ഫാം ഉടമ അഞ്ച് കുട്ടികളെ കെട്ടിയിട്ട് തല്ലി, ഷോക്കടിപ്പിച്ചു; ക്രൂരത മൊബൈൽ മോഷ്ടിച്ചെന്നാരോപിച്ച്

ലഖ്‌നൗ: മൊബൈല്‍ ഫോണ്‍ മോഷ്ടിച്ചെന്നാരോപിച്ച് കൂട്ടികളെ ക്രൂരമായി മർദ്ദിച്ച് ഫാം ഉടമ. ഉത്തർപ്രദേശിലെ ബറേലി ജില്ലയിലാണ് സംഭവം. അഞ്ച് കുട്ടികളെ മണിക്കൂറുകളോളം കെട്ടിയിട്ട് തല്ലിയ ഇയാൾ ഇവരെ ഷോക്കടിപ്പിച്ചെന്നും പരാതിയിലുണ്ട്. കുട്ടികളെ രക്ഷിച്ച പോലീസ് ഡയറി ഫാം ഉടമ അവ്‌നേഷ് കുമാര്‍ യാദവിനെതിരെ കേസെടുക്കുകയും ചെയ്തു.



ഗംഗാപുർ ഏരിയയിലെ ബർദാരി പോലീസ് സ്റ്റേഷൻ പരിധിയിലാണ് അവ്നേഷിന്‍റെ ഫാം പ്രവർത്തിക്കുന്നത്. അടുത്തിടെ 30,000 രൂപ വിലമതിയ്ക്കുന്ന ഇയാളുടെ ഫോൺ മോഷണം പോയിരുന്നു. സമീപത്ത് താമസിക്കുന്ന കുട്ടികൾ ഫോൺ മോഷ്ടിച്ചതാണെന്ന് സംശയിച്ചാണ് ഇയാൾ കുട്ടികളെ ഉപദ്രവിച്ചതെന്നാണ് പോലീസ് പറയുന്നത്.

Also Read : ലോക്ക്ഡൗണിൽ കടം 1.5 കോടി; വൃക്ക വിൽക്കാൻ ശ്രമിച്ച ദമ്പതികളെ തട്ടിച്ച് കവര്‍ന്നത് 40 ലക്ഷം രൂപ

ബുധനാഴ്ച അഞ്ച് കുട്ടികളെയും അവരുടെ വീടുകളിൽ നിന്ന് കൂട്ടിക്കൊണ്ട് പോയാണ് ഇയാൾ ഉപദ്രവിച്ചത്. അഞ്ച് പേരെയും കെട്ടിയിട്ട് മർദ്ദിച്ച ഇയാൾ മറ്റു ചിലരുടെ സഹായത്തോടെ ഇവരെ ഷോക്കടിപ്പിക്കുകയും ചെയ്തു. ഇതേസമയം കുട്ടികളുടെ രക്ഷിതാക്കൾ പോലീസിൽ വിവരമറിയിച്ച് ഫാമിലെത്തുകയായിരുന്നു.

Also Read : എഎസ്ഐ അശ്ലീല വീഡിയോ അയക്കുന്നു; മുഖ്യമന്ത്രിക്ക് പരാതി നൽകി വീട്ടമ്മ



പോലീസ് സ്ഥലത്തെത്തിയപ്പോൾ അവശരായ നിലയിലാണ് കുട്ടികളെ കണ്ടെത്തിയത്. അഞ്ചു പേരെയും പ്രാഥമിക ശുശ്രൂഷയ്ക്കായി പോലീസ് ജില്ലാ ആശുപത്രിയിലേക്ക് മാറ്റുകയും ചെയ്തു. തങ്ങളെ ഫാമിൽ തടവിലിടുകയായിരുന്നെന്നും വെള്ളം പോലും നൽകിയില്ലെന്നും കുട്ടികളിലൊരാൾ പോലീസിനോട് പറഞ്ഞു. പരാതിയുടെ അടിസ്ഥാനത്തിൽ ഫാം ഉടമയ്ക്കും കുട്ടികളെ ഉപദ്രവിച്ച മറ്റുചിലർക്കുമെതിരെയും കേസ് രജിസ്റ്റർ ചെയ്തിട്ടുണ്ട്.