വാജ്പേയിയുടെ പദ്ധതി
ഇന്ത്യ-മ്യാന്‍മര്‍-തായ്‌ലന്‍ഡ് എന്നീ രാജ്യങ്ങളെ ബന്ധിപ്പിക്കുന്ന ഹൈവേ എന്ന ആശയം ആദ്യം മുന്നോട്ട് വെച്ചത് മുന്‍ പ്രധാനമന്ത്രി അടല്‍ ബിഹാരി വാജ്‌പോയയാണ്. 2002 ഏപ്രിലില്‍ ഇന്ത്യയും മ്യാന്‍മറും തായ്‌ലന്‍ഡും തമ്മില്‍ നടന്ന മന്ത്രിതല യോഗത്തില്‍ പദ്ധതിക്ക് അംഗീകാരം ലഭിച്ചു. ഇന്ത്യയും സൗത്ത് ഈസ്റ്റ് ഏഷ്യന്‍ നേഷന്‍സ് അസോസിയേഷനും (ആസിയാന്‍) തമ്മിലുള്ള വ്യാപാരം വര്‍ദ്ധിപ്പിക്കുക എന്നതായിരുന്നു ഈ പദ്ധതിയുടെ ലക്ഷ്യം.
പദ്ധതി വൈകാന്‍ കാരണം എന്ത്?
2002ല്‍ യാങ്കൂണില്‍ നടന്ന മന്ത്രിതല യോഗത്തില്‍ അംഗീകാരം ലഭിച്ച പദ്ധതി വൈകാന്‍ കാരണമെന്തായിരുന്നു? നിര്‍ദ്ദിഷ്ട പദ്ധതിയെക്കുറിച്ചുള്ള ചര്‍ച്ചയില്‍ എപ്പോഴും ഉയര്‍ന്നുവരുന്ന ചോദ്യമാണിത്. ദൂരം, റൂട്ട് എന്നിവയിലെ വെല്ലുവിളികളാണ് ഈ പദ്ധതി വൈകാന്‍ പ്രധാന കാരണം. മൂന്ന് രാജ്യങ്ങളിലൂടെയാണ് പാത കടന്നുപോകേണ്ടത്. മൂന്ന് രാജ്യങ്ങളിലെയും രാഷ്ട്രീയ സാഹചര്യങ്ങൾ പാതയുടെ നിർമ്മാണത്തിന് അനുയോജ്യമായി വരേണ്ടതുണ്ടായിരുന്നു. നാലുവര്‍ഷത്തിനുള്ളില്‍ ഈ പാത തുറക്കുമെന്നാണ് നിലവില്‍ ലഭ്യമാകുന്ന വിവരം.
പൂർത്തിയാകാനുള്ളത് മ്യാൻമറിന്റെ ഭാഗം
കൊല്‍ക്കത്തയെയും ബാങ്കോക്കിനെയും ബന്ധിപ്പിക്കുന്ന ത്രിരാഷ്ട്ര പദ്ധതിയാണ് കൊല്‍ക്കത്ത-ബാങ്കോക്ക് ഹൈവേ. ഈ പാതക്ക് 2,800 കിലോമീറ്റര്‍ നീളമാണുള്ളത്. ഇന്ത്യ, മ്യാന്‍മര്‍, തായ്‌ലന്‍ഡ് എന്നീ രാജ്യങ്ങളെ ബന്ധിപ്പിക്കുന്നതായിരിക്കും പാത. നിര്‍ദ്ദിഷ്ട പാത ഏറ്റവും കൂടുതല്‍ കടന്നുപോകുന്നത് ഇന്ത്യയിലൂടെയായിരിക്കും. ഏറ്റവും കുറവ് തായ്‌ലന്‍ഡിലുമായിരിക്കും. ഇന്ത്യയെ സംബന്ധിച്ചും തായ്‌ലന്‍ഡിനെ സംബന്ധിച്ചും പാതയുടെ നിര്‍മ്മാണം ഏതാണ്ട് പൂര്‍ത്തിയായി. എന്നാല്‍ മ്യാന്‍മറില്‍ പാതയുടെ നിര്‍മ്മാണം നിര്‍ത്തിവെച്ചിരിക്കുകയാണ്. പാത യാഥാര്‍ഥ്യമാകണമെങ്കില്‍ മ്യാന്‍മാര്‍ നിര്‍ത്തിവെച്ചിരിക്കുന്ന പാതയുടെ നിര്‍മ്മാണ പ്രവര്‍ത്തനങ്ങള്‍ ഉടനെ പുനരാരംഭിക്കേണ്ടതായുണ്ട്. മൂന്നുനാല് വര്‍ഷത്തിനുള്ളില്‍ മ്യാന്‍മറും പാതയുടെ നിര്‍മ്മാണം പൂര്‍ത്തിയാക്കുമെന്ന് വാണിജ്യ മന്ത്രി ഓങ് നെയിംഗ് ഓ പറഞ്ഞു.
അതേസമയം കാലേവയ്ക്കും യാര്‍ഗിക്കും ഇടയിലുള്ള 121.8 കിലോമീറ്റര്‍ ദൂരം നാലുവരിയായി നവീകരിക്കുന്നുണ്ടെന്ന് മായ്ന്‍മര്‍ വാണിജ്യ മന്ത്രി ഓങ് നൈങ് ഓ പറഞ്ഞു. ഈ പാതയുടെ നവീകരണം പൂര്‍ത്തിയാകാന്‍ ഏതാണ്ട് രണ്ടുമുന്ന് വര്‍ഷമെടുക്കുമെന്നാണ് പറയപ്പെടുന്നത്. തമു മുതല്‍ കാലേവ വരെയുള്ള റോഡിന് ഏകദേശം 27.28 ദശലക്ഷം യുഎസ് ഡോളര്‍ ചെലവ് വരും.
ഇന്ത്യയിലെ ഗുവാഹത്തി, കൊഹിമ, കൊല്‍ക്കത്ത, മോറെ, ശ്രീരാംപൂര്‍, സിലിഗുരി എന്നീ നഗരങ്ങളെയും മ്യാന്‍മറിലെ കലേവാ, മണ്ഡലേ, തമു, യാങ്കോണ്‍ എന്നീ നഗരങ്ങളെയും തായ്‌ലന്‍ഡിലെ മേ സോട്ട്, സുഖോത്തായി എന്നീ നഗരങ്ങളെയും ബന്ധിപ്പിക്കുന്നതാണ് കൊല്‍ക്കത്ത-ബാങ്കോക്ക് ഹൈവേ. ദി ബേ ഓഫ് ബംഗാള്‍ ഇനീഷ്യേറ്റീവ് ഫോര്‍ മള്‍ട്ടി-സെക്ടറല്‍ ടെക്‌നിക്കല്‍ ആന്‍ഡ് ഇക്കണോമിക് കോ ഓപ്പറേഷന്റെ (Bengal Initiative for Multi-Sectoral Technical and Economic Cooperation) കീഴില്‍ വരുന്ന പദ്ധതിയാണ് കൊല്‍ക്കത്ത-ബാങ്കോക്ക് ഹൈവേ. ബാങ്കോക്കില്‍ നിന്നാരംഭിക്കുന്ന ഈ നാലുവരിപ്പാത തായ്‌ലന്‍ഡിലെ സുഖോതായ്, മയീ സോട്, മ്യാന്‍മറിലെ യന്‍ഗോന്‍, മണ്ടലയ്, കലേവ, തമു എന്നീ നഗരങ്ങള്‍ പിന്നിട്ടാണ് ഇന്ത്യയിലെത്തുക.
ഇന്ത്യന്‍ ചേംബര്‍ ഓഫ് കൊമേഴ്‌സും(ഐസിസി) വിദേശകാര്യ മന്ത്രാലയവും(എംഇഎ) ചേര്‍ന്ന് സംഘടിപ്പിച്ച ത്രിദിന സെമിനാറിലാണ് ഈ പാതയെക്കുറിച്ചുള്ള ചർച്ച വന്നതും മാധ്യമങ്ങളിൽ വാർത്തയായതും. ഇന്ത്യയെ തെക്കുകിഴക്കന്‍ ഏഷ്യന്‍ രാജ്യങ്ങളുമായി കരമാര്‍ഗം ബന്ധിപ്പിക്കുകയും ഈ മൂന്ന് രാജ്യങ്ങള്‍ തമ്മിലുള്ള വ്യാപാരം, ബിസിനസ്സ്, ആരോഗ്യം, വിദ്യാഭ്യാസം, ടൂറിസം ബന്ധങ്ങള്‍ക്ക് ഉത്തേജനം നല്‍കുകയും ചെയ്യുകയാണ് ഈ പദ്ധതിയുടെ ലക്ഷ്യം. ഹൈവേ തുറക്കുന്നതോടെ ഏഷ്യയിലെ തന്നെ ഏറ്റവും പ്രധാനപ്പെട്ട രാജ്യാന്തര ഹൈവേകളിലൊന്നായി ഇത് മാറുമെന്നാണ് വിലയിരുത്തപ്പെടുന്നത്.
