നാല് പതിറ്റാണ്ടിന്റെ ചരിത്രം
നാല് പതിറ്റാണ്ട് മുമ്പു തന്നെ ഈ മരങ്ങൾ നമ്മുടെയെല്ലാം നിരത്തുകളിൽ സജീവമായിരുന്നു. (അതിനുമേറെ മുമ്പുതന്നെ നഗരങ്ങളിൽ ഇവയെത്തിയിരുന്നു. എന്നാൽ നഗരവൽക്കരണം ശക്തമായിത്തുടങ്ങിയതോടെ ഇവയുടെ ഉപയോഗവും കൂടിവന്നു.) കേരളത്തിൽ മാത്രമല്ല ഇന്ത്യയിലെ ഒട്ടുമിക്ക നഗരങ്ങളിലും ഈ മരങ്ങൾക്ക് സ്ഥാനം ലഭിച്ചു. എന്നാൽ ഈ മരങ്ങൾ മാത്രമാണോ വഴിയോരങ്ങളിൽ നട്ടുവളർത്താറുള്ളത്? ഒരിക്കലുമല്ല. മഹാഗണി മുതൽ വേപ്പുമരം വരെയുള്ള മറ്റു നിരവധി മാരങ്ങളും നട്ട് പരിപാലിക്കാറുണ്ട്. എന്നാൽ, ഭൂരിഭാഗംവരുന്ന മരങ്ങൾ മഴമരങ്ങളും അലസ്സിപ്പൂമരങ്ങളുമാണ്. ബെംഗളൂരു നഗരത്തിൽ ഏറ്റവും കൂടുതൽ നട്ടുവളർത്തിയിട്ടുള്ളത്. ബെംഗളൂരിവിൽ ജയനഗർ, മഗദി റോഡ്, പാലസ് റോഡ് എന്നിവിടങ്ങളിലൂടെ യാത്ര ചെയ്തിട്ടുള്ളവർക്ക് തണൽവിരിച്ചുനിൽക്കുന്ന മഴമരങ്ങൾ നല്‍കുന്ന ശീതളിമ അനുഭവിക്കാനാകും.
ഉയർന്നതോതിൽ ഈർപ്പം തങ്ങി നിൽക്കുന്ന മരങ്ങളാണ് മഴമരങ്ങൾ. ഇവയ്ക്കു താഴെ എപ്പോഴുമൊരു നനവ് നമുക്കനുഭവപ്പെടും. ഇതുതന്നെയാണ് ഈ മരങ്ങൾ അപകടകാരികളായി മാറുന്നതിന് കാരണവും. എപ്പോൾ വേണമെങ്കിലും ശിഖരങ്ങൾ പൊട്ടിവീഴാം. വേനൽക്കാലത്ത് ശിഖരങ്ങൾ ഉണങ്ങി നിൽക്കുന്നത് പൊട്ടിവീഴുക ആദ്യത്തെ കാലവർഷപ്പെയ്ത്തിലായിരിക്കും.
നല്ല ഉയരത്തിൽ വളരുകയും നന്നായി തണല്‍ വിരിക്കുകയും ചെയ്യുന്നവയാണ് ഈ മരങ്ങൾ (അലസിപ്പൂമരവും മഴമരവും) രണ്ടും. അലസിപ്പൂമരവും വളരെ ബലം കുറഞ്ഞവയാണ്. രണ്ടിനും ആരുബലവും വേരുബലവും കുറവാണ്. തണ്ടൊടിഞ്ഞ് വീഴുക മാത്രമല്ല, ഒഒന്നാകെ കടപുഴകി വീഴുകയും ചെയ്യും.
അശാസ്ത്രീയ സമീപനം
എന്തുകൊണ്ടാണ് ഇത്രയേറെ അപകടങ്ങൾ നടന്നിട്ടും ഈ മരങ്ങളെ വനംവകുപ്പ് വളരെയധികം ആശ്രയിക്കുന്നത്? ഉത്തരം ലളിതമാണ്. ഈ മരങ്ങൾക്ക് കാര്യമായ പരിപാലനം വേണ്ട വളരാൻ. തുടക്കത്തിൽ കൊടുക്കുന്ന ചെറിയ നോട്ടം മാത്രം മതിയാകും. പിന്നീടത് വെള്ളവും വളവും കിട്ടാവുന്നിടത്തു നിന്നെല്ലാം വലിച്ചെടുത്ത് വളർന്നുപൊന്തും. ഉദ്യോഗസ്ഥരെ സംബന്ധിച്ചിടത്തോളം രേഖകളിൽ മരത്തിന്റെ എണ്ണം കാണിക്കുകയേ വേണ്ടൂ. അത് ഏത് മരമാണെന്നത് വിഷയമല്ല. എങ്ങനെയെങ്കിലും നാല് മരം നട്ടുവളർത്തി സ്വന്തം ഡ്യൂട്ടി ചെയ്തെന്ന് വരുത്തണം.
മറ്റൊരു പ്രശ്നം പരിപാലനച്ചെലവ് തന്നെയാണ്. മറ്റ് മരങ്ങളെല്ലാം പരിപാലിക്കണമെങ്കിൽ നല്ല ചെലവുണ്ട്. കാര്യമായ നോട്ടം വേണം. അലസിപ്പൂമരത്തിനും മഴമരത്തിനുമെല്ലാം അലസമായൊരു നോട്ടം മാത്രം മതിയാകും. മരം നട്ടതിനു ശേഷം ചുറ്റും ഒരു കമ്പിവേലി കെട്ടിവെച്ച് പോയാൽ മതി. ഇവ താനേ വളർന്നുപൊന്തും. മരം നടാനും പരിപാലിക്കാനും എൻജിഓകളെ ഏൽപ്പിക്കുന്നതാണ് പല നഗരങ്ങളിലും പതിവ്. ഇവർ എളുപ്പപ്പണി ചെയ്ത് ഫണ്ട് വാങ്ങുന്നതും ഒരു കാരണമാണ്. കേരളത്തിൽ വനംവകുപ്പിന്റെ സോഷ്യൽ ഫോറസ്ട്രി വിങ്ങാണ് ഈ ജോലികൾ ചെയ്യുന്നത്. മറ്റു മരങ്ങൾക്കെല്ലാം ഇടക്കിടെ പരിപാലനം ആവശ്യമായി വരും. വെള്ളം കൊടുക്കേണ്ടിവരും.
മാമൂലുകളിൽ നിന്ന് വേറിടാത്ത സർക്കാർ സംവിധാനങ്ങൾ
1980-81ൽ കേന്ദ്ര സർക്കാർ കൊണ്ടുവന്ന റൂറൽ ഫയർവുഡ് സ്കീമിന്റെ ഭാഗമായാണ് സോഷ്യൽ ഫോറസ്ട്രി വിങ് നിലവിൽ വരുന്നത്. അക്കാലത്ത് വിറകടുപ്പുകളില്‍ മാത്രമാണ് നമ്മുടെയൊക്കെ പാചകപരിപാടികൾ നടന്നിരുന്നത്. സോഷ്യൽ ഫോറസ്ട്രി വിഭാഗം നടത്തിയ പ്ലാന്റേഷനുകളിൽ മിക്കതും ഈ ലക്ഷ്യം മുൻനിർത്തിയുള്ളതായിരുന്നു. മഴമരങ്ങൾ അഥവാ റെയിൻ ട്രീകൾ എന്നറിയപ്പെടുന്ന മരങ്ങളുടെ ഇലകൾ കന്നുകാലികൾക്കും കുതിരകൾക്കും ഭക്ഷണമാണ്. ഇവയുടെ കായ്കളും കന്നുകാലികൾ ഭക്ഷിക്കും. ചുരുക്കത്തിൽ ഇന്ത്യയുടെ കാർഷികമേഖലയെ സഹായിക്കാനും ഈ മരങ്ങൾ നടുന്നതു വഴി സാധിച്ചു.
ഇന്ന് വിറകടുപ്പുകളെ ആശ്രയിക്കുന്നതിന്റെ അളവ് നന്നെ കുറഞ്ഞിട്ടുണ്ട്. കന്നുകാലികളെ വളർത്തുന്ന രീതിയിലും മാറ്റം വന്നു. അഥവാ, വിറകിനും കാലിത്തീറ്റയ്ക്കും വനംവകുപ്പ് ഇത്തരം ബലംകുറഞ്ഞ മരങ്ങൾ വഴിയോരത്ത് നടേണ്ട ആവശ്യം നിലവിലില്ല. എന്നാൽ, ഉദ്യോഗസ്ഥർ മാമൂലുകളിൽ നിന്ന് മാറിനടക്കാത്തവരാണ്. പ്രത്യേകിച്ച് വനംവകുപ്പ് അതിന്റെ ദുശ്ശാഠ്യങ്ങൾക്ക് കുപ്രസിദ്ധമാണ്. ആവശ്യമോ, അപകടസാധ്യതയോ നോക്കിയല്ല മരം നടുക. ആ മരങ്ങൾ നടുന്നത് അവരുടെ പാരമ്പര്യമാണ്. അതവർ പാലിക്കും.
കേരളത്തിൽ റോഡിലേക്ക് വീണ് വലിയ അപകടങ്ങളുണ്ടാക്കിയ മരങ്ങളെല്ലാം മഴമരങ്ങളാണെന്ന് ഈ വിഷയത്തിൽ അറിവുള്ളവർ ചൂണ്ടിക്കാണിക്കുന്നു. 2015ൽ കോതമംഗലത്ത് സ്കൂൾ ബസ്സിനു മുകളിലേക്ക് വീണ്ട് 5 കുട്ടികളുടെ മരണത്തിന് കാരണമായതും മഴമരമായിരുന്നു. മനോഹരമായ പൂവുകളും വിരിഞ്ഞു നിന്ന് തണലൊരുക്കുന്ന പത്രവിന്യാസവും മാത്രമേ ഈ മരത്തിന്റെ ഗുണമായി കാണാനാകൂ. ഒരുറപ്പും ഈ മരത്തിനില്ല. വേരുബലവും കുറവ്.
എന്താണ് പരിഹാരം?
നട്ടുവളർത്തുന്ന മരങ്ങൾ ഏതെല്ലാമായിരിക്കണമെന്ന് നിശ്ചയിക്കുന്ന തരത്തിൽ ഒരു നയപരമായ ഇടപെടൽ വനംവകുപ്പിൽ നടക്കേണ്ടതുണ്ട്. പുളിമരം, ആൽമരം തുടങ്ങി ബലമുള്ള നിരവധി മരങ്ങളുണ്ട് നട്ടുവളർത്താൻ. അവയിലേക്ക് അധികാരികൾ തിരിയേണ്ടതുണ്ട്. ബലം കുറഞ്ഞ മരങ്ങൾ വഴിയോരങ്ങളിൽ നട്ടുവളർത്തുന്നതിനെതിരെ ജനങ്ങളുടെ ജാഗ്രത ഉണ്ടാകുന്നതും നല്ലതാണ്. ജനങ്ങളുടെ കൺമുന്നിൽ നടക്കുന്ന കാര്യമാണല്ലോ ഇത്.
