പ്രധാനമന്ത്രിയുടെ യുഎസ് സന്ദർശനം: ഇന്ത്യയിൽ വൻ നിക്ഷേപത്തിനൊരുങ്ങി ആമസോണും ​ഗൂ​ഗിളും മൈക്രോസോഫ്റ്റും

വരുന്ന ഏഴ് വർഷത്തിനുള്ളിൽ ഇന്ത്യയിൽ 15 ബില്യൺ ഡോളർ നിക്ഷേപിക്കാനാണ് ആമസോൺ തയ്യാറെടുക്കുന്നത്. ഇത് കമ്പനിയുടെ മൊത്തം ഇന്ത്യയിലെ നിക്ഷേപം 26 ബില്യൺ ഡോളറായി ഉയർത്തും. ആമസോൺ 2025ഓടെ 20 ലക്ഷം തൊഴിലവസരങ്ങൾ രാജ്യത്ത് സൃഷ്ടിക്കുമെന്നും അറിയിച്ചിട്ടുണ്ട്.

അതിന് പുറമെ, ഇന്ത്യൻ സ്റ്റാർട്ടപ്പുകളെ പിന്തുണയ്ക്കുന്നതിനെക്കുറിച്ചും കയറ്റുമതി പ്രാപ്തമാക്കുന്നതിനെക്കുറിച്ചും ഡിജിറ്റലൈസേഷനെക്കുറിച്ചും വ്യക്തികളെയും ചെറുകിട ബിസിനസുകാരെയും ആഗോളതലത്തിൽ മത്സരിക്കാൻ പ്രാപ്തരാക്കുന്നതിനെക്കുറിച്ചും അതിന്റെ സിഇഒ ആൻഡി ജാസിയും പ്രധാനമന്ത്രിയും സംസാരിച്ചതായി ആമസോൺ പുറത്തിറക്കിയ പ്രസ്താവനയിൽ അറിയിച്ചു.

ഗൂഗിൾ തങ്ങളുടെ ആഗോള ഫിൻടെക് ഓപ്പറേഷൻ സെന്റർ ഗുജറാത്തിൽ തുറക്കുമെന്നാണ് അറിയിച്ചിരിക്കുന്നത്. അതിന് പുറമെ, രാജ്യത്തെ ഡിജിറ്റൈസേഷൻ ഫണ്ടിൽ 10 ബില്യൺ ഡോളർ നിക്ഷേപിക്കുമെന്ന് ഗുഗിൾ സിഇഒയും ഇന്ത്യൻ വംശജനുമായ സുന്ദർ പിച്ചൈ പറഞ്ഞു.

മൈക്രോസോഫ്റ്റ് ചെയർമാനും സിഇഒയുമായ സത്യ നാദെല്ല പ്രധാനമന്ത്രിയുമായുള്ള കൂടിക്കാഴ്ചയിൽ ഇന്ത്യക്കാരുടെ ജീവിതം മെച്ചപ്പെടുത്താൻ സഹായിക്കുന്ന സാങ്കേതികവിദ്യയുടെ കാര്യങ്ങളാണ് ചർച്ച ചെയ്തത്. ഇതിൽ പ്രധാനമായും ആർട്ടിഫിഷ്യൽ ഇന്റലിജൻസിന്റെ ശക്തിയെക്കുറിച്ചായിരുന്നു ചർച്ച ചെയ്തത്.

സർക്കാർ സഹായത്തിനായി മൊബൈൽ ഫോണുകളിൽ എഐയിൽ പ്രവർത്തിക്കുന്ന ചാറ്റ്ബോട്ടായ ജുഗൽബന്ദി മൈക്രോസോഫ്റ്റ് കഴിഞ്ഞ മാസം ഇന്ത്യയിൽ അവതരിപ്പിച്ചിരുന്നു. ഒന്നിലധികം ഭാഷകളിലുള്ള ചോദ്യങ്ങൾ ഈ ചാറ്റ്ബോക്സിന് മനസ്സിലാക്കാൻ സാധിക്കും. സർക്കാർ പിന്തുണയുള്ള സംരംഭമായ AI4Bharat-ൽ നിന്നുള്ള ഭാഷാ മോഡലുകളും Microsoft Azure OpenAI സേവനത്തിൽ നിന്നുള്ളതും ഉപയോഗിച്ചാണ് ജുഗൽബന്ദി എഐ അസിസ്റ്റന്റ് പ്രവർത്തിക്കുന്നത്.

പ്രധാനമന്ത്രി നരേന്ദ്രമോദിയുടെ യുഎസ് സന്ദർശനത്തിന്റെ അവസാനദിനത്തിൽ വൈറ്റ് ഹൗസിൽ നടന്ന “ഹൈ-ടെക് ഹാൻഡ്‌ഷേക്ക്” മെഗാ ഇവന്റിൽ വിവിധ മേഖലകളിലുള്ള വ്യവസായ മേധാവികളുമായി പ്രധാനമന്ത്രി മോദി കൂടിക്കാഴ്ച നടത്തി.

അതിന് പുറമെ സെമ കണ്ടക്ടറുകൾ മുതൽ ബഹിരാകാശ ഗവേഷണം വരെയുള്ള മേഖലകളിൽ ഇന്ത്യയ്ക്കൊപ്പം കൈകോർക്കാൻ യുഎസിലെ പ്രമുഖ കമ്പനികളുമായി ധാരണയായിട്ടുണ്ട്.

Also Read : നന്ദിനി പാലിന്റെ വില വീണ്ടും ഉയർന്നേക്കും; ലിറ്ററിന് അഞ്ചു രൂപ കൂട്ടണമെന്ന് ആവശ്യം

ഇന്ത്യയും യുഎസും തമ്മിലുള്ള പങ്കാളിത്തം 21ാം നൂറ്റാണ്ടിൽ ലോകത്തെ മികച്ചതാക്കുമെന്ന് പ്രധാനമന്ത്രി പറഞ്ഞു. ഇന്ത്യയിൽ ദാരിദ്ര്യം അതിവേഗത്തിൽ തന്നെ ഇല്ലാതെയാകുകയാണെന്നും മധ്യവർഗം വികസനത്തിന്റെ പാതയിലാണെന്നും പ്രധാനമന്ത്രി വ്യക്തമാക്കി.

Read Latest World News and Malayalam News