2021 ഒക്ടോബർ മാസത്തിൽ മാതൃഭൂമിയില്‍ ബിജു പരവത്ത് എഴുതിയ ലേഖനത്തിലും 5924 ക്വാറികളുടെ കണക്ക് പറയുന്നുണ്ട്. ഇതിന്റെ സോഴ്സായി പറയുന്നത് ‘ഏറ്റവും പുതിയ റിപ്പോർട്ടുകൾ’ ആണ്. അഥവാ കൃത്യമായ സോഴ്സ് കാണുന്നില്ല. 2018ലെ പ്രളയത്തിനു ശേഷംമാത്രം 223 പുതിയ ക്വാറികൾ സംസ്ഥാന സർക്കാർ അനുവദിച്ചെന്നും മാതൃഭൂമി റിപ്പോർട്ട് പറയുന്നു.
പ്രശസ്ത പരിസ്ഥിതി പ്രസിദ്ധീകരണമായ മോംഗാബേയിലും ഇതേ കണക്ക് കാണാം. സംസ്ഥാനത്ത് 5924 ക്വാറികൾ പ്രവർത്തിക്കുന്നുവെന്ന് 2020 നവംബർ 30ന് കെഎ ഷാജി എഴുതിയ ലേഖനത്തിലാണ് ഈ കണക്ക് പറയുന്നത്. എന്നാൽ, മൈനിങ് ആൻഡ് ജിയോളജി വകുപ്പ് അനുമതി കൊടുത്ത് പ്രവർത്തിക്കുന്നത് 750 ക്വാറികളാണെന്നും അദ്ദേഹം ലേഖനത്തിൽ സൂചിപ്പിക്കുന്നുണ്ട്. അഥവാ, ബാക്കി വരുന്ന 5174 ക്വാറികൾ അനധികൃതമായി പ്രവർത്തിക്കുന്നവയാണ്. മറ്റുചില റിപ്പോർട്ടുകൾ പറയുന്നതു പ്രകാരം 5174 അനധികൃത ക്വാറികളിൽ 4000വും പ്രവർത്തിക്കുന്നത് പശ്ചിമഘട്ടമലനിരകളിലാണ്.
5174 അനധികൃത ക്വാറികളോ?
സംസ്ഥാനത്താകെ ആറായിരത്തോളം അനധികൃത ക്വാറികൾ. അതിൽ നാലായിരവും പ്രവർത്തിക്കുന്നത് പശ്ചിമഘട്ട മലനിരകളിൽ. ഒരു പഞ്ചായത്തിൽ ശരാശരി അഞ്ചിലധികം ക്വാറികളെന്ന തരത്തിൽ വരുന്ന ഈ ഭീമമായ കണക്ക് കാണുന്ന മാത്രയിൽത്തന്നെ ആർക്കു മനസ്സിലാകുന്ന ഒരു കാര്യമുണ്ട്. ഇത്രയധികം ക്വാറികൾ അനധികൃതമായോ അധികൃതമായോ പ്രവർത്തിക്കുന്നുണ്ടെങ്കിൽ അവ നമ്മളോരോരുത്തരുടെയും കൺമുന്നിൽ ഏത് യാത്രാസന്ദർഭത്തിലും വന്നുപെടും. മാത്രവുമല്ല, ഇത്രയേറെ ക്വാറികൾക്ക് രഹസ്യമായി പ്രവർത്തിക്കുക എന്നത് ഒരു കാരണവശാലും സാധ്യമല്ല. അത് ജനങ്ങളറിയും. മാധ്യമങ്ങളറിയും. അത്രയേറെ റിപ്പോർട്ടുകളും വസ്തുതകൾ ചൂണ്ടിക്കാട്ടി പുറത്തുവരും. അത് ഇതുവരെ സംഭവിച്ചിട്ടില്ല.
കേരളത്തിൽ അനധികൃത ക്വാറികളില്ല എന്ന് വാദിക്കുന്നത് പിഴവായിരിക്കും. എന്നാൽ ഇത്രയധികം ക്വാറികൾ സംസ്ഥാനത്തെ ഭരണകക്ഷികളെയും പ്രതിപക്ഷ കക്ഷികളെയും കബളിപ്പിച്ച്, കേന്ദ്ര-സംസ്ഥാന സർക്കാരുകളെ കബളിപ്പിച്ച്, നിരവധിയായ കേന്ദ്ര-സംസ്ഥാന സ്ഥാപനങ്ങളെ കബളിപ്പിച്ച്, ഫോറസ്റ്റ് ഡിപ്പാർട്ടുമെന്റിനെ കബളിപ്പിച്ച് പ്രവർത്തിക്കുന്നു എന്നാണ് മനസ്സിലാക്കേണ്ടത്. ഇതിനെക്കാളെല്ലാമുപരി, പരസ്പരം മത്സരിക്കുന്ന നിരവധിയായ പത്ര-ടെലിവിഷൻ-ഓൺലൈൻ മാധ്യമങ്ങളുടെ കണ്ണിലും ഇത്രയും ഭീമമായ ഒരു പ്രകൃതിവിഭവ ചൂഷണം പെട്ടിട്ടില്ല എന്നതാണ്. കേരളത്തിലെ ഓരോ മുക്കിലും മൂലയിലും പ്രാദേശികലേഖകരുള്ള നിരവധി മാധ്യമങ്ങൾ നമുക്കുണ്ട്. അവർ താന്താങ്ങളുടെ പഞ്ചായത്തിലെ അനധികൃത ക്വാറിയിങ് റിപ്പോർട്ടു ചെയ്താൽ മാത്രംമതി അയ്യായിരമായാലും ആറായിരമായാലും ജനങ്ങളുടെ മുമ്പിലെത്തിക്കാൻ. അത് ഇതുവരെ സംഭവിക്കാത്തത് എന്തുകൊണ്ടാണെന്ന് ആരും ആലോചിച്ചുപോകും.
സംസ്ഥാന സർക്കാരിന്റെ കണക്കെന്ത്?
സർക്കാർ പറയുന്നതനുസരിച്ച് ആകെ 639 സജീവമായ ക്വാറികളാണ് സംസ്ഥാനത്തുള്ളത്. ഇതിൽത്തന്നെ ഗ്രാനൈറ്റ് പൊട്ടിച്ചെടുക്കുന്ന ക്വാറികളുടെ എണ്ണം 552 ആണ്. ഏറ്റവുംകൂടുതൽ ക്വാറികളുള്ള ജില്ല മലപ്പുറമാണ്. രണ്ടാംസ്ഥാനത്ത് പാലക്കാടും മൂന്നാംസ്ഥാനത്ത് കോഴിക്കോടും വരുന്നു.
അനൗദ്യോഗിക കണക്കുകൾ?
കെഎഫ്ആർഐയിലെ ശാസ്ത്രജ്ഞനായ ടിവി സജീവനും അലക്സ് സിജെയും ചേർന്ന് നടത്തിയ പഠനം പറയുന്നത് 5924 ക്വാറികളുണ്ടെന്നാണ്. ഇതെല്ലാം ഗ്രാനൈറ്റ് ക്വാറികളാണ്. 7157.6 ഹെക്ടർ ഏരിയയിലാണ് ഈ ക്വാറികൾ പ്രവർത്തിക്കുന്നത്. മധ്യകേരളത്തിലാണ് ഏറ്റവും കൂടുതൽ ക്വാറികളുള്ളതെന്ന് പഠനം പറയുന്നുണ്ട്. ആകെ 2438 ക്വാറികൾ ഈ മേഖലയിലുണ്ട്. വടക്കൻകേരളത്തിൽ 1969ഉം, തെക്കൻ കേരളത്തിൽ 1517ഉം ക്വാറികളുണ്ട്. ജില്ലാടിസ്ഥാനത്തിൽ നോക്കിയാൽ പാലക്കാട് ജില്ലയിലാണ് ഏറ്റവുമധികം ക്വാറികളുള്ളത്. 867 എണ്ണം. സർക്കാരിന്റെ കണക്കുകൾ പ്രകാരം മലപ്പുറം ജില്ലയിലാണ് കൂടുതൽ ക്വാറികളുള്ളത്. കേരളത്തിലെ ഏറ്റവും വലിയ ഗ്രാനൈറ്റ് ക്വാറിയുള്ളത് തൃശ്ശൂർ ജില്ലയിലാണ്. ആകെ 64.04 ഹെക്ടറിൽ പരന്നുകിടക്കുന്ന ഭീമൻ ക്വാറിയാണിത്.
കേരളത്തിലെ 50.6 ശതമാനം ക്വാറികളും 0.02 – 0.5 ഹെക്ടറിനുള്ളിൽ വലിപ്പം വരുന്നവയാണ്. 35.7 ശതമാനം ക്വാറികളാകട്ടെ s 0.5 – 2 ഹെക്ടറിനുള്ളിൽ വലിപ്പമുള്ളവയാണ്. 10 ഹെക്ടറിനു മുകളിലുള്ള പ്രദേശത്ത് ക്വാറിയിങ് നടക്കുന്നത് 73 ഇടങ്ങളിലാണ്. ഇവയുടെ മൊത്തെ ഏരിയ കണക്കാക്കിയാൽ 1308.2 ഹെക്ടർ വരും.
20 ഹെക്ടറിനു മുകളിൽ ഏരിയ വരുന്ന 19 ക്വാറികൾ കേരളത്തിലുണ്ട്.
ഈ ക്വാറികളെല്ലാം സജീവമാണോ?
ഇക്കാര്യത്തിൽ പഠിതാക്കൾക്കും വ്യക്തതയില്ല എന്നതാണ് വസ്തുത. പഠനത്തിന്റെ ഉപസംഹാരത്തിൽ പഠിതാക്കൾ പറയുന്നത് ഇങ്ങനെയാണ്: “ഈ പഠനം അവതരിപ്പിക്കുന്നത് കേരളത്തിലെ ഗ്രനൈറ്റ് ക്വാറികളെക്കുറിച്ചുള്ള അസംസ്കൃത വിവരങ്ങളാണ്. ഇവ ശേഖരിച്ചിരിക്കുന്നത് അകലെനിന്ന് ക്വാറികളെ തിരിച്ചറിയാൻ ഉപകരിക്കുന്ന ഉപാധികളുപയോഗിച്ചാണ്. ഇക്കാരണത്താൽത്തന്നെ ഈ ക്വാറികളെല്ലാം ഇപ്പോൾ സജീവമാണോ അല്ലയോ എന്ന് തിരിച്ചറിയുക അസാധ്യമായിരുന്നു.” ചുരുക്കത്തിൽ കേരളത്തിൽ ആറായിരത്തോളം ക്വാറികൾ എന്ന മാധ്യമ തലക്കെട്ടുകളിൽ ചെറിയൊരു പിഴവുണ്ടായിരുന്നെന്ന് കാണണം. ഈ ക്വാറികളെല്ലാം ഇപ്പോൾ പ്രവർത്തനത്തിലുണ്ടോ എന്ന് അത്തരം തലക്കെട്ടുകൾ (വാർത്തകളും) സൂചിപ്പിക്കുന്നില്ല. തികച്ചും തെറ്റിദ്ധാരണാജനകമായിരുന്നു അവയെല്ലാം.
സർക്കാർ പറയുന്നത് സംസ്ഥാനത്താകെ സജീവമായ 552 ഗ്രാനൈറ്റ് ക്വാറികളേ ഉള്ളൂ എന്നാണ്. മറിച്ചാണ് വസ്തുതയെങ്കിൽ അത് തെളിയിക്കുന്ന യാതൊരു സാമഗ്രിയും നിലവിൽ ലഭ്യമല്ല. വളരെ പ്രശസ്തമായ പരിസ്ഥിതി പ്രസിദ്ധാീകരണങ്ങളിൽപ്പോലും ഈ തെറ്റിദ്ധാരണ ജനിപ്പിക്കുന്ന വിവരം വ്യാപകമായി ഉപയോഗിക്കപ്പെട്ടിരുന്നുവെന്നത്, ഇപ്പോഴും ഉപയോഗിക്കപ്പെടുന്നുവെന്നത് അതിശയകരമാണ്.
