ആരാണ് പ്രശാന്ത് കിഷോര്‍?

1977ൽ ജനിച്ച പ്രശാന്ത് കിഷോർ രാഷ്ട്രീയത്തിലിറങ്ങും മുന്നേ ഏറെക്കാലം ഐക്യരാഷ്ട്ര സഭയോടൊപ്പം പ്രവർത്തിച്ച ചരിത്രമുണ്ട്. പൊതു ആരോഗ്യ വിദഗ്‍ധൻ എന്ന നിലയിൽ ഏകദേശം എട്ട് വർഷത്തോളം ഐക്യരാഷ്ട്ര സഭയുടെ ഭാഗമായിരുന്ന കിഷോർ ഇന്ത്യൻ രാഷ്ട്രീയത്തിൽ തന്റെ ജൈത്രയാത്ര തുടങ്ങുന്നത് നരേന്ദ്ര മോദിയെ പ്രധാനമന്ത്രിയുടെ സിംഹാനത്തിൽ ഇരുത്തുന്നതിലെ ബുദ്ധികേന്ദ്രം എന്ന നിലയിലാണ്.

2014ലെ രാജ്യത്തെ പൊതു തെരഞ്ഞെടുപ്പിൽ ബിജെപി രാജകീയമായി അധികാരത്തിലേറിയെങ്കിൽ അതിനവർ കടപ്പെട്ടിരിക്കുന്നത് പ്രശാന്ത് കിഷോറിനോടായിരിക്കും. 2012 ഗുജറാത്ത് തെരഞ്ഞെടുപ്പിലൂടെ മോദിയെ തുടർച്ചയായി മൂന്നാമതും സംസ്ഥാന മുഖ്യമന്ത്രിയാക്കിയതിന് പിന്നിലും ഇതേ ബുദ്ധി തന്നെ.

“അദ്ദേഹം ഒരു സൂപ്പർ ഇന്‍റലിജന്‍റാണ്”– പ്രശാന്ത് കിഷോറിനെപ്പറ്റി ആംആദ്‍മി പാർട്ടി തലവനും ഡൽഹി മുഖ്യമന്ത്രിയുമായ അരവിന്ദ് കെ‍ജ്‍രിവാള്‍ മുമ്പൊരിക്കൽ പറഞ്ഞ വാക്കുകളാണിത്. അതെ, അതുകൊണ്ട് തന്നെയാണ് അയാളുടെ ഓരോ രാഷ്ട്രീയ കൂടിക്കാഴ്ച്ചകളും രാജ്യത്ത് ഇത്രയും ശ്രദ്ധിക്കപ്പെടുന്നതും

തെരഞ്ഞെടുപ്പ് രാഷ്ട്രീയത്തിലെ ബുദ്ധിരാക്ഷസൻ

രാഷ്ട്രീയക്കാരെക്കാൾ രാഷ്ട്രീയ തന്ത്രജ്ഞർക്കാണ് മൂല്യമെന്ന് തെളിയിച്ച വർഷങ്ങളാണ് രാജ്യത്ത് കടന്നുപോയത്. ഇന്ത്യൻ പൊളിറ്റിക്കൽ ആക്ഷൻ കമ്മിറ്റി (ipac) എന്ന വിപ്ലവകരമായ കണ്ടുപിടിത്തം ഒരെണ്ണം മതി പ്രശാന്ത് കിഷോർ എന്ന പേര് ഇന്ത്യൻ രാഷ്ട്രീയത്തിൽ നിലനിൽക്കാൻ.

2013ൽ തുടങ്ങിയ തന്‍റെ സിറ്റിസൺസ് ഫോർ അക്കൗണ്ടബിൾ ഗവേണൻസ് (cag) എന്ന തന്‍റെ മീഡിയ & പബ്ലിസിറ്റി കമ്പനിയിൽ എന്തും ഏറ്റെടുക്കും –രാഷ്ട്രീയ റാലികൾ മുതൽ ക്യാംപെയ്‍ൻ മുദ്രാവാക്യങ്ങളും സോഷ്യൽ മീഡിയ പബ്ലിസിറ്റിയും അങ്ങനെ ഒരു തെരഞ്ഞെടുപ്പ് വിജയിക്കാനാവശ്യമായ എല്ലാ ചേരുവകളും സൃഷ്ടിച്ചെടുത്ത് അവരെ വിജയിപ്പിക്കുക എന്ന വലിയ ദൗത്യങ്ങൾ സിംപിളായി നടപ്പാക്കുന്ന മാസ്റ്റർ മൈൻഡ്.

2014ലെ ബിജെപിയുടെ “ചായ് പെ ചർച്ച” സംവാദങ്ങൾ തന്നെ ഉദാഹരണം. 2015 ബീഹാർ തെരഞ്ഞെടുപ്പ് സമയത്ത് രൂപീകരിച്ച ഐ.പി.എ.സി നിധീഷ് കുമാറിനെ മൂന്നാമതും മുഖ്യമന്ത്രിയായി അവരോധിച്ചു. 2017ൽ കോൺഗ്രസിനൊപ്പം യുപി ഇലക്ഷനിൽ പയറ്റിയെങ്കിലും ബിജെപിയുടെ കുതിപ്പിന് മുന്നിൽ കീഴടങ്ങി.

2019ൽ വൈ.എസ് ജഗൻമോഹൻ റെഡ്ഡിയുടെ രാഷ്ട്രീയ ഉപദേശകനായി ഒരിക്കൽ കൂടി ഐ.പി.എ.സിയുടെ വിശ്വരൂപം പുറത്തെടുത്തു. ഫലം 175ൽ 151ഉം വിജയിച്ച് ജഗൻ ആന്ധ്രയുടെ അധികാര സിംഹാസനത്തിലേക്ക്. പിന്നീട് 2020ലെ ഡൽഹി, ബീഹാർ തെരഞ്ഞെടുപ്പുകൾ കഴിഞ്ഞാൽ ഈ വർഷം ബംഗാളിൽ ബിജെപിയെ നിലം തൊടാതെ പറത്തി മമതയെ തുടർച്ചയായി വീണ്ടും അധികാരമേൽപ്പിച്ച് ഒരിക്കൽകൂടി ഇന്ത്യൻ രാഷ്ട്രീയത്തിൽ തന്നെ വെല്ലുന്ന മറ്റൊരു തന്ത്രജ്ഞൻ ഇല്ലെന്ന് വിധിയെഴുതുകയും ചെയ്തു. തൊട്ടു പിന്നാലെ ഡി.എം.കെയൊടൊപ്പം ചേർന്ന് എംകെ സ്റ്റാലിനെ ആദ്യമായി മുഖ്യമന്ത്രി പദത്തിലെത്തിക്കുന്നതിലും നിർണായക പങ്ക് വഹിച്ചു.

ഇപ്പോൾ പ്രശാന്ത് കിഷോര്‍ കോണ്‍ഗ്രസ് അധ്യക്ഷ സോണിയ ഗാന്ധി, മുന്‍ അധ്യക്ഷന്‍ രാഹുല്‍ ഗാന്ധി, ജനറല്‍ സെക്രട്ടറി പ്രിയങ്ക ഗാന്ധിയുമായി നടത്തിയ ചർച്ചകളാണ് വാർത്തകളിൽ ഇടം പിടിക്കുന്നത്. അദ്ദേഹത്തിന്‍റെ വരവ് തകർന്നു തുടങ്ങുന്ന കോൺഗ്രസിന് പുനർജന്മമാണെന്നും 2024 തെരഞ്ഞെടുപ്പിൽ തിരിച്ചുവരാൻ സഹായിക്കുമെന്നും ഹൈക്കമാൻഡ് കണക്കു കൂട്ടുന്നു. അതു തന്നെയാണ് എതിരാളികളടക്കം ഉറ്റു നോക്കുന്നതും.

****