മസ്തിഷ്കമരണ സ്ഥിരീകരണ സർട്ടിഫിക്കറ്റ് കെ-സോട്ടോ പരിശോധിക്കാറുണ്ടോ? നിർണ്ണായക സൂചനകളുമായി ലിവർ ഫൗണ്ടേഷൻ: എക്സിക്യുട്ടീവ് ഡയറക്ടറെ മാറ്റിനിർത്തി അന്വേഷണം വേണമെന്ന് മുഖ്യമന്ത്രിക്ക് നിവേദനം

“അവയവദാനത്തെ കൂടുതൽ സുതാര്യമാക്കാൻ നിയമംമൂലമുണ്ടാക്കിയ സർക്കാർ സ്ഥാപനമാണ് കെ-സോട്ടോ. സ്ഥാപനത്തിന്റെ സൽപ്പേര് നിലനിർത്തേണ്ടതും, സ്ഥാപനത്തെ സംശായാതീതമായി നിലനിർത്തേണ്ടതും പൊതുജനത്തിന്റെ ആവശ്യമാണ്. ഈ സാഹചര്യത്തിൽ കെ-സോട്ടോയുടെ എക്സിക്യുട്ടീവ് ഡയറക്ടറെ മാറ്റിനിർത്തി ഒരു അന്വേഷണ കമ്മീഷന് രൂപംനൽകി കേരളത്തിൽ കഴിഞ്ഞ മൂന്ന് വർഷക്കാലത്ത് നടന്നിട്ടുള്ള മസ്തിഷ്ക മരണങ്ങൾ നിഷ്പക്ഷമായി അന്വേഷിച്ച്, സുതാര്യമായാണ് മസ്തിഷ്ക മരണ സ്ഥിരീകരണവും അവയവദാനവും നടക്കുന്നതെന്ന് പൊതുജനങ്ങളെ ബോധ്യപ്പെടുത്തണം,” ലിവർ ഫൗണ്ടേഷൻ മുഖ്യമന്ത്രിക്ക് നൽകിയ നിവേദനത്തിൽ പറയുന്നു.

കെ-സോട്ടോയ്ക്കെതിരെ പല വാർത്താ മാധ്യമങ്ങളും ആരോപണങ്ങളുന്നയിച്ചത് നിവേദനത്തിൽ ചൂണ്ടിക്കാട്ടുന്നു. മസ്തിഷ്കമരണ സ്ഥിരീകരണ സർട്ടിഫിക്കറ്റ് സംസ്ഥാനത്തെ അവയവദാന ഏജൻസി പരിശോധിക്കാറുണ്ടോയെന്ന് അന്വേഷണം നടത്തണം. അവയവദാനം നടത്തുന്നത് ഒരു കേന്ദ്രീകൃത സംവിധാനത്തിന്റെ കീഴിൽ കൊണ്ടുവരണമെന്നും സംഘടന ആവശ്യപ്പെടുന്നു. ഇതുവഴി അവയവദാനത്തിൽ നിഷ്പക്ഷത കൊണ്ടുവരാൻ സാധിക്കും.

സർക്കാരിന്റെ മൃതസഞ്ജീവനിയുടെ പ്രവർത്തനം കാര്യക്ഷമമാക്കണമെന്നും നിവേദനം ആവശ്യപ്പെടുന്നുണ്ട്. ഇതിനായി കാര്യക്ഷമതയുള്ള ഉദ്യോഗസ്ഥരെ നിയമിക്കണം. മസ്തിഷ്കമരണവും അവയവദാനവും സംബന്ധിച്ച പരാതികൾ മൃതസഞ്ജീവനി ഓഫീസ് ലാഘവത്തോടെയാണ് കൈകാര്യം ചെയ്യുന്നതെന്ന ഗുരുതരമായ ആരോപണവും ലിവർ ഫൗണ്ടേഷൻ ഓഫ് കേരള ഉന്നയിച്ചു.

അവയവദാന പ്രക്രിയ ഒട്ടും സുതാര്യമല്ലാത്തതിന്റെ പ്രശ്നവും ലിവർ ഫൗണ്ടേഷൻ ചൂണ്ടിക്കാട്ടുന്നു. അവയവദാന പ്രക്രിയയും അവയവങ്ങളുടെ വിതരണവും അവയുടെ ഡാറ്റയുമെല്ലാം സുതാര്യമാക്കണം. അവയവം സ്വീകരിച്ചവരുടെ ആരോഗ്യവിവരവും പരസ്യമാക്കണം. പൊതുജനങ്ങളിൽ അവയവദാനത്തോട് സ്വീകാര്യത വളർത്താൻ ഇതുപകരിക്കുമെന്നും നിവേദനം പറയുന്നു.