കുവൈറ്റില്‍ ട്രാഫിക് നിയമം ലംഘിച്ച വാഹനങ്ങള്‍ക്ക് ഖത്തറില്‍ വച്ചും പിഴ ഈടാക്കാന്‍ സംവിധാനം വരുന്നു

എല്ലാ ഗള്‍ഫ് രാജ്യങ്ങളിലെയും ട്രാഫിക് വകുപ്പുകള്‍ തമ്മില്‍ ഓണ്‍ലൈനായി ബന്ധിപ്പിക്കുന്ന ഏകീകൃത ട്രാഫിക് സംവിധാനത്തിന്റെ ഭാഗമായാണ് ഇരു രാജ്യങ്ങളും തമ്മിലെ പുതിയ സഹകരണ കരാര്‍. ഇതോടെ ഇരു രാജ്യങ്ങളും തമിലുള്ള ഗതാഗത നിയമ ലംഘനങ്ങള്‍ ഉള്‍പ്പെടെയുള്ള വിവരങ്ങള്‍ പരസ്പരം കൈമാറുമെന്ന് ജനറല്‍ ഡിപ്പാര്‍ട്ട്മെന്റ് ഓഫ് റിലേഷന്‍സ് ആന്‍ഡ് സെക്യൂരിറ്റി മീഡിയ വ്യക്തമാക്കി.

ഏകീകൃത സംവിധാനം വഴി നിയമലംഘനത്തിന്റെ റിപ്പോര്‍ട്ടുകള്‍ അതിവേഗം ട്രാഫിക് വകുപ്പിന് ലഭിക്കും. നിലവില്‍ ഏതെങ്കിലുമൊരു ജിസിസി രാജ്യത്ത് രജിസ്റ്റര്‍ ചെയ്ത വാഹനം മറ്റൊരു ഗള്‍ഫ് രാജ്യത്ത് ചെന്ന് ഗതാഗത നിയമ ലംഘനങ്ങള്‍ നടത്തിയാല്‍ പിഴ ചുമത്തുന്നതിന് സാങ്കേതിക തടസ്സങ്ങള്‍ നിലനില്‍ക്കുന്നുണ്ട്.

പുതിയ കരാര്‍ നിലവില്‍ വരുന്നതോടെ ഈ രാജ്യങ്ങളില്‍ നിന്നുള്ള വാഹനങ്ങള്‍ ഗതാഗത നിയമ ലംഘനങ്ങള്‍ നടത്തിയാല്‍ വാഹനം രജിസ്റ്റര്‍ ചെയ്ത രാജ്യത്ത് നിന്ന് പിഴ ഈടാക്കാം. കഴിഞ്ഞ ഫെബ്രുവരിയില്‍ കുവൈറ്റ് യുഎഇയുമായും ഏകീകൃത ട്രാഫിക് സംവിധാനം നടപ്പില്‍ വരുത്താനുള്ള കരാറില്‍ ഒപ്പ് വെച്ചിരുന്നു. പുതിയ സംവിധാനം വരുന്നതോടെ കുവൈറ്റില്‍ വച്ച് സംഭവിക്കുന്ന ട്രാഫിക് നിയമ ലംഘനങ്ങള്‍ക്ക് ഖത്തറിലും തിരിച്ചും പിഴ ചുമത്താനും നടപടികള്‍ സ്വീകരിക്കാനും കഴിയും. ട്രാഫിക് പിഴകള്‍ പരസ്പരം കൈമാറുന്നതിനുള്ള സംവിധാനവും ഇതിന്റെ ഭാഗമായി നിലവില്‍ വരും.

Also Read : ജാഗ്രതൈ! മുനിസിപ്പാലിറ്റി പിഴകള്‍ പരിഷ്‌ക്കരിച്ച് സൗദി, നിയമലംഘനങ്ങള്‍ക്ക് അരലക്ഷം റിയാല്‍ വരെ പിഴ

ഒരു വാഹനം മറ്റൊരു രാജ്യത്ത് ട്രാഫിക് നിയമലംഘനം നടത്തി ഫൈന്‍ ചുമത്തപ്പെട്ട വാഹനമാണോ എന്ന് തിരിച്ചറിയാനും പുതിയ സംവിധാനം നിലവില്‍ വരുന്നതോടെ സാധ്യമാവും. ഇത് വാഹാനം വാങ്ങുന്നവര്‍ക്കും സഹായകരമാവും. ഏകീകൃത ട്രാഫിക് സംവിധാനം നിലവില്‍ വരുന്നതോടെ നിയമ ലംഘനം നടത്തിയവര്‍ എവിടെയായാലും ശിക്ഷിക്കപ്പെടുന്നുവെന്ന് ഉറപ്പുവരുത്താനും അതുവഴി ഗതാഗത നിയമലംഘനങ്ങള്‍ കുറയ്ക്കാനും ജിസിസി രാജ്യങ്ങള്‍ക്ക് സാധിക്കുമെന്ന പ്രതീക്ഷയിലാണ് അധികൃതര്‍.

Read Latest Gulf Newsand Malayalam News