Sumayya P | Samayam Malayalam | Updated: 21 Jun 2023, 10:51 am
ചൈനയുടെ സിനോപെക് കമ്പനിയുമായി കഴിഞ്ഞ നവംബറില്‍ ഒപ്പുവച്ച കരാറിനു ശേഷം ഖത്തര്‍ ഒപ്പിടുന്ന ഏറ്റവും കാലദൈര്‍ഘ്യമേറിയ കരാറാണിത്.
ഹൈലൈറ്റ്:
- എല്‍എന്‍ജി ഉല്‍പ്പാദനം 60 ശതമാനം വര്‍ധിപ്പിച്ച് 2027 ഓടെ പ്രതിവര്‍ഷം 126 ദശലക്ഷം ടണ്ണായി ഉയര്‍ത്തുക
- ഖത്തര്‍ ചൈനയ്ക്ക് പ്രതിവര്‍ഷം നാല് ദശലക്ഷം ടണ്‍ പ്രകൃതി വാതകം നല്‍കും
ചൈന, ജപ്പാന്‍, ദക്ഷിണ കൊറിയ തുടങ്ങിയ ഏഷ്യന്‍ രാജ്യങ്ങളാണ് ഖത്തറില്‍ നിന്നുള്ള പ്രകൃതി വാതകത്തിന്റെ പ്രധാന വിപണി. കഴിഞ്ഞ വര്‍ഷം ആദ്യം റഷ്യയുടെ ഉക്രെയ്ന്‍ അധിനിവേശത്തിനു ശേഷം യൂറോപ്യന്‍ രാജ്യങ്ങള്‍ ഖത്തറില്‍ നിന്നുള്ള വാതകത്തിനായി കൂടുതല്‍ ആവശ്യം ഉന്നയിച്ചുകൊണ്ടിരിക്കുന്ന സമയത്താണ് ചൈനീസ് കമ്പനിയുമായി പുതിയ കരാറില്‍ ഒപ്പുവച്ചിരിക്കുന്നത് എന്നത് ശ്രദ്ധേയമാണ്. അതേസമയം, ഇരു രാജ്യങ്ങളും തമ്മിലുള്ള കരാറിന്റെ മൂല്യം പ്രഖ്യാപിച്ചിട്ടില്ല.
ഭാരതപ്പുഴയോരത്ത് ടൗൺ പാർക്ക് വരുന്നു | bharathapuzha
Also Read: ജൂണ്‍ 20 മുതല്‍ ജൂലൈ മൂന്നാം തിയതി വരെ ദുബായ് വിമാനത്താവളം വഴി യാത്ര ചെയ്യുന്നവര്‍ക്ക് പ്രത്യേക മുന്നറിയിപ്പ്; നിര്‍ദേശങ്ങള്‍ ഇങ്ങനെ
27 വര്‍ഷത്തിനുള്ളില്‍ നോര്‍ത്ത് ഫീല്‍ഡ് ഈസ്റ്റ് എക്‌സ്പാന്‍ഷന്‍ പ്രോജക്ടില്‍ നിന്ന് ഖത്തര്‍ ചൈനയ്ക്ക് പ്രതിവര്‍ഷം നാല് ദശലക്ഷം ടണ്‍ പ്രകൃതി വാതകം നല്‍കുമെന്ന് ഖത്തര്‍ ഊര്‍ജ മന്ത്രി സാദ് ഷെരീദ അല്‍ കഅബി പറഞ്ഞു. കരാര്‍ ഒപ്പുവയ്ക്കുന്ന ചടങ്ങില്‍ സംസാരിക്കുകയായിരുന്നു അദ്ദേഹം. ഈ ഗ്യാസ് ഫീല്‍ഡില്‍ നിന്ന് ചൈനയിലേക്കുള്ള രണ്ടാമത്തെ എല്‍എന്‍ജി (ദ്രവീകൃത പ്രകൃതിവാതകം) വിതരണ കരാറാണിത്. ലോകത്തിലെ ഏറ്റവും വലിയ പ്രകൃതിവാതക ശേഖരമുള്ളതും ഇറാനിയന്‍ പ്രദേശത്തേക്ക് വ്യാപിക്കുന്നതുമായ നോര്‍ത്ത് ഫീല്‍ഡിലെ പ്രവര്‍ത്തനങ്ങള്‍ വിപുലീകരിക്കുന്നതിലൂടെ, ഖത്തര്‍ അതിന്റെ എല്‍എന്‍ജി ഉല്‍പ്പാദനം 60 ശതമാനം വര്‍ധിപ്പിച്ച് 2027 ഓടെ പ്രതിവര്‍ഷം 126 ദശലക്ഷം ടണ്ണായി ഉയര്‍ത്തുകയാണെന്നും അദ്ദേഹം അറിയിച്ചു.
അടുത്ത മൂന്ന് പതിറ്റാണ്ടിനുള്ളില്‍ ഇരു രാജ്യങ്ങളും തമ്മിലുള്ള ഊര്‍ജ സഹകരണത്തിന് ഈ കരാര്‍ ശക്തമായ അടിത്തറയിടുന്നതായി സിഎന്‍പിസി ചെയര്‍മാന്‍ ഡായ് ഹൂലിയാങ് പ്രസ്താവനയില്‍ പറഞ്ഞു. ഹൈഡ്രോകാര്‍ബണ്‍ വ്യവസായ ശൃംഖലയിലും ഗ്രീന്‍, ലോ കാര്‍ബണ്‍ എനര്‍ജി പോലുള്ള മറ്റ് മേഖലകളിലും ഖത്തര്‍ എനര്‍ജിയുമായി സര്‍വതല സഹകരണം സംബന്ധിച്ച് സിഎന്‍പിസി സജീവമായി ചര്‍ച്ച ചെയ്യുന്നത് തുടരുമെന്നും അദ്ദേഹം കൂട്ടിച്ചേര്‍ത്തു.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
