കഴിഞ്ഞ നാല് വർഷത്തിനിടെ ഇത് രണ്ടാം തവണയാണ് എൻസിപി നേതൃത്വത്തെ ഞെട്ടിച്ച് അജിത് പവാർ എൻഡിഎ ക്യാമ്പിലേക്ക് എത്തുന്നത്. രണ്ടുതവണയും ഉപമുഖ്യമന്ത്രിയായി സത്യപ്രതിജ്ഞയും ചെയ്തു
ഹൈലൈറ്റ്:
- നാല് വർഷത്തിനിടെ മൂന്ന് തവണ
- ഉപമുഖ്യമന്ത്രിക്കസേരയിൽ അജിത് പവാർ
- ഇത്തവണ കാത്തിരിക്കുന്നത് എന്താകും?
പാർട്ടി പദവിയിലേക്ക് താൽപ്പര്യമില്ലെന്ന് പറഞ്ഞിരുന്ന അജിത് പവാർ നോട്ടമിടുന്നത് മഹാരാഷ്ട്രയിലെ മുഖ്യമന്ത്രി കസേരയാണെന്ന് നേരത്തെ വ്യക്തമായിരുന്നു. ബിജെപി ക്യാമ്പുമായി അദ്ദേഹം ബന്ധം പുലർത്തുന്നു എന്നതും പരസ്യമായ രഹസ്യമാണ്. 40 എംഎൽഎമാരുടെ പിന്തുണ നേടി ബിജെപി പാളയത്തിലേക്ക് പോകാൻ അജിത് പവാർ ചരടുവലി നടത്തുന്നെന്ന റിപ്പോർട്ടുകൾ കഴിഞ്ഞമാസം തന്നെ പുറത്ത് വന്നിരുന്നു.
Also Read : ഇത് പുതിയ കാര്യമല്ല, തളരില്ല; പുതിയ നേതൃനിരയുമായി മുന്നോട്ട് പോകുമെന്ന് ശരദ് പവാർ
കേരളത്തിലെ എൻസിപിയിൽ പലർക്കും അതൃപ്തിയുണ്ടെന്ന് കെ സുരേന്ദ്രൻ
2019ലാണ് ബിജെപിക്കൊപ്പം ചേർന്ന് അജിത് പവാർ ആദ്യം ഉപമുഖ്യമന്ത്രിയായി സത്യപ്രതിജ്ഞ ചെയ്യുന്നത്. നിയമസഭാ തെരഞ്ഞെടുപ്പില്‍ ശിവസേന – ബിജെപി സഖ്യത്തിനായിരുന്നു കൂടുതല്‍ സീറ്റ് ലഭിച്ചത്. എന്നാൽ മുന്നണി തർക്കത്തെ തുടർന്ന് സർക്കാർ രൂപീകരണം പ്രതിസന്ധിയിലായി. ഇതിനിടെ പ്രതിപക്ഷത്തെ കോൺഗ്രസും എൻസിപിയുമായി ചേർന്ന് സർക്കാർ രൂപീകരിക്കാൻ ശിവസേന ചർച്ചകളും ആരംഭിച്ചു. അതിനിടെയാണ് ഏവരെയും ഞെട്ടിച്ച് ബിജെപി നേതാവ് വേദേന്ദ്ര ഫഡ്‌നാവിസ് മുഖ്യമന്ത്രിയായും അജിത് പവാര്‍ ഉപമുഖ്യമന്ത്രിയായും സത്യപ്രതിജ്ഞ ചെയ്ത് സര്‍ക്കാര്‍ അധികാരമേൽക്കുന്നത്. എന്നാൽ സർക്കാരിന് ഭൂരിപക്ഷം തെളിയിക്കാനാവില്ലെന്ന് ഉറപ്പായതോടെ അജിത് പാർട്ടിയിലേക്ക് തന്നെ തിരിച്ചെത്തി. പിളർപ്പിന്‍റെ വക്കിലെത്തിയ എൻസിപിയിൽ അന്ന് കാര്യങ്ങൾ വീണ്ടും പഴയപടിയായി.
ബിജെപിക്കൊപ്പം സർക്കാർ രൂപീകരിക്കാൻ പോയ അജിത് പവാര്‍ എന്‍സിപിയിലേക്ക് തിരികെയെത്തിയതോടെ എന്‍സിപി – ശിവസേന – കോണ്‍ഗ്രസ് കൂട്ടുകെട്ടില്‍ മഹാവികാസ് അഘാഡി സഖ്യം സര്‍ക്കാര്‍ രൂപീകരിച്ചു. ശിവസേന അധ്യക്ഷന്‍ ഉദ്ധവ് താക്കറെ മുഖ്യമന്ത്രിയായപ്പോൾ ഉപമുഖ്യമന്ത്രിയായി സത്യപ്രതിജ്ഞ ചെയ്തത് ഇതേ അജിത് പവാര്‍. ദിവസങ്ങളുടെ മാത്രം ഇടവേളയില്‍ രണ്ട് പക്ഷത്തും നിന്നും അദ്ദേഹം ഉപമുഖ്യമന്ത്രിയായി ചുമതലേറ്റു. 2022ൽ ശിവസേനയിലെ ഒരുവിഭാഗത്തെ ബിജെപി അടർത്തിക്കൊണ്ട് പോകുന്നതുവരെ ഈ സര്‍ക്കാരായിരുന്നു അധികാരത്തിൽ.
Also Read : എന്‍സിപി ദേശീയ തലത്തില്‍ സ്വീകരിച്ച മാതൃക കേരളത്തിലെ നേതാക്കള്‍ക്കും പിന്തുടരാം: കെ സുരേന്ദ്രന്‍
ഏക്‌നാഥ് ഷിന്ദേയുടെ നേതൃത്വത്തിലുള്ള ശിവസേന നേതാക്കളുമായി ചേർന്ന് ബിജെപി സർക്കാർ രൂപീകരിച്ചപ്പോൾ പ്രതിപക്ഷ നേതാവായിരുന്നു അജിത് പവാർ. എന്നാൽ ഒരു വർഷം തികഞ്ഞപ്പോഴേക്ക് പ്രതിപക്ഷ നേതൃസ്ഥാനം രാജിവെച്ച് വീണ്ടും അധികാരത്തിന്‍റെ പക്ഷത്തേക്ക് അജിത് പവാർ ചേക്കേറി. വീണ്ടും ഉപമുഖ്യമന്ത്രിയായി ചുമതലയേൽക്കുകയും ചെയ്തു. നാല് വര്‍ഷത്തിനിടെ മുന്ന് വ്യത്യസ്ത മുഖ്യമന്ത്രിമാര്‍ക്കൊപ്പമാണ് അജിത് പവാര്‍ ഉപമുഖ്യമന്ത്രിയായി സ്ഥാനമേറ്റതെന്നത് മറ്റൊരു കാര്യം.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
