ഇന്ത്യയിൽ ടെസ്‌ല ഫാക്ടറി വരുമോ? യുഎസ്സിൽ മോദി-എലൺ മസ്ക് കൂടിക്കാഴ്ച നടന്നേക്കും

ടെസ്‌ല കാറുകൾ നിലവിൽ ഇന്ത്യയിലൊരാൾക്ക് സ്വന്തമാക്കണമെങ്കിൽ ഉയർന്ന ഇറക്കുമതി തീരുവ നൽകേണ്ടതുണ്ട്. ഇത് കഴിഞ്ഞ ബജറ്റിൽ വൻതോതിൽ ഉയർത്തുകയുമുണ്ടായി. 60 ശതമാനമായിരുന്ന ഇറക്കുമതി തീരുവ ഇപ്പോൾ 70 ശതമാനത്തിലേക്ക് ഉയർന്നിരിക്കുകയാണ്. ഇത് രാജ്യത്തെ വാഹനപ്രേമികളെ വളരെ നിരാശയിലാക്കിയിരുന്നു.

എന്നാൽ ഇന്ത്യാ ഗവൺമെന്റിന്റെ കാഴ്ചപ്പാട് മറ്റൊന്നാണ്. ഇറക്കുമതിയെ പരമാവധി നിരുത്സാഹപ്പെടുത്തുക എന്നതാണ് നയം. ഇതിന്റെ ലക്ഷ്യം ഇറക്കുമതി കുറയ്ക്കുക എന്നതല്ല, ഇന്ത്യൻ വിപണിയിലേക്ക് കാർ കമ്പനികൾ നേരിട്ട് പ്രവേശിക്കുന്നതിനെ പ്രോത്സാഹിപ്പിക്കുക എന്നതാണ്. മിക്ക ആഡംബര ബ്രാൻഡുകളും ഇന്ത്യയിലുണ്ടെങ്കിലും അവയുടെ പല വാഹനങ്ങളും ഇന്ത്യയിൽ നിർമ്മിക്കുന്നില്ല. ഒന്നുകിൽ പൂർണമായോ, അല്ലെങ്കിൽ ഘടകഭാഗങ്ങളായോ കാറുകൾ ഇന്ത്യയിലേക്ക് ഇറക്കുമതി ചെയ്യുകയാണ് അവർ. ഘടകഭാഗങ്ങളായി ഇറക്കുമതി ചെയ്യുന്നത് തീരുവയിൽ കാര്യമായ കുറവ് വരുത്തുമെങ്കിലും ഒരു ഉപഭോക്താവിനെ സംബന്ധിച്ച് അതും നഷ്ടം തന്നെയാണ്.

ജൂൺ 21നാണ് പ്രധാനമന്ത്രി യുഎസ്സിലെത്തുക. പ്ര‍സിഡണ്ട് ജോ ബൈഡനുമായി കൂടിക്കാഴ്ചയാണ് പ്രധാന അജണ്ട.