ഒരു വര്‍ഷത്തിന് ശേഷം ഇന്ത്യ – ചൈന അതിര്‍ത്തിയില്‍ പുതിയ മുന്നേറ്റങ്ങള്‍ മാധ്യമങ്ങള്‍ റിപ്പോര്‍ട്ട് ചെയ്യുകയാണ്. ചൈന, പ്രകോപനങ്ങള്‍ക്ക് ഒപ്പം ചര്‍ച്ചകള്‍ കൂടെ ആയുധമാക്കുമ്പോള്‍ ഇന്ത്യ എങ്ങനെയാണ് പ്രതിരോധിക്കുന്നത്
ഇന്ത്യൻ സൈനിക വാഹനം – (File/Getty Images)
സംഭാഷണങ്ങളില്‍ മഞ്ഞുരുകിയില്ലെങ്കിലും മാസങ്ങള്‍കൊണ്ട് ഇന്ത്യയും ചൈനയും അയഞ്ഞു. പക്ഷേ, വീണ്ടും മഞ്ഞുകാലം വരുമ്പോള്‍ അതിര്‍ത്തിയില്‍ നിന്ന് മുറുമുറുപ്പുകള്‍ ഉയരുകയാണ്. നിയന്ത്രണരേഖയ്ക്ക് സമീപത്തായി ചൈന കോൺക്രീറ്റ് കെട്ടിടങ്ങളടങ്ങിയ സ്ഥിരം ക്യാമ്പുകൾ സ്ഥാപിക്കാനുള്ള ശ്രമത്തിലാണ്.
സിക്കിമിലെ നാകു-ലായിൽ നിന്ന് ഏതാനും കിലോമീറ്ററുകൾ മാത്രം മാറിയാണ് ഇന്ത്യയെ പ്രകോപിപ്പിക്കുന്ന തരത്തിലുള്ള ചൈനയുടെ ക്യാമ്പ് നിര്‍മ്മാണം — മുതിർന്ന സർക്കാർ വൃത്തങ്ങളെ ഉദ്ധരിച്ച് വാര്‍ത്താ ഏജൻസി എ.എൻ.ഐ. റിപ്പോർട്ട് ചെയ്യുന്നു.
താല്‍ക്കാലിക ക്യാമ്പുകളല്ല, തണുപ്പു കാലത്ത് ചൈനീസ് സൈനികർക്ക് സുരക്ഷ ഒരുക്കും വിധത്തിലുള്ള സ്ഥിരം ക്യാമ്പാണ് ഇതെന്നാണ് എ.എന്‍.ഐ റിപ്പോര്‍ട്ട്. പ്രകോപനങ്ങള്‍ തുടരുമ്പോഴും ചര്‍ച്ചകള്‍ക്കും ഒത്തുതീര്‍പ്പിനും തയാറാണെന്ന ചൈനീസ് രാഷ്ട്രീയ നേത‍ൃത്വത്തിന്‍റെ ഭാഷ്യത്തില്‍ വിശ്വസിക്കുകയാണ് ഇന്ത്യ.
നിലവില്‍ ഇരുരാജ്യങ്ങളും തമ്മില്‍ നിയന്ത്രണരേഖയെ സംബന്ധിച്ച് നിലനില്‍ക്കുന്ന സംഘര്‍ഷത്തില്‍ മുന്നോട്ടു വെക്കുന്ന ഒരു വ്യവസ്ഥയും ഇന്ത്യയ്ക്ക് സ്വീകാര്യമല്ലെന്നും കിഴക്കന്‍ ലഡാക്കില്‍ സമാധാനം പുനഃസ്ഥാപിക്കുന്നതിലൂടെ മാത്രമേ ഇരു രാജ്യങ്ങളും തമ്മിലുള്ള ബന്ധം സൗഹാര്‍ദപരമായി മുന്നോട്ടു പോകൂ എന്നും വിദേശകാര്യമന്ത്രി ഡോ.എസ്. ജയശങ്കര്‍ അറിയിച്ചു. ദുഷന്‍ബെയില്‍ എസ്.ജയശങ്കറും ചൈനയുടെ സ്റ്റേറ്റ് കൗണ്‍സിലര്‍ വാങ് യിയും തമ്മില്‍ നടന്ന കൂടിക്കാഴ്ചയിലാണ് ഇക്കാര്യങ്ങള്‍ അദ്ദേഹം വ്യക്തമാക്കിയത്.
നിലവില്‍ ഇരു രാജ്യങ്ങളും തമ്മില്‍ പരസ്പരം ഭീഷണിയുയര്‍ത്തുന്നില്ലെന്നും വികസനത്തിനായി കൈകോര്‍ക്കാനുള്ള അവസരമൊരുക്കുന്നുണ്ടെന്നുമാണ് ചൈനീസ് സ്റ്റേറ്റ് കൗൺസിലറുടെ മറുപടി.
വ്യാപാരത്തില്‍ ഇന്ത്യയും ചൈനയും തമ്മിലുള്ള രാഷ്ട്രീയ തര്‍ക്കങ്ങള്‍ക്ക് പ്രസക്തിയില്ല. 2021ലെ ആദ്യ ആറുമാസം പിന്നിടുമ്പോള്‍ ലഭിക്കുന്ന കണക്കുകള്‍ ഇരുരാജ്യങ്ങള്‍ക്കും ശുഭ സൂചനയാണ്. ഇന്ത്യ ചൈനയിലേക്ക് 14.7 ബില്യണ്‍ ഡോളറിന്‍റെ കയറ്റുമതി ചെയ്‍തപ്പോള്‍ തിരികെ ഇറക്കുമതി 42.6 ബില്യണ്‍ ഡോളറാണ്. — ബിസിനസ് ടുഡേ റിപ്പോര്‍ട്ട് ചെയ്യുന്നു.
ഗാല്‍വന്‍ മേഖലയില്‍ ഇന്ത്യയുടെ നിലപാടുകള്‍ക്ക് എതിരെ രാജ്യത്തിനകത്ത് നിന്നും കടുത്ത വിമര്‍ശനമാണ് ഉയരുന്നത്. കിഴക്കൻ ലഡാക്കിൽ നിന്നുള്ള ഇന്ത്യന്‍ സേനയുടെ പിന്മാറ്റം ഇന്ത്യയുടെ ഭൂമി ചൈനയ്ക്കു വിട്ട് നൽകിയതാണെന്ന് കോൺഗ്രസ് നേതാവ് രാഹുല്‍ ഗാന്ധി ആരോപിച്ചിരുന്നു. ചൈനയ്ക്ക് മുന്നിൽ നിൽക്കാൻ കഴിയാത്ത ഭീരുവാണ് പ്രധാനമന്ത്രി എന്നും രാഹുൽ ഗാന്ധി കുറ്റപ്പെടുത്തി.
ജൂലൈ 19ന് ആരംഭിക്കുന്ന പാര്‍ലമെന്‍റ് വര്‍ഷകാല സമ്മേളനത്തില്‍ ഇന്ത്യ – ചൈന അതിര്‍ത്തി വിഷയം ഉന്നയിക്കാന്‍ സോണിയാ ഗാന്ധിയുടെ നേതൃത്വത്തില്‍ ചേര്‍ന്ന കോണ്‍ഗ്രസ് നയ രൂപീകരണ യോഗത്തില്‍ തീരുമാനിച്ചിട്ടുണ്ട്. ഇന്ത്യ – ചൈന അതിര്‍ത്തി വിഷയം കേന്ദ്ര സര്‍ക്കാരിനെതിരെയുള്ള ശക്തമായ ആയുധമാക്കാനുള്ള തയ്യാറെടുപ്പിലാണ് പ്രതിപക്ഷ പാര്‍ട്ടികള്‍.
****
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : india china border clash galwan valley
Malayalam News from malayalam.samayam.com, TIL Network
