു. കൊല്ലപ്പെട്ട ദമ്പതികള്‍ യുഎഇയില്‍ ഗോള്‍ഡന്‍വിസയില്‍ കഴിഞ്ഞുവരികയായിരുന്നു. ഇവരുടെ രണ്ടു മക്കള്‍ക്കും ദുബായിയില്‍ പഠനം തുടരാന്‍ സര്‍ക്കാര്‍ സൗകര്യം ഏര്‍പ്പെടുത്തിയിട്ടുണ്ട്.
