ലക്ഷദ്വീപ് എം.പി മുഹമ്മദ് ഫൈസലിന്റെ വീട്ടിലും ഓഫീസിലും ഇഡി റെയ്ഡ്

ലക്ഷദ്വീപിലെ ആന്ത്രോത്ത് ദ്വീപിലെ വീട്ടിലും കൊച്ചിയിലെ ഡൽഹിയിലേയും ഔദ്യോഗിക വസതികളിലുമാണ് റെയ്ഡ് നടന്നത്. ഇതിന് പുറമെ, എംപിയുമായി ബന്ധപ്പെട്ട് കോഴിക്കോട് ബേപ്പൂരുള്ള സ്ഥാപനത്തിലുമാണ് റെയ്ഡ് നടന്നു. ഈ നാല് കേന്ദ്രങ്ങളിലും ഒരേ സമയത്താണ് പരിശോധന നടന്നത്.

കോഴിക്കോട് ബേപ്പൂരിൽ നിന്നും ലക്ഷദ്വീപിലേക്ക് ചരക്ക് കയറ്റി അയക്കുന്ന കോറൽ ലോജിസ്റ്റിക്സ് എന്ന സ്ഥാപനത്തിലാണ് പരിശോധന നടക്കുന്നത്. എംപിയുടെ അമ്മാവന്റെ മക്കളായ സെയ്ദ്, മമ്മു എന്നിവരും ബന്ധുവായ യഹിയയുമാണ് ഈ സ്ഥാപനം നടത്തുന്നത്. സംസ്ഥാന പോലീസ് അറിയാതെയായിരുന്നു റെയ്ഡ് നടന്നത്. ഇഡി സിആർപിഎഫ് സംഘത്തോടൊപ്പമായിരുന്നു പരിശോധനയ്ക്കായി എത്തിയത്.

എംപി ഫൈസൽ ഒന്നാം പ്രതിയായ കേസിലാണ് ഇപ്പോൾ റെയ്ഡ് നടക്കുന്നത്. ലക്ഷദ്വീപിലെ സഹകരണ മാർക്കറ്റിങ് ഫെഡറേഷനിലെ ചില ഉദ്യോഗസ്ഥരും ഫൈസലുമായി ചേർന്ന് ടെൻഡറിലും മറ്റും ക്രമക്കേടുകൾ നടത്തി ശ്രീലങ്കയിലേക്ക് മത്സ്യം കയറ്റുമതി ചെയ്‌തെന്നതാണ് കേസ്.

2016-17 കാലത്ത് സിബിഐയും സംഭവത്തിൽ കേസെടുത്ത് പരിശോധന നടത്തിയിരുന്നു. ഇതിനുപിന്നാലെയാണ് ഇഡിയും കേസെടുത്ത് നടപടികളിലേക്ക് നീങ്ങിയത്.

നേരത്തെ വധശ്രമക്കേസിൽ ശിക്ഷിക്കപ്പെട്ട ലക്ഷദ്വീപ് എം പി മുഹമ്മദ് ഫൈസലിനെ അയോഗ്യനാക്കിയിരുന്നു. പിന്നീട്, ശിക്ഷാവിധി റദ്ദാക്കിയതോടെ അയോഗ്യത പിൻവലിക്കുകയും ചെയ്തിരുന്നു. എംപി സ്ഥാനം പുനസ്ഥാപിക്കണമെന്നാവശ്യപ്പെട്ട് ഇയാൾ നൽകിയ ഹർജി ഇന്ന് സുപ്രീം കോടതി പരിഗണിക്കാനിരിക്കെയാണ് നടപടി. അതിനൊപ്പം ഫൈസലിൻറെ കുറ്റവും ശിക്ഷയും സ്റ്റേ ചെ്യത ഹൈക്കോടതി വിധിക്കെതിരെ ലക്ഷ്വദ്വീപ് ഭരണസമിതി നൽകിയ ഹർജിയും പരിഗണനയ്ക്ക് എത്തുന്നുണ്ട്.

Also Read : വീണ്ടും മഴയ്ക്ക് സാധ്യത; ഇന്ന് മൂന്ന് ജില്ലകളിൽ യെല്ലോ അലേർട്ട്

പരിശോധനയ്ക്കിടെ എംപിയുമായി ബന്ധപ്പെട്ട ചില വസ്തുവകകളുടെ രേഖകളും സാമ്പത്തിക ഇടപാട് സംബന്ധിച്ച രേഖകളും കണ്ടെടുത്തിണ്ടെന്ന് ഇഡിയെ ഉദ്ധരിച്ചുകൊണ്ട് മാതൃഭൂമി റിപ്പോർട്ട് ചെയ്യുന്നു.

Read Latest National News and Malayalam News