വയനാട്ടിലും അട്ടപാടിയിലും മറ്റുമുള്ള ആദിവാസി ഊരുകളില്‍ വരനും വധുവിനും പ്രായപൂര്‍ത്തിയാകുന്നതിന് മുമ്പേ വിവാഹം കഴിപ്പിക്കുന്നത് അസാധാരണമായിരുന്നില്ല. പെണ്‍കുട്ടി ഗര്‍ഭിണിയായി ആശുപത്രിയില്‍ പ്രവേശിപ്പിക്കുമ്പോഴായിരിക്കും പ്രായം പ്രശ്‌നമാണെന്ന് കുടുംബങ്ങള്‍ തിരിച്ചറിയുന്നത്. പ്രായപൂര്‍ത്തിയാകാത്ത പെണ്‍കുട്ടിയായതിനാല്‍ ആശുപത്രികള്‍ പതിവ് നടപടി അനുസരിച്ച് പോലീസില്‍ അറിയിക്കുന്നതോടെ പോക്‌സോ കേസില്‍ പങ്കാളി അറസ്റ്റിലാകും. ഗോത്രമേഖലകളിലെ ഇത്തരം വിവാഹങ്ങളില്‍ പോക്‌സോ വേണോ എന്നു ചര്‍ച്ച ചെയ്തത് കേരളം മാത്രമല്ല. ഉഭയസമ്മതത്തോടെയുള്ള ലൈംഗികബന്ധത്തിന്റെ പ്രായം പുനര്‍നിശ്ചയിക്കണമെന്ന് ഇത്തരം ചര്‍ച്ചകളില്‍ ആവശ്യം ഉയര്‍ന്നിരുന്നു.
പരസ്പര സമ്മതത്തോടെയുള്ള ലൈംഗിക ബന്ധത്തിനുള്ള പ്രായപരിധി പരിശോധിക്കണമെന്ന് വനിതാ ശിശുവികസന മന്ത്രാലയത്തോട് ഇരുപത്തിരണ്ടാം നിയമ കമ്മിഷന്‍ ആവശ്യപ്പെട്ടതോടെ വീണ്ടും വിഷയം പൊതുജനശ്രദ്ധയാകര്‍ഷിച്ചു. വീണ്ടും ചര്‍ച്ചകള്‍ തുടങ്ങി. ലൈംഗിക ബന്ധത്തില്‍ ഉഭയസമ്മതം അത്യാവശ്യമാണെന്ന് എല്ലാവര്‍ക്കുമറിയാം. 18 വയസ്സ് പൂര്‍ത്തിയാകാത്തവരുടെ കാര്യത്തില്‍ പരസ്പര സമ്മതത്തോടെയാണെങ്കില്‍ പോലും പോക്‌സോ കേസ് രജിസ്റ്റര്‍ ചെയ്യാം. കുട്ടികള്‍ക്ക് നേരെയുള്ള പീഡനത്തിന് തടയിടുക, കുറ്റവാളികള്‍ക്ക് പരമാവധി ശിക്ഷ ഉറപ്പാക്കുക എന്ന ലക്ഷ്യത്തോടെയാണ് പോക്‌സോ നടപ്പാക്കുന്നത്. എന്നാല്‍ പോക്‌സോയിലെ കുട്ടികളുടെ പ്രായത്തിന്റെ നിര്‍വചനം പുനഃപരിശോധിക്കണമെന്ന് വിവിധ കോടതികള്‍ ഇതിന് മുമ്പും ആവശ്യപ്പെട്ടിട്ടുണ്ട്. പോക്‌സോയുടെ ഉദ്ദേശ്യം കുട്ടികള്‍ക്ക് നേരെയുള്ള ലൈംഗിക അതിക്രമങ്ങള്‍ തടയുകയാണെന്നും പ്രായപൂര്‍ത്തിയാകാത്ത ചെറുപ്പക്കാരുടെ പ്രണയബന്ധം ക്രിമിനല്‍ കുറ്റമാക്കുകയല്ലെന്നും കഴിഞ്ഞ ദിവസം ഡല്‍ഹി ഹൈക്കോടതി പറഞ്ഞു. 17 വയസ്സുള്ള പെണ്‍കുട്ടിയെ വിവാഹം കഴിച്ചതിന് അറസ്റ്റിലായ ആണ്‍കുട്ടിക്ക് ജാമ്യം അനുവദിച്ചു കൊണ്ടാണ് കോടതി വീണ്ടും നിയമ കമ്മിഷനോട് വിഷയം പരിശോധിക്കാന്‍ ആവശ്യപ്പെട്ടത്. ഗോത്രമേഖലയിലെ പ്രായപൂര്‍ത്തിയാകാത്തവരുടെ വിവാഹകേസുകള്‍ പരിഗണിച്ചുകൊണ്ട് മേഘാലായ ഹൈ കോടതിയും സമാന നിരീക്ഷണം നടത്തിയിരുന്നു. 2012-ലെ പോക്‌സോ നിയമത്തില്‍ ഇത്തരം സന്ദര്‍ഭങ്ങളില്‍ വ്യക്തത വരുത്തിയിരുന്നില്ല.
സമ്മതമാണെങ്കിലും
ഉഭയസമ്മതത്തോടെയുള്ള ലൈംഗിക ബന്ധത്തിനുള്ള പ്രായം പുനപ്പരിശോധിക്കണമെന്ന് കോടതികളും മനുഷ്യാവകാശ സംഘടനകളും മറ്റും ആവശ്യപ്പെടുന്നത് എന്തുകൊണ്ടായിരിക്കും? 16 വയസ്സ് പൂര്‍ത്തിയായ പെണ്‍കുട്ടി കമിതാവുമായി പൂര്‍ണ സമ്മതത്തോടെ ലൈംഗികബന്ധത്തിലേര്‍പ്പെട്ടത് പോക്‌സോയായി കോടതികള്‍ക്ക് മുന്നില്‍ നിരവധിയെത്താറുണ്ട്. ഇവിടെ ഇരുക്കൂട്ടരും പ്രണയത്തിലും പൂര്‍ണസമ്മതത്തോടെയാണ് ലൈംഗികബന്ധത്തിലേര്‍പ്പെട്ടതെങ്കിലും നിയമമനുസരിച്ച് കോടതിക്ക് പങ്കാളിയെ ശിക്ഷിക്കാതെ തരമില്ല. 18 വയസ്സ് പൂര്‍ത്തിയാകാത്തവര്‍ ലൈംഗികബന്ധത്തിന് സമ്മതം നല്‍കിയാലും നിയമപരമായി അത് സമ്മതമായി കണക്കാക്കില്ല എന്നതാണ് കാരണം. സഹപാഠികള്‍ തമ്മിലുള്ള പ്രണയബന്ധമായിരിക്കും ഒടുവില്‍ ഇത്തരത്തില്‍ പോക്‌സോയിലും മറ്റും കലാശിക്കുക. 16 വയസ്സിനും 18 വയസ്സിനുമിടയിലുള്ള പ്രണയബന്ധങ്ങളില്‍ നിയമത്തെ കുറിച്ച് അറിവില്ലായ്മയുമുണ്ട്. 18 വയസ്സിന് മുമ്പ് ഇരുവരും പരസ്പരസമ്മതത്തോടെ വിവാഹിതരായാല്‍ പോലും കേസ് രജിസ്റ്റര്‍ ചെയ്ത് പങ്കാളിയെ ശിക്ഷിക്കാം.
കഴിഞ്ഞ വര്‍ഷം കര്‍ണാടക ഹൈകോടതി ഇത്തരമൊരു കേസില്‍ ആണ്‍കുട്ടിയെ കുറ്റവിമുക്തനാക്കണമെന്ന് ആവശ്യപ്പെട്ട് സമര്‍പ്പിച്ച അപ്പീല്‍ തള്ളിയിരുന്നു. 2016-ലായിരുന്നു പെണ്‍കുട്ടിയുടെ കുടുംബം കമിതാവായ ആണ്‍കുട്ടിയുടെ പേരില്‍ കേസ് കൊടുക്കുന്നത്. 2017-ല്‍ ഇരുവരും വിവാഹിതരായെന്നും രണ്ടു കുട്ടികളുണ്ടെന്നതും പരിഗണിച്ച് ചെറുപ്പക്കാരനായ ആണ്‍കുട്ടിയെ കേസില്‍ നിന്ന് മോചിപ്പിക്കണമെന്നായിരുന്നു ആവശ്യം. പ്രായപൂര്‍ത്തിയാകാത്ത ചെറുപ്പക്കാര്‍ അറിവില്ലായ്മ കൊണ്ടായിരിക്കാം ഇങ്ങനെ പ്രവര്‍ത്തിച്ചതെന്നും പലപ്പോഴും പെണ്‍കുട്ടികളുടെ മാതാപിതാക്കള്‍ ബന്ധത്തില്‍ നിന്ന് അവരെ പിന്തിരിപ്പിക്കാനാണ് കേസ് നല്‍കാറുള്ളതെന്നും കോടതി നിരീക്ഷിച്ചു. മാത്രമല്ല, പോക്‌സോ പോലുള്ള നിയമങ്ങള്‍ ഒമ്പതാം ക്ലാസ് മുതലെങ്കിലും പാഠ്യവിഷയമാക്കി കുട്ടിക്കളെ പഠിപ്പിക്കണമെന്ന് കോടതി സംസ്ഥാന വിദ്യാഭ്യാസ വകുപ്പിനോട് ആവശ്യപ്പെടുകയും ചെയ്തു. ഇത്തരം സന്ദര്‍ഭങ്ങളിലാണ് ഉഭയകക്ഷി സമ്മതത്തിന്റെ പ്രായം പുനപരിശോധിക്കണമെന്ന് കോടതികള്‍ ആവശ്യപ്പെടുന്നത്.
വിഷയം കോടതി ഇരുപത്തിരണ്ടാം നിയമകമ്മിഷന്റെ ശ്രദ്ധയില്‍ കൊണ്ടുവരികയും കമ്മിഷന്‍ വനിതാ ശിശുവികസന മന്ത്രാലയത്തോട് അഭിപ്രായമാരായുകയും ചെയ്തു. മന്ത്രാലയം വിഷയത്തില്‍ പഠനം നടത്തി നിയമ കമ്മിഷനെ അറിയിക്കും. പോക്‌സോ നിയമത്തില്‍ ഭേദഗതി വരുത്തുന്ന കാര്യം പരിഗണിക്കണമെന്ന് നിയമ കമ്മിഷനോട് മധ്യപ്രദേശ് ഹൈക്കോടതിയും ആവശ്യപ്പെട്ടിരുന്നു. വിഷയത്തില്‍ പരിശോധന നടത്തണമെന്ന് കഴിഞ്ഞവര്‍ഷം സുപ്രീംകോടതി ചീഫ് ജസ്റ്റിസ് ഡി.വൈ. ചന്ദ്രചൂഡും പറഞ്ഞിരുന്നു.
പ്രായം മാറ്റണമോ?
ഉഭയസമ്മതത്തോടെയുള്ള ലൈംഗിക ബന്ധത്തിനുള്ള പ്രായത്തില്‍ 16-18 വയസ്സുവരെയുള്ളവര്‍ക്ക് പ്രത്യേക പരിഗണന നല്‍കണോ? പ്രത്യേകിച്ച് ഇരുവരും പരസ്പര സമ്മതത്തോടെയാണ് ലൈംഗികബന്ധത്തിലേര്‍പ്പെടുന്നത് എങ്കില്‍? ഇവിടെ പോക്‌സോ മാത്രമല്ല നിയമകമിഷന്റെയും വനിതാ ശിശുവികസന മന്ത്രാലയത്തിന്റെയും മുന്നിലുള്ള വിഷയം. ബാലവിവാഹ നിരോധന ഭേദഗതി നിയമവും സ്ത്രീ പീഡനവുമായി ബന്ധപ്പെട്ടിട്ടുള്ള നിയമങ്ങളും പരിഗണിച്ചേ പറ്റുകയുള്ളു. 18 വയസ്സു പൂര്‍ത്തിയാകാത്ത ചെറുപ്പക്കാര്‍ ലൈംഗിക ബന്ധത്തിലേര്‍പ്പെടുന്നതും വിവാഹിതരാകുന്നതും സര്‍വസാധാരണമല്ലെങ്കിലും അസാധാരാണമല്ല ഇന്ത്യയില്‍. എന്നാല്‍ 18 വയസ്സു പൂര്‍ത്തിയാകാത്ത പെണ്‍കുട്ടിയും 21 വയസ്സു പൂര്‍ത്തിയാകാത്ത ആണ്‍കുട്ടിയും തമ്മിലുള്ള വിവാഹം ഇന്ത്യയില്‍ നിരോധിച്ചിട്ടുള്ളതാണ്. 18 വയസ്സു പൂര്‍ത്തിയാകാത്ത പെണ്‍കുട്ടികളെ വിവാഹം കഴിപ്പിക്കുന്നതിന് നിരോധമുള്ളത് കൊണ്ടുതന്നെ 18 വയസ്സു പൂര്‍ത്തിയാകാത്ത പെണ്‍കുട്ടിയുമായി ലൈംഗിക ബന്ധത്തിലേര്‍പ്പെടുന്നതും നിയമ വിരുദ്ധമാണ്.
ഇവിടെ പ്രസക്തമായ ചോദ്യം വിവാഹമാണോ വ്യക്തികളുടെ ലൈംഗിക സ്വാതന്ത്ര്യം തീരുമാനിക്കുന്നത് എന്നാണ്. നിയമകമ്മിഷന്‍ 2000-ല്‍ ബലാത്സംഗ നിയമങ്ങള്‍ വിശകലനം ചെയ്ത് റിപ്പോര്‍ട്ട് തയ്യാറാക്കുന്നതില്‍ വിവാഹശേഷം ഭാര്യയുടെ സമ്മതമില്ലാതെയുള്ള ലൈംഗിക ബന്ധം ലൈംഗിക പീഡനമായി കണക്കാക്കണമെന്ന് ദേശീയ വനിതാ കമ്മിഷന്‍ ആവശ്യപ്പെട്ടിരുന്നു. ഇത് അംഗീകരിച്ചില്ലെങ്കിലും ഉഭയസമ്മതത്തോടെയുള്ളയുള്ള ലൈംഗിക ബന്ധത്തിനുള്ള പ്രായം 16 എന്ന് കണക്കാക്കണമെന്ന് നിയമകമ്മിഷന്‍ ശുപാര്‍ശ ചെയ്തിരുന്നു. എന്നാല്‍ ഇത് നിയമമായില്ല.
ഇന്ത്യയില്‍ ഉഭയസമ്മതത്തോടെയുള്ള ലൈംഗിക ബന്ധത്തിന്റെ പ്രായം കുറയ്ക്കണമെന്ന് വിഷയത്തില്‍ ചര്‍ച്ചകള്‍ നടക്കുമ്പോള്‍ കഴിഞ്ഞദിവസം ജപ്പാനില്‍ ഇതേ വിഷയത്തില്‍ പ്രായം കൂട്ടിയെന്നത് ശ്രദ്ധിക്കേണ്ട കാര്യമാണ്. ഉഭയ സമ്മതത്തോടെയുള്ള ലൈംഗിക ബന്ധത്തിന്റെ പ്രായം 13-ല്‍ നിന്ന് 16-ലേക്കാണ് ജപ്പാന്‍ ഉയര്‍ത്തിയത്. ഇന്ത്യയിലെ ആവശ്യം 18-ല്‍ നിന്ന് 16-ലേക്ക് കുറയ്ക്കണമെന്നും.
