മുഖത്ത് മൂത്രമൊഴിച്ച സംഭവത്തിൽ പ്രതി അറസ്റ്റിൽ; വെളിപ്പെട്ടത്‌ ആദിവാസികളോടുള്ള ബിജെപിയുടെ യഥാർഥ സമീപനമെന്ന് രാഹുൽ

ശുക്ലയ്ക്കെതിരെ ദേശീയ സുരക്ഷാ നിയമപ്രകാരം കേസെടുത്തതായും പോലീസ് അറിയിച്ചു. മധ്യപ്രദേശിലെ സിദ്ധി ജില്ലയിലാണ് ഇത്തരത്തിൽ ഞെട്ടിക്കുന്ന സംഭവമുണ്ടായിരിക്കുന്നത്. പ്രതിയുടെ അറസ്റ്റിന് തൊട്ടുപിന്നാലെ തന്നെ രാഷ്ട്രീയ ആരോപണങ്ങളും ഉയർന്നിട്ടുണ്ട്. പ്രവേശ് ശുക്ല സിദ്ധി എംഎൽഎ കേദാർനാഥ് ശുക്ലയുടെ അടുത്തയാളാണെന്ന് ആരോപിച്ച് കോൺഗ്രസ് രംഗത്തുവന്നു. എംഎൽഎക്കൊപ്പം നിൽക്കുന്ന ചിത്രങ്ങൾ സഹിതമാണ് കോൺഗ്രസ് ആരോപണം ഉന്നയിച്ചത്.

ഈ സംഭവം ആദിവാസികൾക്കും ദളിതർക്കുമെതിരെയുള്ള ബിജെപിയുടെ യഥാർത്ഥ സമീപനം വ്യക്തമാക്കുന്നതാണെന്നും കോൺഗ്രസ് നേതാവ് രാഹുൽ ഗാന്ധി ആരോപിച്ചു.

ബിജെപി ഭരണത്തിന് കീഴിൽ ആദിവാസി സഹോദരങ്ങൾക്കെതിരേയുള്ള അതിക്രമങ്ങൾ വർധിച്ചുവരികയാണ്. മധ്യപ്രദേശിൽ ഒരു ബിജെപി നേതാവിന്റെ മനുഷ്യത്വരഹിതമായ കുറ്റകൃത്യം മനുഷ്യരാശിയെ ഒന്നാകെ ലജ്ജിപ്പിക്കുന്നതാണ്. ആദിവാസികളോടും ദളിതരോടുമുള്ള ബിജെപിയുടെ വെറുപ്പിന്റെ അറപ്പുളവാക്കുന്ന യഥാർത്ഥ മുഖമാണിതെന്നും രാഹുൽ തന്റെ ട്വീറ്റിലൂടെ പ്രതികരിച്ചു.

അതേസമയം, പ്രവേശ് ശുക്ല ബിജെപി നേതാവാണെന്ന ആരോപണം തള്ളി ബിജെപി രംഗത്തുവന്നു. ഇയാൾ പാർട്ടിയുടെ ഔദ്യോഗിക സ്ഥാനങ്ങൾ ഒന്നും വഹിക്കുന്നില്ലെന്നും എന്തിന് അംഗത്വം പോലുമില്ലെന്നും എംഎൽഎ പറഞ്ഞു.

Also Read : ശക്തി കാണിച്ച് അജിത് പവാർ; ശരദ് പവാറിനൊപ്പം 13 പേർ മാത്രം; മഹാരാഷ്ട്രയിൽ ഇനി എന്ത്?

സംഭവം ശ്രദ്ധയിൽപെട്ടയുടനെ തന്നെ പ്രതിയെ പിടികൂടാൻ മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാൻ നിർദ്ദേശിച്ചിരുന്നു. ഐപിസി 294, 504 വകുപ്പുകൾ പ്രകാരമുള്ള കുറ്റങ്ങളാണ് ഇയാൾക്ക് മേൽ ചുമത്തിയിരിക്കുന്നത്. കുബ്രിയിലെ വീട്ടിൽ നിന്ന് പുലർച്ചെ 2.30ഓടെയാണ് ഇയാളെ പൊലീസ് പിടികൂടുന്നത്.

Read Latest National News and Malayalam News