പാസ്പോര്‍ട്ടുകളിലെ കൃത്രിമങ്ങള്‍ കണ്ടെത്താന്‍ അത്യാധുനിക സംവിധാനങ്ങള്‍ ഒരുക്കിയതായും ജവാസാത്ത് അറിയിച്ചു. വിമാനത്താവളങ്ങളും തുറമുഖങ്ങളും കര അതിര്‍ത്തികളിലെ ചെക്ക് പോസ്റ്റുകളും അടക്കം മുഴുവന്‍ പ്രവേശന കവാടങ്ങളിലും വ്യാജ രേഖകള്‍ കണ്ടെത്താന്‍ ഓട്ടോമാറ്റിക് സംവിധാനങ്ങള്‍ ഏര്‍പ്പെടുത്തിയിട്ടുണ്ട്. വ്യത്യസ്ത ഭാഷകളില്‍ സംസാരിക്കാന്‍ പരിശീലനം സിദ്ധിച്ച ജവാസാത്ത് ഉദ്യോഗസ്ഥര്‍ ഇവിടങ്ങളില്‍ സേവനമനുഷ്ഠിക്കുന്നുണ്ടെന്നും അധികൃതര്‍ വ്യക്തമാക്കി.
54 വര്‍ഷത്തിനിടെ 9.9 കോടി പേര്‍ ഹജ്ജിനെത്തി
54 വര്‍ഷത്തിനിടെ 9.9 കോടിയിലേറെ പേര്‍ ഹജ്ജ് കര്‍മം നിര്‍വഹിച്ചതായി ജനറല്‍ അതോറിറ്റി ഫോര്‍ സ്റ്റാറ്റിസ്റ്റിക്സ് അറിയിച്ചു. ഹജ്ജ് തീര്‍ഥാടകരുമായി ബന്ധപ്പെട്ട സ്ഥിതിവിവര കണക്കുകള്‍ ശേഖരിക്കാന്‍ തുടങ്ങിയ ഹിജ്റ 1390 മുതലുള്ള കണക്കാണിത്. അതിനു ശേഷം കഴിഞ്ഞ വര്‍ഷം (ഹിജ്റ 1443) വരെയുള്ള 54 ആ വര്‍ഷത്തിനിടയില്‍ 9.9 കോടിയിലേറെ പേര്‍ ഹജ് കര്‍മം നിര്‍വഹിച്ചു. കോവിഡ് കാലം കഴിഞ്ഞ രണ്ട് വര്‍ഷങ്ങളില്‍ നിയന്ത്രണങ്ങളോടെയായിരുന്നു ഹജ്ജ് കര്‍മത്തിന് അനുമതി നല്‍കിയിരുന്നത്. അതിനു ശേഷം ഈ വര്‍ഷം മുതല്‍ നിയന്ത്രണങ്ങളില്ലാതെയാണ് ഹജ്ജ് കര്‍മം നടക്കുന്നതെന്നും അധികൃതര്‍ വ്യക്തമാക്കി.
പെര്‍മിറ്റില്ലാതെ എത്തിയ 1.6 ലക്ഷം പേരെ തിരിച്ചയച്ചു
അതിനിടെ, സാധുവായ പെര്‍മിറ്റില്ലാതെ ഹജ്ജ് തീര്‍ഥാടനം നിര്‍വഹിക്കുന്നതിനായി മക്കയിലേക്കും മറ്റ് പുണ്യ സ്ഥലങ്ങളിലേക്കും പ്രവേശിക്കാന്‍ ശ്രമിച്ച 1.6 ലക്ഷത്തിലേറെ പേരെ അതിര്‍ത്തി ചെക്ക് പോസ്റ്റുകളില്‍ നിന്ന് സുരക്ഷാ വകുപ്പുകള്‍ തിരിച്ചയച്ചതായി പൊതുസുരക്ഷാ വകുപ്പ് മേധാവിയും ഹജ്ജ് സുരക്ഷാ കമ്മിറ്റി പ്രസിഡന്റുമായ ജനറല്‍ മുഹമ്മദ് അല്‍ ബസ്സാമി അറിയിച്ചു. ഹജ്ജ് സേവനങ്ങള്‍ വാഗ്ദാനം ചെയ്ത് ആളുകളെ വഞ്ചിക്കുന്ന 83 വ്യാജ ഹജ്ജ് സ്ഥാപനങ്ങള്‍ കണ്ടെത്തിയതായും അദ്ദേഹം വ്യക്തമാക്കി. നിയമ വിരുദ്ധമായി ഹജ് നിര്‍വഹിക്കാന്‍ ശ്രമിക്കുന്നവരെ തടയാന്‍ മക്കക്കു സമീപമുള്ള ചെക്ക് പോസ്റ്റുകളില്‍ ശക്തമായ പരിശോധനകളാണ് നടക്കുന്നത്. ഈ പരിശോധനയില്‍ ഇഖാമ, തൊഴില്‍ നിയമ ലംഘകരായ 5,000 പേരെ കഴിഞ്ഞ ദിവസങ്ങളില്‍ മക്കയില്‍ വെച്ച് പിടികൂടിയിരുന്നു. തീര്‍ഥാടകരുടെ സുരക്ഷക്ക് ഭംഗംവരുത്തുന്ന എല്ലാ തരത്തിലുള്ള പ്രവര്‍ത്തനങ്ങളും ശക്തമായി തടയുമെന്നും അദ്ദേഹം വ്യക്തമാക്കി. സുരക്ഷാ കേസുകള്‍ വേഗത്തില്‍ നിരീക്ഷിക്കാനും അടിയന്തിര സാഹചര്യങ്ങളോട് വേഗത്തില്‍ പ്രതികരിക്കാനും സുരക്ഷാ സൈനികരുടെ ഫീല്‍ഡ് സാന്നിധ്യം ശക്തമാക്കിയിട്ടുണ്ടെന്നും പൊതുസുരക്ഷാ വകുപ്പ് മേധാവി പറഞ്ഞു.
ബൈക്ക് മോഷണം; പ്രതി പിടിയിൽ
ബൈക്ക് മോഷണം; പ്രതി പിടിയിൽ
വാഹനങ്ങള്‍ക്ക് അഞ്ച് തരം പെര്‍മിറ്റുകള്‍
അതിനിടെ, മക്ക ഉള്‍പ്പെടെയുള്ള പുണ്യസ്ഥലങ്ങളില്‍ പ്രവേശിക്കുന്നതിന് വാഹനങ്ങള്‍ക്ക് അഞ്ച് തരം പെര്‍മിറ്റുകളാണ് അനുവദിക്കുന്നതെന്ന് പൊതുസുരക്ഷാ വകുപ്പ് വക്താവ് മേജര്‍ ഖാലിദ് അല്‍ കുറൈദിസ് പറഞ്ഞു. സര്‍ക്കാര്‍, സേവന വകുപ്പുകള്‍ക്കു കീഴിലെ വാഹനങ്ങള്‍ക്കും വാട്ടര്‍ ടാങ്കറുകള്‍ക്കും കാറ്ററിംഗ് സേവന മേഖലയില്‍ പ്രവര്‍ത്തിക്കുന്ന സ്ഥാപനങ്ങള്‍ക്കു കീഴിലെ വാഹനങ്ങള്‍ക്കും ഹജ്ജ് സേവന മേഖലയില്‍ പ്രവര്‍ത്തിക്കുന്ന സ്ഥാപനങ്ങള്‍ക്കു കീഴിലെ വാഹനങ്ങള്‍ക്കുമാണ് പുണ്യസ്ഥലങ്ങളില്‍ പ്രവേശിക്കാന്‍ പെര്‍മിറ്റുകള്‍ അനുവദിക്കുന്നത്. പെര്‍മിറ്റില്ലാത്ത വാഹനങ്ങള്‍ തടയാന്‍ പുണ്യസ്ഥലങ്ങളിലേക്കുള്ള മുഴുവന്‍ റോഡുകളിലും ചെക്ക് പോസ്റ്റുകള്‍ സ്ഥാപിച്ചിട്ടുണ്ട്. കിംഗ് ഫൈസല്‍, തായിഫ് റോഡുകളില്‍ സ്വതന്ത്രമായ വാഹന ഗതാഗതം അനുവദിക്കുന്നത് തുടരും. ദുല്‍ഹജ്ജ് ഏഴിന് വൈകീട്ട് ഈ രണ്ടു റോഡുകളും അടക്കും. ദുല്‍ഹജ്ജ് 10 വരെ ഇവ അടച്ചിടുന്നത് തുടരും.
പെര്‍മിറ്റില്ലാത്ത വാഹനങ്ങള്‍ മക്കയില്‍ പ്രവേശനമില്ല
പ്രത്യേക ഹജ്ജ് പെര്‍മിറ്റില്ലാത്ത വാഹനങ്ങള്‍ പുണ്യസ്ഥലങ്ങളില്‍ പ്രവേശക്കുന്നതിനുള്ള വിലക്ക് വ്യാഴാഴ്ച അര്‍ധരാത്രി മുതല്‍ നടപ്പാക്കി തുടങ്ങിയതായി പൊതുസുരക്ഷാ വകുപ്പ് അറിയിച്ചു. ദുല്‍ഹജ് അഞ്ചിന് പുലര്‍ച്ചെ മുതല്‍ ദുല്‍ഹജ് 13 അവസാനിക്കുന്നതു വരെയാണ് പ്രത്യേക പെര്‍മിറ്റില്ലാത്ത വാഹനങ്ങള്‍ക്ക് പുണ്യസ്ഥലങ്ങളിലേക്ക് പ്രവേശന വിലക്കുള്ളത്. ഹജ്ജ് പെര്‍മിറ്റില്ലാത്തവരെ മക്കയിലേക്കും പുണ്യസ്ഥലങ്ങളിലേക്കും കടത്താന്‍ ശ്രമിക്കുന്നവര്‍ക്ക് ആറു മാസം വരെ തടവും 50,000 റിയാല്‍ വരരെ പിഴയും ശിക്ഷ ലഭിക്കുമെന്നും അധികൃതര്‍ മുന്നറിയിപ്പ് നല്‍കി. കടത്താന്‍ ശ്രമിക്കുന്ന നിയമ ലംഘകരുടെ എണ്ണത്തിനനുസരിച്ച് ഡ്രൈവര്‍മാര്‍ക്ക് കൂടുതല്‍ തുക പിഴ ചുമത്തും. ഹജ്ജ് പെര്‍മിറ്റില്ലാത്തവരെ കടത്താന്‍ ശ്രമിക്കുന്നവരുടെ വാഹനങ്ങള്‍ നിയമ നടപടികളിലൂടെ കണ്ടുകെട്ടുകയും ചെയ്യും. അനധികൃത ഹാജിമാരെ കടത്താന്‍ ശ്രമിച്ച് കുടുങ്ങുന്ന വിദേശികളെ ശിക്ഷ പൂര്‍ത്തിയാക്കിയ ശേഷം സൗദിയില്‍ നിന്ന് നാടുകടത്തും. പുതിയ വിസകളില്‍ വീണ്ടും രാജ്യത്ത് പ്രവേശിക്കുന്നതില്‍ നിന്ന് ഇത്തരക്കാര്‍ക്ക് വിലക്കേര്‍പ്പെടുത്തുമെന്നും ഹജ്ജ് സുരക്ഷാ വിഭാഗം അറിയിച്ചു.
ഹജ്ജ് തട്ടിപ്പ് നടത്തിയ മൂന്നംഗ സംഘം അറസ്റ്റില്‍
അതിനിടെ, വ്യാജ ഹജ്ജ് സ്ഥാപനം നടത്തി ആഭ്യന്തര തീര്‍ഥാടകരെ കബളിപ്പിച്ച മൂന്നംഗ സംഘത്തെ കഴിഞ്ഞ ദിവസം മക്ക പോലീസ് അറസ്റ്റ് ചെയ്തു. ഇവര്‍ ബംഗ്ലാദേശുകാരാണെന്ന് പോലിസ് അറിയിച്ചു. അനധികൃത ഓഫീസ് കേന്ദ്രീകരിച്ചാണ് സംഘം വ്യാജ സ്ഥാപനം നടത്തിയിരുന്നത്. ആഭ്യന്തര ഹജ്ജ് തീര്‍ഥാടകര്‍ക്ക് വിതരണം ചെയ്യുന്നത് പോലുള്ള വളകളും ഹജ്ജ് കാര്‍ഡുകളും വിതരണം ചെയ്യുകയായിരുന്നു സംഘത്തിന്റെ ലക്ഷ്യം. ഇവരില്‍ നിന്ന് പണവും കംപ്യൂട്ടറുകളും പ്രിന്ററും സീലുകളും മറ്റും പോലിസ് കണ്ടെത്തി. നിയമാനുസൃത നടപടികള്‍ പൂര്‍ത്തിയാക്കി നിയമ ലംഘകരെ പബ്ലിക് പ്രോസിക്യൂഷന് കൈമാറിയതായി മക്ക പോലീസ് അറിയിച്ചു. ഇത്തരം തട്ടിപ്പ് ശ്രമങ്ങളെയും സ്ഥാപനങ്ങളെയും കുറിച്ച് വിവരം ലഭിക്കുന്നവര്‍ മക്ക, റിയാദ്, കിഴക്കന്‍ പ്രവിശ്യകളില്‍ 911 എന്ന നമ്പറിലും മറ്റു പ്രവിശ്യകളില്‍ 999 എന്ന നമ്പറിലും അറിയിക്കമെന്ന് പൊതുസുരക്ഷാ വകുപ്പ് ജനങ്ങളോട് അഭ്യര്‍ഥിച്ചു.
