കോൺഗ്രസ്സിനകത്തും പൊതുമിനിമം പരിപാടിയെ സഖ്യത്തിന്റെ മുമ്പിൽ നിർത്തുന്നതിനെപ്പറ്റി ചർച്ചകൾ വന്നുതുടങ്ങിയിട്ടുണ്ട്. 2024 ലോക്സഭാ തിരഞ്ഞെടുപ്പിനു മുമ്പ് ഒരു പൊതുമിനിമം പരിപാടി സ്ഥാപിക്കപ്പെടണമെന്ന് യോഗത്തിനു മുമ്പായി ബിഹാറിലെ കോൺഗ്രസ് തലവൻ അഖിലേഷ് പ്രസാദ് സിങ് പ്രസ്താവിച്ചിരുന്നു. പ്രതിപക്ഷം ഒരുമിച്ചു നിന്നാൽ ബിജെപി 100ൽത്താഴെ സീറ്റിലേക്ക് വരുമെന്ന് അദ്ദേഹം ചൂണ്ടിക്കാട്ടി. പ്രധാനമന്ത്രി സ്ഥാനാർത്ഥഇ ആരെന്നത് പ്രധാനമല്ല. അത് തിരഞ്ഞെടുപ്പിനു ശേഷം പാർട്ടികൾക്ക് ഒരുമിച്ച് തീരുമാനത്തിലെത്താവുന്നതാണ്. ഒരു കോമൺ മിനിമം പ്രോഗ്രാം സജ്ജമാക്കുക എന്നതാണ് പ്രധാനം.
പ്രധാനമന്ത്രി സ്ഥാനാര്‍ത്ഥിയില്ലാതെ തിരഞ്ഞെടുപ്പിനെ നേരിടുന്നതിൽ ഒരു പ്രശ്നവുമില്ലെന്ന് അഖിലേഷ് പ്രസാദ് സിങ് പറയുകയുണ്ടായി. 2004ൽ തിരഞ്ഞെടുപ്പിനെ നേരിടുമ്പോൾ മൻമോഹൻ സിങ് എന്നൊരു പ്രധാനമന്ത്രി സ്ഥാനാർത്ഥി ഇല്ലായിരുന്നു. തിരഞ്ഞെടുപ്പിനു ശേഷമാണ് അദ്ദേഹത്തിലേക്ക് എത്തിച്ചേർന്നത്. അന്ന് അടൽബിഹാരി വാജ്പേയിയുടെ നേതൃത്വത്തിലുള്ള ബിജെപിയെ പരാജയപ്പെടുത്തിയത് പ്രധാനമന്ത്രി സ്ഥാനാർത്ഥി ഇല്ലാതെയാണ്.
തിരഞ്ഞെടുപ്പിനു ശേഷം സഖ്യത്തിലേർപ്പെടുക എന്ന സമീപനം വിജയിക്കില്ലെന്നാണ് സ്റ്റാലിന്റെ അഭിപ്രായം. ഇക്കാര്യം താൻ യോഗത്തിൽ പറഞ്ഞെന്ന് അദ്ദേഹം വ്യക്തമാക്കി. ഒരു പൊതുമിനിമം പരിപാടിയുടെ ബലത്തിൽ മാത്രമേ മുമ്പോട്ട് പോകാനാകൂ.
ആംആദ്മിയും തൃണമൂലും സമാനമായ ഒരു പ്രശ്നമാണ് യോഗത്തിൽ മുമ്പോട്ടുവെച്ചത്. പല മണ്ഡലങ്ങളിലും പൊതുസ്ഥാനാർത്ഥിയെ നിർത്തി വിജയിപ്പിക്കാവുന്നതാണ്. ഇതിന് കോൺഗ്രസ് തയ്യാറാകണം. സഖ്യകക്ഷികൾ തമ്മില്‍ ഒരു മണ്ഡലത്തിൽപ്പോലും മത്സരം വരാതിരിക്കാൻ കോൺഗ്രസ്സാണ് ശ്രദ്ധ വെക്കേണ്ടതെന്ന സൂചനയാണ് ഇരുകൂട്ടരും നൽകിയത്. അതെസമയം യോഗത്തിൽ കോൺഗ്രസ്സുമായുള്ള ആംആദ്മിയുടെ ബന്ധത്തിലെ ചവർപ്പ് വർദ്ധിപ്പിക്കുന്ന സംഭവങ്ങളുമുണ്ടായി. ഡൽഹി സർക്കാരിനെതിരായ കേന്ദ്ര ഓർഡിനൻസിനെ എതിർക്കാൻ കോൺഗ്രസ് തയ്യാറാകാത്തത് എന്താണെന്ന ചോദ്യം കെജ്രിവാൾ യോഗത്തിലുന്നയിച്ചു. നിലപാടെടുക്കാൻ ഇനിയും സമയമുണ്ടല്ലോ എന്നായി മല്ലികാർജുൻ ഖാർഗെ. ഇത് തർക്കത്തിനിടയാക്കി. കെജ്രിവാൾ സംയുക്ത വാർത്താ സമ്മേളനത്തിന് നിൽക്കുകയുണ്ടായില്ല.
ജമ്മു കാശ്മീരിന്റെ പ്രത്യേക പദവി എടുത്തുകളഞ്ഞ കേന്ദ്രനടപടിയെ പ്രശംസിച്ച ആംആദ്മിയുടെ നിലപാടിനെ വരെ മറക്കാൻ തങ്ങൾ തയ്യാറാണെന്ന് പിഡിപിയുടെ മെഹബൂബ മുഫ്തി വ്യക്തമാക്കി.
