വീട്ടില്‍ പെട്ടെന്ന് അതിഥികള്‍ വന്നാല്‍ അവരെ ഞെട്ടിക്കാന്‍ വരെ ഈ അവല്‍പുട്ടിന് സാധിക്കും. വളരെ എളുപ്പത്തില്‍ തയ്യാറാക്കി എടുക്കാവുന്നതും, നല്ല സോഫ്റ്റായി ഇരിക്കുന്നതുമാണ് ഈ പുട്ട്. ഇത് എങ്ങിനെ തയ്യാറാക്കി എടുക്കാം എന്ന് നോക്കാം.
കായലരികത്തിരുന്നു സ്വാദിഷ്ടമായ ഭക്ഷണം കഴിക്കാൻ പോകാം
പുട്ട്
മലയാളികള്‍ക്ക് പ്രിയപ്പെട്ട ഭക്ഷണങ്ങളില്‍ ഒന്നാണ് പുട്ട്. നല്ല സോഫ്റ്റ് പുട്ടും ബീഫും, നല്ല മീര്‍ കറിയും, അതുപോലെ തന്നെ നല്ല പഴവും പപ്പടവുമെല്ലാം ചേര്‍ത്ത് നമ്മള്‍ പുട്ട് തയ്യാറാക്കി കഴിക്കുന്നുണ്ട്. മുളയില്‍ ചുട്ട് എടുക്കുന്നതും ചിരട്ടപുട്ടും പലര്‍ക്കും പ്രിയം തന്നെ.
കേരളത്തിന്റെ ചില ഭാഗത്ത് പോയാല്‍ പുട്ടും കുറുമയും അതുപോലെ, പുട്ടും പരിപ്പും വരെ ഇഷ്ടപ്പെടുന്നവരെ നമ്മള്‍ക്ക് കാണാന്‍ സാധിക്കും. അത്രയ്ക്കും വൈവിധ്യമാണ് നമ്മള്‍ മലയാളികള്‍ പുട്ടില്‍ തീര്‍്ത്തിരിക്കുന്നത്.
അവല്‍ പുട്ട് തയ്യാറാക്കാം
ഇത് തയ്യാറാക്കാന്‍ നല്ല മട്ട അരിയുടെ അവല്‍ എടുക്കണം. അതുപോലെ തേങ്ങ നല്ലപോലെ ചിരകി വെക്കുക. ആദ്യം തന്നെ അവല്‍ എടുത്ത് ഒരു ചട്ടിയില്‍ ഇട്ട് ഒന്ന് വറുത്ത് എടുക്കണം. അതിന് ശേഷം മിക്‌സിയില്‍ ഇട്ട് ഒന്ന് പൊടിച്ച് എടുക്കുക. നന്നായി പൊടിപോലെ അകരുത്. കുറച്ച് തരിതരിയാകാം. ഇത് പാത്രത്തില്‍ ഇട്ട് സാധാ പുട്ട് തയ്യാറാക്കുന്നത് പോലെ ഉപ്പും ചേര്‍ത്ത് വെള്ളം ഒഴിച്ച് നനച്ചെടുക്കുക. ഇതിലേയ്ക്ക് കുറച്ച് തേങ്ങയും ചേര്‍ത്താല്‍ സ്വാദ് കൂടും
പിന്നീട് പുട്ടുകുറ്റി എടുത്ത് സാധാ പുട്ട് തയ്യാറാക്കുന്നത് പോലെ തന്നെ തേങ്ങയും പൊടിയും ചേര്‍ത്ത് ആവിയില്‍ വേവിച്ച് എടുക്കുക. ഇത് പഴത്തിന്റെ കൂടെ ആയാലും അതുപോലെ തന്നെ കറികളുടെ കൂടെ ആയാലും കഴിക്കാന്‍ വളരെ സ്വാദാണ്.
ശ്രദ്ധിക്കേണ്ടത്
ഇത് തയ്യാറാക്കി എടുക്കാന്‍ അത്യാവശ്യം കട്ടി ഉള്ള അവല്‍ എടുത്താല്‍ അത്രയ്ക്കും നല്ലതാണ്. ഇതിലേയ്ക്ക് ചൂടുവെള്ളം നനയ്ക്കാനായി നിങ്ങള്‍ തിരഞ്ഞെടുക്കരുത്. സാധാ വെള്ളം മാത്രം ഉപയോഗിച്ചാല്‍ മതിയാകും. അതുപോലെ, പാല്‍ എന്നിവയൊന്നും ചേര്‍ക്കരുത്. അവല്‍ ആയതുകൊണ്ട് വേഗത്തില്‍ നനവ് വലിച്ചെടുക്കും. അതിനാല്‍ വെള്ളം ഒഴിക്കുമ്പോള്‍ ശ്രദ്ധിച്ച് ഒഴിക്കുക.
അതുപോലെ മാവ് നനയ്ക്കുമ്പോള്‍ അമിതമായി നാളികേരം ചേര്‍ക്കരുത്. അമിതമായി നാളികേരം ചേര്‍ക്കുന്നതും നനവ് കൂടാന്‍ കാരണമാണ്. പുട്ടുകുറ്റിയില്‍ ഇടുമ്പോള്‍ നന്നായി അമക്കി കൊടുക്കരുത്. ഇതും പുട്ട് നന്നായി കിട്ടാതിരിക്കാന്‍ കാരണമാകുന്നു.
നല്ല തേങ്ങാപ്പാലില്‍ മുക്കി കഴിക്കാവുന്ന ഒരു മിനിറ്റ് അപ്പം തയ്യാറാക്കിയാലോ!
ഗുണം
ഇത് തയ്യാറാക്കി എടുക്കാന്‍ വളരെ എളുപ്പമാണ് എന്നതാണ് ഇതിന്റെ പ്രധാന ഗുണം. അതുപോലെ, മട്ടയരി അവല്‍ ആയതിനാല്‍ ആരോഗ്യ ഗുണവും കൂടുതലായിരിക്കും. നമ്മള്‍ വറുത്ത് പൊടിച്ച് ഉണ്ടാക്കുന്നതിനാല്‍ തന്നെ ഇതിന് പച്ചകുത്ത് ഉണ്ടാവുകയും ഇല്ല.
