ഈ യൂട്യൂബറെ നിങ്ങളറിയും, ഇയാള്‍ ഇന്ത്യയുടെ കരിമ്പട്ടികയിലാണ്

അദ്ദേഹത്തിന്‍റെ ഭാര്യ മനീഷ മാലിക്ക് ഇന്ത്യക്കാരിയാണ്. ഡൽഹിയിലാണ് ഇരുവരും താമസിച്ചിരുന്നതും. തന്നേയും കുടുംബത്തെയും ഇന്ത്യൻ സർക്കാർ അകറ്റിയെന്നും പ്രശ്നം പരിഹരിക്കുന്നതിന് താൻ അയച്ച മെയിലുകൾക്കോ, ഭാര്യ കയറിയിറങ്ങിയ വിദേശകാര്യ മന്ത്രാലയ ഓഫീസുകളിൽ നിന്നോ യാതൊരു പ്രതികരണവും ലഭിച്ചില്ലെന്നും ഒമ്പത് മിനിറ്റോളം ദൈര്‍ഘ്യമുള്ള വീഡിയോയിൽ കാള്‍ പറയുന്നു.

എന്താണ് കാള്‍ റോക്കിന് സംഭവിച്ചത്?

കഴിഞ്ഞ ഒക്ടോബറിൽ ദുബായ് നിന്ന് ഇന്ത്യയിലേക്ക് പുറപ്പെട്ടപ്പോഴാണ് ഇങ്ങനെയൊരു പ്രശ്നത്തെപ്പറ്റി താൻ അറിയുന്നതെന്ന് വീഡിയോയിൽ കാൾ പറയുന്നുണ്ട്. കൂടെ ഇതിനെതിരെ ഇന്‍റർനെറ്റിലൂടെ പ്രതികരിക്കുന്ന ഒരു പെറ്റിഷൻ ഇറക്കണമെന്നും തന്‍റെ ഫോളോവേഴ്സിനോടും തന്റെ ഈ അവസ്ഥ മനസ്സിലാക്കി തന്നെ സഹായിക്കണമെന്ന് ന്യൂസിലന്റ് പ്രധാനമന്ത്രി ജസീന്ത ആർഡനോടും വീഡിയോയിൽ കാൾ അഭ്യർത്ഥിക്കുന്നു.

എന്താണ് യഥാർത്ഥത്തിൽ സംഭവിച്ചത്? രാജ്യത്താകമാനം വൈറലായ ഈ പെറ്റിഷൻ വീഡിയോക്ക് ശേഷം സമ്മർദ്ദത്തിലായ ആഭ്യന്തര വകുപ്പ് ടൈംസ് ഓഫ് ഇന്ത്യയോട് നടത്തിയ വിശദീകരണം ഇങ്ങനെ:

“അദ്ദേഹം രാജ്യത്തെ ടൂറിസ്റ്റ് വിസ മാനദണ്ഡങ്ങൾ ലംഘിച്ച് ബിസിനസ് പ്രവർത്തനങ്ങൾ നടത്തിയതിനാലാണ് അടുത്ത ഒരു വർഷത്തേക്ക് ഇന്ത്യയിൽ പ്രവേശിക്കുന്നതിൽ നിന്ന് വിലക്കിയത്”

പൗരത്വ ഭേദഗതി ബില്ലിനെതിരെയുള്ള പ്രതിഷേധങ്ങളിൽ പങ്കാളികളായ യൂട്യൂബര്‍മാരെയും വിദേശ വിദ്യാർത്ഥികളേയും മറ്റു രാജ്യങ്ങളില്‍ നിന്നുള്ള പൗരന്മാരെയും കരിമ്പട്ടികയില്‍പ്പെടുത്തിയ സംഭവങ്ങള്‍ ഉണ്ടായിരുന്നു.

2019-ലെ‍ പൗരത്വ നിയമഭേദഗതി വിരുദ്ധ പ്രക്ഷോഭങ്ങളില്‍ കാള്‍ റോക്ക് പങ്കെടുത്തിരുന്നു. ഇതാണ് ഇദ്ദേഹത്തിന് എതിരെയുള്ള നടപടിക്ക് കാരണമെന്നാണ് കരുതുന്നത്. സി.എ.എ സമരത്തിന്‍റെ ഭാഗമായതിന് നിരവധി വിദേശീയര്‍ക്ക് രാജ്യം വിടാന്‍ കേന്ദ്ര സര്‍ക്കാര്‍ നിര്‍ദേശം നല്‍കിയിരുന്നു.

ആരാണ് കാൾ റോക്ക്?

ന്യൂസിലന്‍റ് പൗരനാണെങ്കിലും ഇന്ത്യയെ സ്നേഹിക്കുന്ന കാള്‍, കേരളം ഉള്‍പ്പെടെ രാജ്യത്തെ വിവിധ പ്രദേശങ്ങളില്‍ സഞ്ചരിച്ചിട്ടുണ്ട്. ഇന്ത്യക്കാരിയായ ഭാര്യയ്ക്ക് ഒപ്പം ഡൽഹിയിൽ തന്നെയാണ് താമസവും.

മറ്റൊരു യൂട്യൂബറായ ജിം ബ്രൗണിങ്ങിനൊപ്പം ബി.ബി.സി ഡോക്യുമെന്‍ററി പദ്ധതികളില്‍ സഹകരിച്ചിട്ടുമുണ്ട്. സൈബര്‍ കുറ്റകൃത്യങ്ങള്‍, തട്ടിപ്പുകള്‍ എന്നിവയ്ക്ക് എതിരെയുള്ള വീഡിയോകളാണ് കൂടതലും അദ്ദേഹത്തെ പ്രശസ്‍തനാക്കിയത്.

യൂട്യൂബ് വീഡിയോകളിലൂടെ മാത്രമല്ല, കൊവിഡ് കാലത്ത് പ്ലാസ്മ ഡൊണേഷൻ ക്യാമ്പുകളിലെ സജീവ പ്രവർത്തനത്തിന് ഡൽഹി മുഖ്യമന്ത്രി അരവിന്ദ് കെജരിവാളിന്‍റെ അഭിനന്ദനത്തിനും അർഹനായിട്ടുണ്ട്.

ഇപ്പോഴത്തെ സംഭവങ്ങള്‍ 2019ൽ താൻ പങ്കെടുത്ത ചില സി.എ.എ വിരുദ്ധ പ്രക്ഷോഭങ്ങൾ ഒരു കാരണമായിട്ടുണ്ടോ എന്ന് അറിയില്ലെന്ന് ഇന്ത്യൻ എക്സ്പ്രസിനോട് സംസാരിക്കവെ കാൾ തന്നെ സൂചിപ്പിച്ചിട്ടുണ്ട്.

സി.എ.എ പ്രക്ഷോഭങ്ങളില്‍ കാള്‍ പങ്കെടുക്കുന്ന വീഡിയോകള്‍ ഇപ്പോൾ യൂട്യൂബിൽ ഇപ്പോള്‍ ലഭ്യമല്ല. ഇനിയെന്താണ് മുന്നോട്ട് എന്ന ചോദ്യത്തിന് “എല്ലാം ഇനി ഡൽഹി ഹൈക്കോടതി തീരുമാനങ്ങൾ അനുസരിച്ചായിരിക്കും” എന്നാണ് കാൾ, ഇംഗ്ലീഷ് വെബ്സൈറ്റ് ദ് വയെറിനോട് പ്രതികരിച്ചത്. കേസ് ഇപ്പോൾ ഡൽഹി ഹൈക്കോടതിയുടെ പരിഗണനയിലാണ്

****