ക്ഷേത്ര ദർശനത്തിന് പോയ യുവതിയുടെ കാർ ഒഴുക്കിൽപെട്ടു; രക്ഷപെടുത്തിയത് സാഹസികമായി – വിഡിയോ

അമ്മയ്ക്കൊപ്പം ഖരക് മംഗോളി ക്ഷേത്രത്തിൽ ദർശനത്തിന് എത്തിയതായിരുന്നു യുവതി. നദീ തീരത്താണ് വാഹനങ്ങൾ പാർക്ക് ചെയ്തിരുന്നത്. പെട്ടന്നുണ്ടായ മഴയിൽ നദിയിലെ ജലനിരക്ക് ഉയരുകയും കാർ ഒഴുക്കിൽ പെടുകയുമായിരുന്നു. ഈ സമയത്ത് യുവതി വാഹനത്തിലുണ്ടായിരുന്നു.

പിന്നീട്, പ്രദേശവാസികൾ ചേർന്ന് അതിസാഹസികമായാണ് യുവതിയെ രക്ഷിച്ചത്. ഈ രക്ഷാപ്രവർത്തനത്തിന്റെ വീഡിയോ സമൂഹമാധ്യമങ്ങളിൽ വൈറലാണ്. യുവതിയെ പഞ്ച്കുളയിലെ ആശുപത്രിയിൽ പ്രവേശിപ്പിച്ചു. ക്രെയിനുപയോഗിച്ച് വാഹനം ഉയർത്താനുള്ള ശ്രമം പുരോഗമിക്കുകയാണ്. വാർത്താ ഏജൻസിയായ എഎൻഐ വീഡിയോ പങ്കുവച്ചിട്ടുണ്ട്.
“ഞങ്ങൾ 10 – 15 പേർ കയറിന്റെ സഹായത്തോടെയാണ് സ്ത്രീയെ പുറത്തെത്തിച്ചത്.” എന്ന് ദൃക്സാക്ഷികളിൽ ഒരാളെ ഉദ്ധരിച്ച് വാർത്താ ഏജൻസി റിപ്പോർട്ട് ചെയ്യുന്നു.

മറ്റൊരിടത്ത് പഞ്ചകുള സെക്ടർ 27ന് സമീപം പുഴ മുറിച്ച് കടക്കാൻ ശ്രമിച്ച ഏഴ് പേർ കുടുങ്ങി. പോലീസും എൻഡിആർഎഫ് സംഘവും സ്ഥലത്തെത്തിയിട്ടുണ്ട്. രക്ഷാപ്രവർത്തനവും പുരോഗമിക്കുകയാണ്.

Also Read : ഈജിപ്തിന്റെ പരമോന്നത ബഹുമതി ‘ഓഡർ ഓഫ് ദ നൈൽ’ ഏറ്റുവാങ്ങി നരേന്ദ്ര മോദി

ഡൽഹി അടക്കമുള്ള പ്രദേശങ്ങളിൽ ശക്തമായ മഴയാണ് പെയ്യുന്നത്. റെയിൽവേ സ്റ്റേഷന് സമീപത്തുള്ള പോസ്റ്റിൽ നിന്നും വൈദ്യുതാഘാതം ഏറ്റ് യുവതി മരിച്ചിരുന്നു. മധ്യപ്രദേശ്, ഉത്തർപ്രദേശ്, ഡൽഹി, രാജസ്ഥാൻ, പഞ്ചാബ്, ജമ്മു, ഹരിയാന എന്നീ സംസ്ഥാനങ്ങളിൽ ശക്തമായ മഴയാണ് റിപ്പോർട്ട് ചെയ്യുന്നത്. തെക്കുപടിഞ്ഞാറൻ മൺസൂൺ ഉത്തരേന്ത്യയിൽ എത്തിയതായി കേന്ദ്ര കാലാവസ്ഥ വകുപ്പ് അറിയിച്ചു.

Read Latest National News and Malayalam News