സംസ്ഥാനത്ത് സൗജന്യ യോഗാ ക്ലാസുകൾ ഈ സംരംഭത്തിന്റെ ഭാഗമായി നടക്കും. എന്നാൽ പ്രഖ്യാപിച്ച പോലുള്ള ക്ലാസുകളൊന്നും സംസ്ഥാനത്തെവിടെയും നടക്കുന്നില്ലെന്ന് ബിജെപി വക്താവ് അനിൽ സരിൻ ആരോപിക്കുന്നു. സ്വന്തം കാബിനറ്റ് തീരുമാനം പോലും നടപ്പാക്കാൻ മുഖ്യമന്ത്രിക്ക് കഴിയുന്നില്ലെന്ന് അദ്ദേഹം പറഞ്ഞു.
യോഗാദിനത്തെ മാത്രമല്ല, ബിജെപിയുടെ ഗോസംരക്ഷണ ആശയത്തെയും സ്വാംശീകരിക്കാൻ പഞ്ചാബിലെ എഎപി സർക്കാരിന് പരിപാടിയുണ്ടെന്നാണ് ബിജെപി കരുതുന്നത്. ബിജെപിയുടെ ആശങ്ക വർദ്ധിപ്പിച്ചു കൊണ്ട് സംസ്ഥാനത്തെമ്പാടും ഗോവധ നിരോധന റെയ്ഡുകളും നടക്കുന്നുണ്ട്. ഗോവധ നിരോധന നിയമം ലംഘിക്കുന്നവരെ പിടികൂടി കേസെടുക്കുകയാണ് സർക്കാർ.
കഴിഞ്ഞ ഞായറാഴ്ച സർക്കാർ 185 ഇടങ്ങളിൽ റെയ്ഡുകൾ സംഘടിപ്പിച്ചു. ഇതിനായി 900 പൊലീസുകാരടങ്ങുന്ന 132 സംഘങ്ങളെയാണ് നിയോഗിച്ചിരിക്കുന്നത്. നിരവധി പേരെ ഗോവധം നടത്തിയതിന് പിടികൂടിയിട്ടുണ്ട്. ജനുവരി 15ന് ഒരു ഗോവധ സംഭവം റിപ്പോർട്ട് ചെയ്യപ്പെട്ടിരുന്നു. ഇതിനു പിന്നാലെയാണ് റെയ്ഡുകളുണ്ടായത്.
അതെസമയം, പഞ്ചാബിൽ ഗോവധ നിരോധനം നിലവിലുണ്ടെങ്കിലും അതിന്റെ പേരിൽ ആരെയെങ്കിലും അറസ്റ്റ് ചെയ്യുന്നതും മറ്റും അപൂർവ്വമാണ്. രാജ്യത്തിന്റെ മറ്റിടങ്ങളിൽ ഉള്ളതുപോലത്തെ ഗോരക്ഷകരുടെ ആക്രമണങ്ങൾ അത്ര കാര്യമായി സംസ്ഥാനത്തുണ്ടാകാറില്ല. എന്നിരിക്കെ മൻ സർക്കാർ നടത്തിയ ഈ നീക്കം പലരിലും ആശ്ചര്യമുണ്ടാക്കിയിട്ടുണ്ട്.
ബിജെപിക്ക് കാര്യം മനസ്സിലായിട്ടുണ്ട്. തങ്ങളുടെ വോട്ടുകളെ ലക്ഷ്യമിട്ടാണ് എഎപി പ്രവർത്തിക്കുന്നതെന്ന് ബിജെപി സംഗ്രൂർ ജില്ലാ പ്രസിഡണ്ട് രൺദീപ് ദിയോൾ പറയുന്നു. “പൊലീസ് റെയ്ഡ് നടത്തിയത് മുമ്പ് സമാനമായ കേസിൽ പിടിയിലായവരുടെ സ്ഥലങ്ങളിലാണ്. അവർ നിലവിൽ അത്തരം പ്രവര്‍ത്തനം ചെയ്യുന്നതായി അറിവുണ്ടായിട്ടല്ല സർക്കാർ നീക്കം നടത്തുന്നത്. സർക്കാരിന് ഇത്തരം കാര്യങ്ങളിലുള്ള ആത്മാര്‍ത്ഥത എത്രത്തോളമുണ്ടെന്ന് ഇതിൽ നിന്നുതന്നെ അറിയാനാകും,” ദിയോൾ പറഞ്ഞു.
അതെസമയം സംസ്ഥാനത്ത് അലഞ്ഞുതിരിയുന്ന പശുക്കളുടെ എണ്ണം കൂടിവരികയാണ്. ഈ പ്രശ്നത്തിന് പരിഹാരം കാണണമെന്ന് കർഷകർ സർക്കാരിനോട് ആവശ്യപ്പെടുന്നുണ്ട്.
