‘പണ്ട്’ ഉണ്ടാക്കിയ വാക്സിൻ ‘പുതിയ’ കൊവിഡിനെ നേരിടുമോ?

ഭാരത് ബയോടെക്കിന്‍റെ കൊവാക്സിൻ, ഓക്സഫഡ് ആസ്ട്രാ സെനേക്ക വാക്സിന്‍ ഇന്ത്യയില്‍ സെറം ഇൻസ്റ്റിറ്റ്യൂട്ട് നിര്‍മ്മിക്കുന്ന കൊവിഷീൽഡ്, റഷ്യയുടെ സ്‍പുട്‍നിക് — മൂന്നു വാക്സിനുകളാണ് ഇന്ത്യയിൽ നിലവില്‍ വിതരണം ചെയ്യുന്നത്.

യു.എസ് വാക്സിനുകളായ മൊഡേണ, ഫൈസര്‍ എന്നിവ ഇന്ത്യയില്‍ എത്തുമെന്ന് റിപ്പോര്‍ട്ടുകളുണ്ടെങ്കിലും നിലവില്‍ ലഭ്യമല്ല.

കേന്ദ്ര സർക്കാര്‍ കണക്കനുസരിച്ച് 39,96,95,879 ഡോസ് വാക്സിനുകളാണ് രാജ്യത്ത് ഇതുവരെ നൽകിയത്. അതായത് ഒരു ഡോസ് സ്വീകരിച്ചവർ ജനസംഖ്യയുടെ 22.9 ശതമാനവും രണ്ട് ഡോസും സ്വീകരിച്ചവർ വെറും 5.7 ശതമാനവും മാത്രം.

വാക്സിനുകളും ഫലപ്രാപ്തിയും

ഇന്ത്യയിൽ ഏറ്റവും കൂടുതൽ ഉപയോഗിക്കുന്ന കൊവാക്സിൻ, കൊവിഷീൽഡ് എന്നിവയുടെ രണ്ട് ഡോസ് വാക്സിനുകൾ മാരകമായ ഡെൽറ്റ വകഭേദം പ്രതിരോധിക്കും. മരണ സാധ്യതയിൽ നിന്ന് 95% വരെ സംരക്ഷണം നൽകുമെന്നും നിതി ആയോഗ് മന്ത്രാലയത്തിലെ ഡോ. വി.കെ പോൾ പറയുന്നു.

കൊവി‍ഡ് രണ്ടാം തരംഗം ആഞ്ഞടിച്ച ഏപ്രിൽ, മെയ്, ജൂൺ മാസങ്ങളിൽ ഐ.സി,എം,ആര്‍ നേതൃത്വം നല്‍കിയ പഠനങ്ങൾക്ക് ശേഷമാണ് കേന്ദ്ര ആരോഗ്യ മന്ത്രാലയം ഇത്തരമൊരു നിരീക്ഷണത്തിൽ എത്തിയത്.

ഇതിൽ ആസ്ട്രാ സെനേക (കൊവിഷീൽഡ്) വാക്സിന്‍ കൊവിഡിന്‍റെ ആൽഫാ, ഡെൽറ്റ വകഭേദങ്ങളെ കനത്ത രീതിയിൽ പ്രതിരോധിക്കുകയും 92% വരെ ആശുപത്രിവാസം ഒഴിവാക്കാന്‍ സഹായിക്കുമെന്നും പബ്ലിക് ഹെൽത്ത് ഇംഗ്ലണ്ട് (PHE) റിപ്പോർട്ടും സ്ഥിരീകരിക്കുന്നു.

തമിഴ്നാട്ടിൽ 1,17,525 പോലീസുകാർക്കിടയിൽ നടത്തിയ ഒരു പഠനം വാക്സിൻ സ്വീകരിച്ചവർ, സ്വീകരിക്കാത്തവർ, ഒരു ഡോസ് മാത്രം സ്വീകരിച്ചവർ എന്നിങ്ങനെ തരം തിരിച്ചിരുന്നു.

ഇതിൽ ഒരു ഡോസ് മാത്രം സ്വീകരിച്ച 32,792 പോലീസുകാർക്കിടയിൽ ഏഴ് മരണം റിപ്പോർട്ട് ചെയ്തപ്പോൾ രണ്ടു ഡോസും സ്വീകരിച്ച 67,673 പേരിൽ നാല് മരണം മാത്രമാണ് സംഭവിച്ചത്.

“നമ്മൾ നടത്തിയ പഠനങ്ങളിൽ നിന്ന് വ്യക്തമാകുന്നത്, ഒരു ഡോസ് മാത്രം സ്വീകരിച്ചവർക്ക് 82 ശതമാനവും രണ്ട് ഡോസും സ്വീകരിച്ചവർക്ക് 95 ശതമാനവും സുരക്ഷയാണ് വാക്സിനുകൾ നൽകുന്നത് എന്നാണ്. കൊവിഡ് ഏറ്റവും മാരകമായ അവസ്ഥയിൽ നടത്തിയ ഈ പഠന റിപ്പോർട്ടുകൾ അതിനാൽത്തന്നെ വിശ്വസിക്കാവുന്നതുമാണ്” ഡോ. പോൾ കൂട്ടിച്ചേർക്കുന്നു.

റഷ്യന്‍ നിര്‍മ്മിത സ്‍പുട്‍നിക് വാക്സിന്‍ ആല്‍ഫ, ബീറ്റ, ഗാമ, ഡെല്‍റ്റ വകഭേദങ്ങളെ പ്രതിരോധിക്കുമെന്നാണ് റഷ്യയില്‍ തന്നെ നടന്ന ഒരു ഗവേഷണ റിപ്പോര്‍ട്ട് വ്യക്തമാക്കിയത്. റഷ്യയിലെ ഗമാലയ റിസര്‍ച്ച് ഇൻസ്റ്റിറ്റ്യൂട്ട് ഓഫ് എപ്പിഡമോളജി ആൻഡ് മൈക്രോ ബയോളജിയാണ് പഠനം നടത്തിയത്.

വാക്സിന്‍ നിര്‍മ്മാതാക്കള്‍ നടത്തിയ പരീക്ഷണത്തില്‍ സ്‍പുട്‍നിക് 90 ശതമാനം ഫലപ്രദമാണെന്ന് കണ്ടെത്തിയിരുന്നു – റോയിറ്റേഴ്‍സ് റിപ്പോര്‍ട്ട് ചെയ്യുന്നു. മെഡിക്കല്‍ ജേണല്‍, ദ് ലാൻസെറ്റ് നടത്തിയ പഠനത്തിലും സ്‍പുട്‍നിക് ഫലപ്രദമായി പുതിയ വകഭേദങ്ങളെ നേരിടുന്നതായി കണ്ടെത്തി. ഇടക്കാല പരീക്ഷണത്തില്‍ സ്‍പുട്‍നിക് ഡെല്‍റ്റ വകഭേദത്തിന് എതിരെ മാത്രം ഏതാണ്ട് 91.6 ശതമാനം ഫലപ്രാപ്‍തി കാണിക്കുന്നുണ്ടെന്നാണ് ജേണല്‍ റിപ്പോര്‍ട്ട് ചെയ്യുന്നത്.

ഇന്ത്യയിലെ മാത്രമല്ല, ലോകത്താകമാനമുള്ള കണക്കുകളെടുത്താലും വാക്സിനേഷൻ വലിയ തോതിൽ മരണ നിരക്ക് കുറച്ചു എന്നാണ് ഗവേഷകര്‍ പറയുന്നത്.

“മുൻപത്തെ അപേക്ഷിച്ച് ഡെൽറ്റ വകഭേദം വേഗത്തിൽ പടരുന്നതും ആശുപത്രിയിൽ പ്രവേശിപ്പിക്കുന്നവരുടെ എണ്ണത്തിൽ വർധനവ് വരുത്തുന്നതും ആണെങ്കിലും ഇതുമൂലം മരിക്കുന്നവരുടെ എണ്ണം വളരെ കുറവാണ്, ആസ്ട്രാ സെനേക (കൊവിഷീൽഡ്), ഫൈസർ മുതലായ വാക്സിനുകളാണ് അത് സാധ്യമാക്കിയത്” അന്താരാഷ്ട്ര മെഡിക്കൽ ജേണല്‍, ദ് ലാൻസെറ്റ് റിപ്പോർട്ട് ചെയ്യുന്നു.

ഈ വിഷയത്തിൽ ലോകാരോഗ്യ സംഘടനയുടെ ഔദ്യോഗിക പ്രസ്താവനയിൽ പറയുന്നത് ഇങ്ങനെ:

“നിലവിൽ ഉപയോഗിക്കുന്നതും ഇപ്പോഴും പരീക്ഷണം നടക്കുന്നതുമായ വാക്സിനുകളൊന്നും ഏതെങ്കിലും ഒരു വൈറസിനെതിരെ പൊരുതാൻ വേണ്ടി മാത്രമുള്ളതല്ല, ഇവയെല്ലാം വ്യത്യസ്തമായ പല തരത്തിലുള്ള ആന്‍റിബോഡികൾ സൃഷ്ടിച്ച് ഒരു കൂട്ടം വൈറസുകൾക്കെതിരെയുള്ള പ്രതിരോധം തീർക്കാൻ കെൽപ്പുള്ളവയാണ്. അതിനാൽത്തന്നെ വൈറസുകൾക്ക് സംഭവിക്കുന്ന രൂപമാറ്റങ്ങൾ വാക്സിനുകളുടെ കാര്യക്ഷമതയെയും വിശ്വാസ്യതയെയും പൂർണമായി ഇല്ലാതാക്കും എന്ന് കരുതാൻ കഴിയില്ല”

2020 ഒക്ടോബറിൽ ഇന്ത്യയിൽ സ്ഥിരീകരിച്ച ഡെൽറ്റ വകഭേദം പെട്ടെന്നായിരുന്നു നൂറോളം രാജ്യങ്ങളിലേക്ക് വ്യാപിച്ചത്. എന്നാൽ ഇന്ത്യയിൽ പിന്നേയും ഇതിന് രൂപമാറ്റം സംഭവിക്കുകയും ഡെൽറ്റ പ്ലസ് എന്ന പേരിൽ ആരോഗ്യ വിദഗ്‍ധർ വൈറസ് വകഭേദത്തെ പഠനവിധേയമാക്കുകയും ചെയ്തു.

ലോകാരോഗ്യ സംഘടനയുടേയും ഐ.എം.എ യുടെയും റിപ്പോർട്ടുകൾ പ്രകാരം മൂന്നാം തരംഗം നിർണയിക്കുന്നതിൽ അടുത്ത 100 ദിവസം നിർണായകമാകും.

****