മുടി കൊഴിച്ചിൽ മാറ്റി മുടി ആരോഗ്യത്തോടെ വളരാൻ ആയുർവേദം പറയുന്ന വഴികൾ

​ഓയിൽ മസാജ്

കേൾക്കുമ്പോൾ തന്നെ പലർക്കും മടിയായിരിക്കും ഓയിൽ മസാജ് ചെയ്യാൻ. പക്ഷെ മുടിയുടെ ആരോഗ്യത്തിനും വളർച്ചയ്ക്കും ഓയിൽ മസാജിനുള്ള പങ്ക് വളരെ വലുതാണ്. ഹെയർ മസാജ് ചെയ്യുന്നത് രക്തചംക്രമണം വർദ്ധിപ്പിച്ച് മുടിയുടെയും തലയോട്ടിയുടെയും ആരോഗ്യം മികച്ചതാക്കാൻ സഹായിക്കുന്നു. ദിവസേന 5 മുതൽ 10 മിനിറ്റ് വരെ മസാജ് ചെയ്യുന്നത് മുടികൊഴിച്ചിൽ നിയന്ത്രിക്കാൻ വളരെയധികം സഹായിക്കും. വൈറ്റമിൻ ഇ ഓയിൽ രോമകൂപങ്ങളെ ശക്തിപ്പെടുത്തുന്നു അതുകൊണ്ട് തന്നെ മുടിയിൽ ഇത് ഉപയോഗിച്ച് മസാജ് ചെയ്യുന്നത് ധാരാളം ഗുണങ്ങൾ നൽകുന്നു. മുടികൊഴിച്ചിൽ തടയാൻ വെളിച്ചെണ്ണയും ബദാം എണ്ണയും ഉപയോഗിച്ച് മസാജ് ചെയ്യുന്നതും നല്ലതാണ്. വരണ്ട ചർമ്മത്തെ സുഖപ്പെടുത്താൻ ഇത് വളരെയധികം സഹായിക്കും.

ഭക്ഷണക്രമം

വൈറ്റമിൻ സി, സിങ്ക്, സൾഫർ, വൈറ്റമിൻ-ബി കോംപ്ലക്സ് തുടങ്ങിയ അവശ്യ ഫാറ്റി ആസിഡുകളുടെ അളവ് വർദ്ധിപ്പിക്കുക എന്നത് വളരെ പ്രധാനമാണ്. മുടിയുടെ വേരുകൾ ശക്തിപ്പെടുത്തുന്നതിന് ഇത് വളരെയധികം സഹായിക്കും. പാൽ, യീസ്റ്റ്, മോർ, ഡ്രൈ ഫ്രൂട്ട്‌സ്, സോയാബീൻ, ധാന്യങ്ങൾ എന്നിവ കഴിക്കുന്നത് മുടികൊഴിച്ചിൽ നിയന്ത്രിക്കാൻ നല്ലതാണ്. ആരോഗ്യകരവും കരുത്തുറ്റതുമായ മുടിക്ക് കറ്റാർ വാഴ ജ്യൂസും ഏറെ നല്ലതാണ്. മുടിയിൽ തേയ്ക്കുന്നത് മാത്രമല്ല, കുടിക്കുന്നതും ഏറെ​ ​ഗുണം ചെയ്യും. ഏകദേശം 3 മാസത്തേക്ക് നിങ്ങൾ കറ്റാർ വാഴ ജ്യൂസ് ദിവസത്തിൽ രണ്ടു തവണ കഴിച്ചാൽ മുടികൊഴിച്ചിൽ മാറ്റാം.

ഭൃം​ഗരാജ്

ആയുർവേദം പറയുന്ന ഏറ്റവും മികച്ചതും പ്രധാനപ്പെട്ടതുമായ എണ്ണയാണ് ഭൃംഗരാജ്. മുടിയുടെ ആരോഗ്യത്തിന് ഇത് വളരെയധികം സഹായിക്കും. ഈ എണ്ണ നേരിട്ട് തലയോട്ടിയിൽ പുരട്ടി മസാജ് ചെയ്യുന്നത് മുടി വളർച്ചയ്ക്ക് വളരെയധികം സഹായിക്കും. പനി, ജലദോശം പോലെയുള്ള പ്രശ്നങ്ങളില്ലാത്തവർ ഇത് രാത്രിയിൽ തലയിൽ പുരട്ടി രാവിലെ കഴുകി വ്യത്തിയാക്കുന്നത് നല്ലതായിരിക്കും. മുടിയ്ക്ക് ഈർപ്പം നൽകാനും, താരൻ നീക്കം ചെയ്ത് മുടി വരണ്ട് പോകുന്നത് മാറ്റാനും ഈ എണ്ണ നല്ലതാണ്. അതുപോലെ തലമുടിയിലെ അകാല നര മാറ്റി കറുപ്പ് നിറം നൽകാനും സഹായിക്കും.

തൈര്

മുടി വളരാൻ സഹായിക്കുന്ന ഏറ്റവും മികച്ചൊരു അടുക്കളയിലെ വിരുതനാണ് തൈര്. തൈര് ഉപയോഗിച്ചുള്ള പായ്ക്കുകൾ പലപ്പോഴും മുടിയ്ക്ക് നല്ല അഴകും ആരോഗ്യവും നൽകും. തൈര് കഴിക്കുന്നത് മുടികൊഴിച്ചിൽ ഗണ്യമായി കുറയ്ക്കുന്നു. നിങ്ങളുടെ ദൈനംദിന ഭക്ഷണത്തിൽ പഴങ്ങളും പച്ച ഇലക്കറികളും ഉൾപ്പെടുത്തണം. നാരുകൾ മുടികൊഴിച്ചിൽ തടയുന്നു. ഇലക്കറികളും പഴങ്ങളും നാരുകളുടെ സമ്പന്നമായ ഉറവിടങ്ങളാണ്. കാൽസ്യം, മഗ്നീഷ്യം എന്നിവയുടെ വിലയേറിയ ഉറവിടമായതിനാൽ മുടികൊഴിച്ചിൽ പ്രശ്‌നത്തിന് എള്ള് നല്ലതാണ്.

​റോസ് മേരി

മുടികൊഴിച്ചിൽ തടയാനും മുടി വളർച്ചയെ പ്രോത്സാഹിപ്പിക്കാനും ആയുർവേദ ഔഷധങ്ങൾ ഉപയോഗിക്കാം. അതിൽ പ്രധാനിയാണ് റോസ് മേരി. മുടി വളർച്ചയെ പ്രോത്സാഹിപ്പിക്കുന്നതിന് അവ തലയോട്ടിയിൽ നേരിട്ട് പ്രയോഗിക്കുന്നത് ഏറെ ഗുണം ചെയ്യും. റോസ് മേരിയിട്ട് തിളപ്പിച്ച വെള്ളം മുടിയിൽ സ്പ്രെ ചെയ്ത് മസാജ് ചെയ്യുന്നത് മുടികൊഴിച്ചിൽ മാറ്റി മുടി വളരാൻ സഹായിക്കും.

English Summary: Ayurveda remedies for hair fall

Disclaimer: പൊതുവിവരങ്ങളുടെ അടിസ്ഥാനത്തിലാണ് ലേഖനം തയാറാക്കിയിരിക്കുന്നത്. പരീക്ഷിക്കുന്നതിന് മുൻപ് പാച്ച് ടെസ്റ്റ് ചെയ്യാൻ മറക്കരുത്.

​കൂടുതൽ ബ്യൂട്ടി വാർത്തകൾ വായിക്കാൻ ഇവിടെ ക്ലിക്ക് ചെയ്യുക. ​