രാജ്യദ്രോഹ കുറ്റം ഇന്ത്യ ഒഴിവാക്കുമോ?

ബ്രിട്ടീഷ് ഭരണകാലത്താണ് നിയമം നടപ്പിലായത്. 1870 ലാണ് ഇന്ത്യന്‍ ശിക്ഷാ നിയമത്തില്‍ രാജ്യദ്രോഹ വകുപ്പ് ഉള്‍പ്പെടുത്തിയത്. ഭരണവിരുദ്ധ പ്രസ്താവനകളെ ചങ്ങലയ്ക്കിടാന്‍ ബ്രിട്ടീഷുകാര്‍ നിയമം ആയുധമാക്കി.

മഹാത്മാഗാന്ധിയെയും ബാലഗംഗാധര തിലകനെയും നിശബ്ദരാക്കാന്‍ ഇതേ നിയമമാണ് അന്ന് ഉപയോഗിച്ചത്. യങ് ഇന്ത്യ എന്ന പ്രസിദ്ധീകരണത്തില്‍ ഗാന്ധി മൂന്ന് ലേഖനങ്ങള്‍ എഴുതിയതിന് ബ്രിട്ടീഷുകാര്‍ അദ്ദേഹത്തെ 1922-ല്‍ 6 വര്‍ഷം തടവുശിക്ഷക്ക് വിധിച്ചു.

പൗരസ്വാതന്ത്ര്യം അമര്‍ച്ച ചെയ്യാന്‍ ശിക്ഷാ നിയമത്തിലുള്ള ”രാഷ്ട്രീയ വകുപ്പുകളിലെ രാജകുമാര”നാണ് 124 എ വകുപ്പ് എന്നാണ് ഗാന്ധി ഈ വകുപ്പിനെ കോടതിക്ക് മുന്നില്‍ വിശേഷിപ്പിച്ചത്. മാത്രമല്ല, ഇന്ത്യയിലെ ദേശഭക്തരില്‍ പലര്‍ക്കുമെതിരെ ചുമത്തിയിട്ടുള്ള ഈ വകുപ്പ് തനിക്കൊരു ബഹുമതിയാണെന്നും അന്ന് ഗാന്ധി പറഞ്ഞു.

ബ്രിട്ടീഷുകാര്‍ക്കെതിരെ പ്രകോപനപരമായ ലേഖനങ്ങള്‍ എഴുതിയതിനാണ് ബാലഗംഗാധര തിലക് 1898, 1908 വര്‍ഷങ്ങളില്‍ ശിക്ഷിക്കപ്പെട്ടത്. ഇവര്‍ക്ക് പുറമെ ലാല ലജ്‍പത് റായ്, അബ്ദുള്‍ കലാം ആസാദ് തുടങ്ങി നിരവധി സ്വാതന്ത്ര്യസമര പോരാളികള്‍ 124-എ വകുപ്പ് പ്രകാരം ശിക്ഷ ഏറ്റുവാങ്ങിയവരാണ്.

രാജ്യദ്രോഹ വകുപ്പ് ദുരുപയോഗം ചെയ്യപ്പെടുന്നു

അഭിപ്രായ സ്വാതന്ത്ര്യത്തിനും വ്യക്തി സ്വാന്ത്ര്യത്തിനും ഈ നിയമം വിലങ്ങുതടിയാണെന്നാണ് ഹര്‍ജികളില്‍ ആക്ഷേപം. കേന്ദ്ര സര്‍ക്കാരിനെ വിമര്‍ശിച്ചാലോ എതിരഭിപ്രായം പറഞ്ഞാലോ രാജ്യദ്രോഹ എന്ന് മുദ്രകുത്തുന്ന അവസ്ഥയാണ് ഇന്ത്യയിലുള്ളതെന്നും ഹര്‍ജിക്കാര്‍ വാദിക്കുന്നു.

നരേന്ദ്ര മോദി സര്‍ക്കാരിന്‍റെ കര്‍ഷക നിയമങ്ങള്‍ക്ക് എതിരെ മാസങ്ങളായി സമരം ചെയ്യുന്ന കര്‍ഷകര്‍ക്ക് എതിരെ നിയമം ചുമത്തിയെന്നാണ് ആരോപണം. കര്‍ഷക സമരത്തിന്‍റെ പ്രധാന കേന്ദ്രങ്ങളിലൊന്നായ ഹരിയാനയിലെ സിര്‍സയില്‍ നൂറോളം വരുന്ന കര്‍ഷകര്‍ക്കെതിരെ രാജദ്രോഹക്കുറ്റം ചുമത്തി കേസ് രജിസ്റ്റര്‍ ചെയ്‍തതായി റിപ്പോര്‍ട്ടുകളുണ്ടായിരുന്നു.

ഇന്ത്യയിലെ വിവേചനപരമാണെന്ന് വിമര്‍ശകര്‍ വാദിക്കുന്ന പൗരത്വ നിയമത്തിന് എതിരെ അഭിപ്രായം പറ‌ഞ്ഞവര്‍ക്ക് എതിരെയും രാജ്യദ്രോഹക്കുറ്റം ചുമത്തിയിരുന്നു. ഇതില്‍ മാധ്യമപ്രവര്‍ത്തകരും ഉള്‍പ്പെടുന്നു — വിവിധ മാധ്യമ റിപ്പോര്‍ട്ടുകള്‍ സൂചിപ്പിക്കുന്നു.

ജനാധിപത്യ വിരുദ്ധമാണെന്ന് കണ്ട് സമാന നിയമങ്ങള്‍ പല രാജ്യങ്ങളും ഒഴിവാക്കി. ഇന്ത്യയില്‍ നിയമം നടപ്പാക്കി ബ്രിട്ടണ്‍ ഈ നിയമം സ്വന്തം രാജ്യത്ത് റദ്ദാക്കി. ഓസ്ട്രേലിയ, അമേരിക്ക തുടങ്ങിയ പാശ്ചാത്യ ജനാധിപത്യങ്ങളിലും ഈ നിയമം പടിക്കുപുറത്താണ്.

കേന്ദ്ര സര്‍ക്കാര്‍ നിലപാട്

സുപ്രീം കോടതി നിര്‍ദേശം നിരാകരിക്കുകയാണ് സര്‍ക്കാരിന് വേണ്ടി ഹാജരായ അറ്റോണി ജനറല്‍ കെ.കെ. വേണുഗോപാല്‍. രാജ്യദ്രോഹ വകുപ്പ് ഒഴിവാക്കേണ്ടതില്ലെന്നും പകരം, രാജ്യദ്രോഹ കുറ്റം ചുമത്തുന്ന കാര്യത്തില്‍ വ്യവസ്ഥകള്‍ ഉള്‍പ്പെടുത്തി മാര്‍ഗരേഖ തയാറാക്കുകയാണ് വേണ്ടതെന്നുമാണ് കേന്ദ്ര സര്‍ക്കാര്‍ നിലപാട്.

2015 മുതല്‍ 2019 വരെ രാജ്യത്ത് 283 കേസുകളാണ് 124എ പ്രകാരം റജിസ്റ്റര്‍ ചെയ്തതിട്ടുള്ളത് — മാധ്യമ റിപ്പോര്‍ട്ടുകള്‍ സൂചിപ്പിക്കുന്നു. ഇവയില്‍ പലതും അഭിപ്രായ സ്വാതന്ത്ര്യത്തിനെതിരേയും വിമര്‍ശനങ്ങള്‍ക്കെതിരേയും ചുമത്തിയിട്ടുള്ള കേസുകളാണ് എന്നതാണ് ആരോപണം.

****