2024 ലോക്സഭാ തിരഞ്ഞെടുപ്പിനു ശേഷം പാർട്ടി; 2026 തമിഴ്നാട് തിരഞ്ഞെടുപ്പിൽ കന്നി മത്സരം: വിജയ്‌യുടെ പദ്ധതികളിങ്ങനെ

പത്താംതരത്തിലും പന്ത്രണ്ടാംതരത്തിലും ഉന്നതവിജയം നേടിയ വിദ്യാർത്ഥികളെ അനുമോദിക്കുന്ന ഒരു ചടങ്ങിൽ വെച്ച് നടൻ വിജയ് നടത്തിയ പ്രസ്താവനകൾ അദ്ദേഹത്തിന്റെ രാഷ്ട്രീയപ്രവേശനം സംബന്ധിച്ച സൂചന തരുന്നതായി വ്യാഖ്യാനിക്കപ്പെടുന്നു. കുട്ടികളോട് രാഷ്ട്രീയവിഷയങ്ങൾ തന്നെയാണ് അദ്ദേഹം സംസാരിച്ചത്. എല്ലാവരും മുതിർന്ന് വോട്ടർമാരാകുമെന്നും, അപ്പോൾ പണം വാങ്ങി വോട്ട് ചെയ്യരുതെന്നും അദ്ദേഹം അഭ്യർത്ഥിച്ചു. അങ്ങനെ വോട്ട് ചെയ്യുന്നത് സ്വന്തം വിരലുകൾ കൊണ്ട് സ്വന്തം കണ്ണിൽകുത്തുന്ന പരിപാടിയാണെന്നും അദ്ദേഹം പറഞ്ഞു. 1000 രൂപ വെച്ച് ഒരു വോട്ടർക്ക് കൊടുക്കുന്നയാൾ ഒരു മണ്ഡലത്തിൽ 15 കോടി രൂപയെങ്കിലും ചെലവാക്കുന്നുണ്ട്. അത്തരമാളുകൾ എത്രമാത്രം പണം അനധികൃതമായി സമ്പാദിച്ചിരിക്കുമെന്ന് ആലോചിക്കണമെന്നും അദ്ദേഹം കൂട്ടികളോട് പറഞ്ഞു.2024 ലോക്സഭാ തിരഞ്ഞെടുപ്പിനു ശേഷം തന്റെ രാഷ്ട്രീയകക്ഷിയുടെ പ്രഖ്യാപനം വിജയ് നടത്തുമെന്നാണ് ചില റിപ്പോര്‍ട്ടുകൾ സൂചിപ്പിക്കുന്നത്. വിജയ്‌‌യുമായി അടുപ്പമുള്ളവരെ സോഴ്സാക്കിയാണ് റിപ്പോർട്ടുകളെല്ലാം ഇക്കാര്യം പറയുന്നത്. 2026ലാണ് തമിഴ്നാട് അസംബ്ലി തിരഞ്ഞെടുപ്പ് വരുന്നത്. ഈ തിരഞ്ഞെടുപ്പാകുമ്പോഴേക്ക് തന്റെ രാഷ്ട്രീയ പാർട്ടിക്ക് നിലമൊരുക്കാനാണ് വിജയ്‌യുടെ ഉദ്ദേശ്യമെന്ന് റിപ്പോര്‍ട്ടുകൾ പറയുന്നു.

2024ലെ തിരഞ്ഞെടുപ്പിലേക്ക് ഇനിയധികം നാളില്ല എന്നതിനാൽ പ്രസ്തുത തിരഞ്ഞെടുപ്പിൽ വിജയ്‌യുടെ സാന്നിധ്യമുണ്ടാകില്ല. എന്നാൽ തിരഞ്ഞെടുപ്പിന്റെ ഗതിവിഗതികളെ ശരിയായി നിരീക്ഷിക്കാൻ കഴിയുന്ന ഒരു സംവിധാനം ഇതിനകം വിജയ് രൂപപ്പെടുത്തിയേക്കും.

നിലവിൽ വിജയ്‌യുടെ ആരാധകരുടെ സംഘടന സാമൂഹ്യക്ഷേമ പ്രവർത്തനങ്ങളിൽ വളരെ സജീവമാണ്. ആൾ ഇന്ത്യ തലപതി വിജയ് മക്കൾ ഇയക്കം എന്ന ഈ സംഘടനയിലൂടെ നടത്തിവരുന്ന പ്രവർത്തനങ്ങളെ രാഷ്ട്രീയമണ്ഡലത്തിലും ഏകോപിപ്പിച്ചേക്കും വിജയ്.

താഴെത്തട്ടിൽ വിവിധ പരിപാടികൾ നടത്തിക്കൊണ്ടിരിക്കുകയാണ് ആരാധക സംഘടന ഇപ്പോൾ. ഇതോടൊപ്പം ഓരോ മണ്ഡലത്തിലെയും രാഷ്ട്രീയസ്ഥിതിഗതികൾ മനസ്സിലാക്കുന്നതിന് ആവശ്യമായ ഡാറ്റാ കളക്ഷനും നടത്തിവരുന്നു. ഇതോടൊപ്പം ചില ഡാറ്റാ അനാലിസിസ് സ്ഥാപനങ്ങളുടെ സഹായവും ഇവർ തേടിയിട്ടുണ്ട്. അതെസമയം പാർട്ടിയുടെ പ്രഖ്യാപനം എന്ന് നടക്കുമെന്ന് വ്യക്തമല്ലെന്ന് ആൾ ഇന്ത്യ തലപതി വിജയ് മക്കൾ ഇയക്കത്തിന്റെ ഒരു മുതിർന്ന ഭാരവാഹിയെ ഉദ്ധരിച്ച് ദി ഇന്ത്യൻ എക്സ്പ്രസ് റിപ്പോർട്ട് ചെയ്യുന്നു.

ബിജെപിയുടെ കടുത്ത വിമർശകനാണ് വിജയ്. നോട്ടുനിരോധനത്തെയും ജിഎസ്ടിയെയും ശക്തമായി വിമർശിച്ച് വിജയ് നേരത്തെ രംഗത്തു വന്നിട്ടുണ്ട്. ഇതിനു പിന്നാലെ ഇൻകംടാക്സ് റെയ്ഡുകളും അദ്ദേഹത്തെ ലക്ഷ്യമാക്കി നടക്കുകയുണ്ടായി. ഡിഎംകെയെയും എഐഎഡിഎംകെയെയും അദ്ദേഹം വിമർശിക്കാറുണ്ട്. കോൺഗ്രസ്സിനോട് അദ്ദേഹത്തിന് ചായ്‌വുള്ളതായാണ് റിപ്പോർട്ടുകൾ സൂചിപ്പിക്കുന്നത്. എന്നാൽ പുതിയൊരു പാർട്ടി രൂപീകരിക്കുകയായിരിക്കും വിജയ്‌ക്ക് സുരക്ഷിതമായ മാർഗ്ഗം.

2018ലും വിജയ് സമാനമായ രീതിയിൽ രാഷ്ട്രീയ പ്രവേശന സൂചന നൽകിയിരുന്നു. താൻ മുഖ്യമന്ത്രിയായാൽ സമൂഹത്തിൽ പടർന്നുകയറിയ അഴിമതിയെ പൂർണ്ണമായും തുടച്ചുനീക്കുമെന്ന് അദ്ദേഹം പ്രഖ്യാപിക്കുകയുണ്ടായി. സര്‍ക്കാർ എന്ന സിനിമയുടെ ഓഡിയോ ലോഞ്ച് സമയത്തായിരുന്നു ഈ പ്രസ്താവന. 2018ലെ പ്രസ്താവനെ അപേക്ഷിച്ച് എത്രയോ ചെറിയൊരു സൂചനമാത്രമാണ് ഇപ്പോൾ വിജയ് തന്റെ പ്രസംഗത്തിൽ നല്‍കിയിരിക്കുന്നതെന്ന് പറയാവുന്നതാണ്.

തനിക്ക് തമിഴ്നാട് രാഷ്ട്രീയത്തിൽ ഒരിടമുണ്ടെന്ന് വിജയ് ഉറച്ചു വിശ്വസിക്കുന്നതായി അദ്ദേഹത്തിന്റെ ചില അടുത്ത സുഹൃത്തുക്കളെ ഉദ്ധരിച്ച് റിപ്പോർട്ടുകൾ വരുന്നുണ്ട്. വിജയകാന്ത്, രജിനികാന്ത് എന്നിവർ രാഷ്ട്രീയത്തിൽ നിന്ന് പിൻവാങ്ങുകയും, കമൽ ഹാസന്റെ രാഷ്ട്രീപാർട്ടി ഏതാണ്ട് അപ്രസക്തമാകുകയും ചെയ്ത സാഹചര്യമുണ്ട്. രജിനിയുടെയും കമൽ ഹാസന്റെയും രാഷ്ട്രീയ പ്രവേശനം നൽകിയ പാഠങ്ങളും വിജയ്‌യുടെ മുന്നിലുണ്ട്.