മുഖ്യമന്ത്രി സ്ഥാനമൊഴിയാൻ യെദ്യൂരപ്പ? പ്രധാനമന്ത്രിയെ രാജിസന്നദ്ധത അറിയിച്ചതായി സൂചന

ബെംഗളൂരു: മുഖ്യമന്ത്രി സ്ഥാനത്ത് നിന്ന് മാറാൻ ഒരുക്കമാണെന്ന് ബി എസ് യെദ്യൂരപ്പ പ്രധാനമന്ത്രി നരേന്ദ്ര മോദിയെ അറിയിച്ചതായി റിപ്പോർട്ട്. പ്രധാനമന്ത്രി നിർദേശിച്ചാൽ മുഖ്യമന്ത്രി സ്ഥാനം ഒഴിയാൻ തയ്യാറാണെന്ന് അദ്ദേഹം അറിയിച്ചതായി വിവിധ മാധ്യമങ്ങൾ റിപ്പോർട്ട് ചെയ്തു.



കൊവിഡ്: അടുത്ത 125 ദിവസം രാജ്യത്തിന് നിര്‍ണായകമെന്ന് കേന്ദ്രം; വിവരങ്ങൾ പങ്കുവച്ച് നീതി ആയോഗ്

കർണാടക മുഖ്യമന്ത്രിയുമായി ബന്ധപ്പെട്ട രാജി വാർത്തകൾ പുറത്തുവന്നെങ്കിലും ഔദ്യോഗിക സ്ഥിരീകരണം ഉണ്ടായിട്ടില്ല. ആരോഗ്യ പ്രശ്നങ്ങൾ ചൂണ്ടിക്കാട്ടിയാണ് യെദ്യൂരപ്പ രാജി സന്നദ്ധത പ്രധാനമന്ത്രിയെ അറിയിച്ചതെന്ന് ഒരു ദേശീയ മാധ്യമം റിപ്പോർട്ട് ചെയ്തു. പ്രധാനമന്ത്രിയുമായുള്ള കൂടിക്കാഴ്ചയിൽ യെദ്യൂരപ്പ ഉപാധികൾ മുന്നോട്ട് വെച്ചതായും സൂചനകളുണ്ട്. പാർട്ടിയിലോ സർക്കാരിലോ മക്കൾക്ക് ഉചിതമായ പദവികൾ വേണമെന്ന ആവശ്യമാണ് അദ്ദേഹത്തിനുള്ളത്.

ഇതിനിടെ യെദ്യൂരപ്പയ്ക്ക് ഗവർണർസ്ഥാനം കേന്ദ്ര സർക്കാർ വാഗ്ദാനം ചെയ്തതായുള്ള റിപ്പോർട്ടുകളും പുറത്തുവരുന്നുണ്ട്. മുഖ്യമന്ത്രി സ്ഥാനത്ത് നിന്ന് മാറിനിൽക്കാൻ ഒരുക്കമല്ലെന്ന് മുൻപ് വ്യക്തമാക്കിയെങ്കിലും തൻ്റെ ആവശ്യങ്ങൾ പരിഗണിച്ചാൽ രാജിക്ക് ഒരുക്കമാണെന്നാണ് യെദ്യൂരപ്പയുടെ നിലവിലെ നിലപാടെന്നാണ് റിപ്പോർട്ട്.

ആരാണ് പ്രശാന്ത് കിഷോര്‍?

മന്ത്രിസഭ പുനഃസംഘടന ചർച്ചകൾ തുടരുന്നതിനിടെയാണ് യെദ്യൂരപ്പ മകനൊപ്പം പ്രത്യേക വിമാനത്തിൽ ഡൽഹിയിലെത്തി പ്രധാനമന്ത്രിയുമായി കൂടിക്കാഴ്ച നടത്തിയത്. എംഎൽഎമാരടക്കം കർണാടക ബിജെപിയിലെ ഒരു വിഭാഗം യെദ്യൂരപ്പയ്ക്കെതിരെ രംഗത്തുവന്നിരുന്നു. മകൻ വിജയേന്ദ്രയാണ് സർക്കാരിനെയും ഭരണകാര്യങ്ങളെയും നിയന്ത്രിക്കുന്നതെന്നാണ് ഇവരുടെ ആരോപണം.

2019 ജൂലൈ 24നാണ് കർണാടക മുഖ്യമന്ത്രി സ്ഥാനത്തേക്ക് യെദ്യൂരപ്പ എത്തിയത്. ഈ ജൂലൈ 24ന് രണ്ട് വർഷം തികയുന്നതിനിടെയാണ് പാർട്ടിയിൽ പ്രശ്നങ്ങൾ രൂക്ഷമായത്.