ഗർഭകാല ആരോഗ്യം: ശ്രദ്ധിക്കേണ്ട ചില പ്രധാന കാര്യങ്ങൾ
കുഞ്ഞിൻ്റെ വളർച്ച
21ാം ആഴ്ചയിൽ കുഞ്ഞ് ഉറങ്ങുന്നതിനും എഴുന്നേൽക്കുന്നതിനുമൊക്കെ കൃത്യമായ ഒരു സമയമുണ്ടാകാൻ തുടങ്ങും. ഇത് മാത്രമല്ല, ഗർഭപാത്രത്തിൽ കുഞ്ഞുങ്ങൾ അവർക്ക് ഇഷ്ടപ്പെട്ട രീതിയും കണ്ടെത്താറുണ്ട്. അൾട്രാസൗണ്ട് ചെയ്യുമ്പോൾ കുഞ്ഞ് വിരൾ കുടിക്കുന്നത് കാണാൻ സാധിക്കും. കുഞ്ഞിൻ്റെ ദഹനവ്യവസ്ഥ വികസിച്ചു കൊണ്ടിരിക്കുകയാണ് ചെറിയ അളവിൽ അമ്നിയോട്ടിക് ദ്രാവകം വിഴുങ്ങാൻ കഴിയും, അത് കുടലിൽ ആഗിരണം ചെയ്യാൻ കഴിയും. കുഞ്ഞിന്റെ കരളും പ്ലീഹയും രക്തകോശങ്ങൾ ഉണ്ടാക്കുന്നു, ഇപ്പോൾ അസ്ഥിമജ്ജയും രക്തകോശ രൂപീകരണത്തിന് സഹായിക്കുന്നു. കരളും പ്ലീഹയും ജനനത്തിനുമുമ്പ് ഈ രക്തകോശങ്ങളുടെ ഉത്പാദനം നിർത്തും. 21ാം ആഴ്ചയെന്ന് പറയുന്നത് 5 മാസമാണ്.
21ാം ആഴ്ചയിൽ ലക്ഷണങ്ങൾ
നടുവേദന- നടുവേദന ഗർഭകാലത്ത് വളരെ സാധാരണമാണ്. 21 ആഴ്ച ഗർഭിണിയായിരിക്കുമ്പോൾ, അമ്മമാരുടെ വയർ വളരുകയാണ്. ഇത് ഗുരുത്വാകർഷണ കേന്ദ്രത്തെ മാറ്റുകയും പുറകോട്ടും മുന്നോട്ടും വലിക്കുകയും ചെയ്യുന്നു, ഇത് വേദനയ്ക്കും കാരണമാകും. റിലാക്‌സിൻ എന്ന ഹോർമോൺ പെൽവിക് ഏരിയയിലെ സന്ധികളെയും അസ്ഥിബന്ധങ്ങളെയും അയവുള്ളതാക്കുന്നു, ഇത് ഡെലിവറി സമയമാകുമ്പോൾ പെൽവിസിനെ വികസിപ്പിക്കാൻ അനുവദിക്കും.
നെഞ്ചെരിച്ചിൽ – ഗർഭകലാത്തെ മറ്റൊരു സാധാരണ ലക്ഷണമാണ് നെഞ്ചെരിച്ചിൽ. ആമാശയത്തിലെ ആസിഡുകളുടെ അമിതമായ ഉത്പ്പാദനമാണ് ഇതിൻ്റെ പ്രധാന കാരണം. ഗർഭധാരണ ഹോർമോണുകൾ അന്നനാളത്തിനും ആമാശയത്തിനും ഇടയിലുള്ള വാൽവിനെ അയവുവരുത്തുന്നു, ഇത് അന്നനാളത്തിലേക്ക് ചില ആമാശയ ആസിഡ് ചോർച്ചയ്ക്ക് കാരണമാകുന്നു.
ചൂട് – അമിതമായ ചൂട് തോന്നുന്നത് ഗർഭകാലത്ത് വളരെ സാധാരണമാണ്. ഗർഭാവസ്ഥയിലെ ഹോർമോണുകൾ ശരീരത്തിലെ മെറ്റബോളിസം വർധിപ്പിക്കുകയും ശരീരത്തിൽ ചൂട് കൂടാനുള്ള കാരണമാവുകയും ചെയ്യും. അയഞ്ഞ വസ്ത്രങ്ങൾ ധരിച്ചും ധാരാളം വെള്ളം കുടിച്ചും ശരീരത്തിൽ തണുപ്പ് നിലനിർത്തുന്നുണ്ടെന്ന് ഉറപ്പാക്കുക. എപ്പോഴും ചൂട് ഉണ്ടാകാതിരിക്കാൻ ശ്രമിക്കുക.
Also Read: കുഞ്ഞ് വളരുകയാണ്, ഗർഭകാലത്തിൻ്റെ 20ാം ആഴ്ചയിലെ പ്രത്യേകതകൾ
സ്ട്രെച്ച് മാർക്ക്സ് – ഗർഭകാലത്ത് വയറിലും ശരീരത്തിലെ മറ്റ് ഭാഗങ്ങളിലും സ്ട്രെച്ച് മാർക്ക് ഉണ്ടാകുന്നത് സ്വാഭാവികമാണ്. ശരീരത്തിൽ മാറ്റങ്ങൾ വരുന്നത് അനുസരിച്ച് ചർമ്മത്തിൽ വരുന്ന മാറ്റങ്ങളാണ് ഇതിന് കാരണം. ഇത് കൂടാതെ ചർമ്മത്തിൽ അമിതമായി ചൊറിച്ചിലും അനുഭവപ്പെടാം. ഇത് മാറ്റാൻ മോയ്ചറൈസർ ഉപയോഗിക്കാൻ ശ്രമിക്കുക.
കാല് വേദന – രണ്ടാം ട്രൈമസ്റ്ററിൽ മിക്ക അമ്മമാരും നേരിടുന്ന പ്രധാന പ്രശ്നമാണ് കാല് വേദന. രാത്രി കാലങ്ങളിലായിരിക്കും ഈ വേദന കൂടുതലായി അനുഭവപ്പെടുന്നത്. രാത്രി ഉറങ്ങുന്നതിന് മുൻപ് കൃത്യമായി സ്ട്രെച്ച് ചെയ്യുക, ധാരാളം വെള്ളം കുടിക്കുക, ചെറു ചൂട് വെള്ളത്തിൽ കുളിക്കാൻ ശ്രമിക്കുക എന്നിവ വേദന കുറയ്ക്കാൻ നല്ലതാണ്.
വേദനകൾ – രണ്ട്, മൂന്ന് ട്രൈമസ്റ്ററുകളിൽ പൊതുവെ പെട്ടെന്ന് ചില വേദനകൾ ഉണ്ടാകാനുള്ള സാധ്യത വളരെ കൂടുതലാണ്. പ്രസവ വേദനയാണോ എന്ന സംശയിക്കുന്ന പോലത്തെ ഇത്തരം വേദനകളെ ഭയക്കേണ്ട ആവശ്യമില്ല. ഇത് പ്രസവത്തിനായി ശരീരത്തെ തയാറെടുപ്പിക്കുന്നതാണ്.
English Summary: 21 weeks pregnancy
Disclaimer: പൊതു വിവരങ്ങളുടെ അടിസ്ഥാനത്തിലാണ് ലേഖനം തയാറാക്കിയിരിക്കുന്നത്. എന്തെങ്കിലും ബുദ്ധിമുട്ടുകൾ ഉള്ളവർ ഡോക്ടറെ കാണാൻ ശ്രദ്ധിക്കുക.
കൂടുതൽ അമ്മ കുഞ്ഞ് വാർത്തകൾ വായിക്കാൻ ഇവിടെ ക്ലിക്ക് ചെയ്യുക.
