ഒരു പ്രായം കഴിഞ്ഞാല്‍ പലരേയും അലട്ടുന്ന ജീവിതശൈലീ രോഗങ്ങള്‍ ഇപ്പോള്‍ ചെറുപ്രായത്തില്‍ തന്നെയും പലര്‍ക്കും വരുന്നു. ബിപിയും പ്രമേഹവും കൊളസ്‌ട്രോളുമെല്ലാം തന്നെ ഇതില്‍ പെടും. ഇതില്‍ ബിപി പലപ്പോഴും പലരും അത്ര കാര്യമാക്കി എടുക്കാറില്ല. നിസാരമാക്കി വിടും. എന്നാല്‍ കൂടിയ രക്തസമ്മര്‍ദം തലച്ചോറിലെ ഞരമ്പുകളെ ബാധിച്ച് ഞരമ്പുകള്‍ പൊട്ടി രക്തസ്രാവമുണ്ടാക്കി സ്‌ട്രോക്ക് പോലുള്ള അവസ്ഥകള്‍ക്ക് കാരണമാകുന്ന ഒന്നാണ്. ഇതിനാല്‍ തന്നെ അവഗണിച്ചു കളയേണ്ട ഒന്നല്ല ഇത്. ബിപി കൂടാന്‍ കാരണങ്ങള്‍ പലതുണ്ട്. സ്‌ട്രെസ് മുതല്‍ ജീവിത ശൈലിയും ചില ഭക്ഷണ ശീലങ്ങളും വരെ ഇതില്‍ പെടുന്നു. പലര്‍ക്കും ബിപിയ്ക്ക് മരുന്നു കഴിയ്ക്കാന്‍ മടിയാകും. എന്നാല്‍ ഒരു പരിധിയില്‍ കടന്ന് കുറയാതെ നില്‍ക്കുന്ന ബിപിയെങ്കില്‍ മരുന്നുകള്‍ ഡോക്ടറുടെ അഭിപ്രായ പ്രകാരം കഴിയ്‌ക്കേണ്ടത് അത്യാവശ്യമാണ്. മരുന്നുകള്‍ക്കു പുറമേ ജീവിതശൈലിയിലെ മാറ്റങ്ങള്‍ കൊണ്ട് ബിപി നിയന്ത്രിച്ചു നിര്‍ത്താം. അതായത് മരുന്നുകള്‍ കൂടാതെ ബിപി നിയന്ത്രണത്തിലാക്കാം എന്നര്‍ത്ഥം.

​വ്യായാമം

വ്യായാമം ബിപി നിയന്ത്രിയ്ക്കാന്‍ അത്യാവശ്യമാണ്. ദിവസവും രാവിലെ മുക്കാല്‍ മണിക്കൂര്‍ വ്യായാമം ചെയ്താല്‍ മാത്രം 5-8 മി.മീ. പ്രഷര്‍ കുറയും.വലിയ വ്യായമങ്ങള്‍ ചെയ്തില്ലെങ്കിലും നടത്തം പോലുള്ളവ ശീലമാക്കാം. നടത്തം, സൈക്ലിങ്, ജോഗിങ്, നീന്തല്‍ തുടങ്ങിയ എയ്റോബിക് വ്യായാമരീതികളാണ് നല്ലത്.ബിപി നിയന്ത്രിയ്ക്കാന്‍ നല്ലത്. ഇത് രാവിലെയോ വൈകീട്ടോ ചെയ്യാം. വ്യായാമം ചെയ്യുന്നത് ബിപി രോഗികള്‍ സ്ഥിരം ശീലമാക്കുക.

സ്‌ട്രെസ്, ടെന്‍ഷന്‍

അമിത വണ്ണം പല രോഗങ്ങള്‍ക്കുമെന്ന പോലെ ബിപിയ്ക്കുള്ള കാരണം കൂടിയാണ്. ശരീരത്തിന്റെ എല്ലാ ഭാഗത്തേയ്ക്കും രക്തം എത്തിയ്ക്കുന്നതിന് ഹൃദയത്തിന് കൂടുതല്‍ പണിപ്പെടേണ്ടി വരും. ഇത് ബിപി കൂട്ടുന്നു. അമിത ശരീരഭാരമുള്ളവരിലെ ഇന്‍സുലിന്‍ റസിസ്റ്റന്‍സ് പ്രമേഹത്തിനും കാരണമാകും. ഇതെല്ലാം രക്തധമനികളുടെ സമ്മര്‍ദം വര്‍ദ്ധിപ്പിയ്ക്കുന്നു. ബിപി കൂടുന്നു. ഇതു പോലെ തന്നെ സ്‌ട്രെസ്, ടെന്‍ഷന്‍ എന്നിവ ബിപിയ്ക്കുള്ള പ്രധാനപ്പെട്ട കാരണമാണ്. ഇത് നിയന്ത്രിച്ചു നിര്‍ത്താന്‍ ശ്രദ്ധിയ്ക്കുക. പാഷന്‍ ഫ്രൂട്ട് ഇല പ്രമേഹ, കൊളസ്‌ട്രോള്‍ മരുന്നാക്കാം

​പുകവലി, മദ്യപാന ശീലങ്ങള്‍

പുകവലി, മദ്യപാന ശീലങ്ങള്‍ ബിപിയ്ക്കുള്ള പ്രധാന കാരണമാണ്. ഇത് ഒഴിവാക്കുക. പുകയിലയിലെ നിക്കോട്ടിന്‍ ബിപി ഉയര്‍ത്തും. ഹൃദയമിടിപ്പും രക്തസമ്മര്‍ദവും വര്‍ധിപ്പിക്കും. രക്തക്കുഴലുകള്‍ ചുരുങ്ങുന്നതിനും രക്തധമനികളില്‍ ബ്ലോക്കുണ്ടാകുന്നതിനും ഇത് കാരണമാകും. അമിതമായ മദ്യ ഉപയോഗം ബിപി ഉയര്‍ത്തും.ഹൃദയാരോഗ്യത്തെ ദുര്‍ബലമാക്കും.

​ഉപ്പ്

ഉപ്പ് ബിപി ഉള്ളവര്‍ കഴിവതും ഒഴിവാക്കുക. ഉപ്പിന്റെ ഉപയോഗം കുറയ്ക്കുന്നതിലൂടെ മാത്രം രക്തസമ്മര്‍ദം 6 മി.മീ. കുറയ്ക്കാന്‍ സാധിക്കും. ഒരുദിവസം അനുവദനീയമായ ഉപ്പ് ഒരു ടീസ്പൂണ്‍ ആണ് (5 ഗ്രാം). ഒരു ഗ്രാം ഉപ്പില്‍ 400 മി.ഗ്രാം സോഡിയമാണ് അടങ്ങിയിരിക്കുന്നത്. ഒരുദിവസം 2000 മി.ഗ്രാമില്‍ കൂടുതല്‍ ഉപ്പ് കഴിയ്ക്കരുത്. ഉപ്പായിട്ട് മാത്രമല്ല, ഉപ്പടങ്ങിയ ഭക്ഷണ വസ്തുക്കള്‍ കൂടി ഉള്‍പ്പെടുത്തിയാണ് ഈ കണക്ക്. ചിപ്‌സ്, അച്ചാറുകള്‍ എന്നിവയെല്ലാം തന്നെ ഉപ്പിന്റെ അതിപ്രസരം ഉള്ളവയാണ്. ഇത് ഒഴിവാക്കുക തന്നെ വേണം.