റഷ്യയിൽ നിന്നും 30 ലക്ഷം ഡോസ് സ്പുട്‌നിക് വാക്സിൻ രാജ്യത്തെത്തി; ഏറ്റവും വലിയ വാക്‌സിന്‍ ഇറക്കുമതി

ഹൈദരാബാദ്: റഷ്യൻ നിർമ്മിത കൊവിഡ് വാക്സിനായ സ്പുട്നികിന്‍റെ മൂന്നാമത്തെ ബാച്ച് ഇന്ത്യയിലെത്തി. 30 ലക്ഷം ഡോസ് വാക്സിനാണ് ഹൈദരാബാദിലെത്തിയിരിക്കുന്നത്. രാജ്യത്തെ ഏറ്റവും വലിയ കൊവിഡ് വാക്സിൻ ഇറക്കുമതിയണ് ഇത്. ഏകദേശം 56.6 ടണ്ണോളം വരുന്ന ലോഡാണ് ഹൈദരാബാദിലെത്തിയതെന്ന് ഇംഗ്ലീഷ് വാർത്താ ചാനലായ എൻഡിടിവി റിപ്പോർട്ട് ചെയ്തു.

പ്രത്യേക ചാര്‍ട്ടേഡ് വിമാനത്തിലാണ് വാക്‌സിന്‍ എത്തിച്ചത്. ഇന്ന് പുലര്‍ച്ചെ 3.43 ഓടെ ഹൈദരാബാദ് വിമാനത്താവളത്തിലാണ് വാക്സിൻ എത്തിയത്. സ്പുട്നിക് വാക്സിന്‍റെ സംഭരണം പ്രത്യേക രീതിയിലാണ് നടത്തുന്നത്. 20 ഡിഗ്രി സെല്‍ഷ്യസിലാണ് വാക്‌സിന്‍ സൂക്ഷിക്കുകയെന്നാണ് ജിഎംആർ ഹൈദരാബാദ് എയർ കാർഗോയുടെ പ്രസ്താവനയിൽ പറയുന്നത്. നിലവില്‍ രാജ്യത്തേക്കുള്ള വാക്‌സിന്‍ ഇറക്കുമതിയുടെ ഒരു ഹബ്ബായി മാറിയിരിക്കുകയാണ് ഹൈദരാബാദ്.

Also Read : ഇനി മദ്യം വീട്ടിലെത്തിച്ച് നൽകും; സുപ്രധാന തീരുമാനവുമായി ഡൽഹി സർക്കാർ



വാക്‌സിനുകളുടെ ഇറക്കുമതിയും കയറ്റുമതിയും സംബന്ധിച്ച് പ്രവർത്തനങ്ങൾ സുഗമമായി നടത്തുന്നതിന് ആവശ്യമായ എല്ലാ സൗകര്യങ്ങളും സജ്ജമാക്കിയിട്ടുണ്ടെന്ന് ഹൈദരാബാദ് വിമാനത്താവള അധികൃതര്‍ പറഞ്ഞു. ഇന്ത്യയിൽ ഉപയോഗ അനുമതി ലഭിച്ച മൂന്നാമത്തെ കൊവിഡ് വാക്സിനാണ് സ്പുട്നിക് V. സെറം ഇന്‍സ്റ്റിറ്റ്യൂട്ടിന്‍റെ കൊവിഷീല്‍ഡിനും ഭാരത് ബയോടെകിന്‍റെ കൊവാക്‌സിനും പിന്നാലെയാണ് സ്പുട്നിക്കിന് അനുമതി ലഭിക്കുന്നത്.

ലോകത്തു തന്നെ ഒരു സര്‍ക്കാര്‍ ആദ്യമായി അനുമതി നല്‍കിയ കൊവിഡ്- 19 പ്രതിരോധ വാക്സിനാണ് റഷ്യയുടെ സ്പുട്നിക്. മൂന്നാം ഘട്ട ക്ലിനിക്കൽ പരീക്ഷണം കഴിയുന്നതിനു മുൻപായിരുന്നു റഷ്യൻ സര്‍ക്കാര്‍ വാക്സിന് അനുമതി നല്‍കിയത്. എന്നാൽ പിന്നീട് നടന്ന വിശദമായ ക്ലിനിക്കൽ പരീക്ഷണത്തിൽ വാക്സിന് 97 ശതമാനത്തോളം ഫലപ്രാപ്തിയുണ്ടെന്ന് കണ്ടെത്തിയിരുന്നു.