റോയിറ്റേഴ്സ് ഫോട്ടോഗ്രഫര്‍ ഡാനിഷ് സിദ്ദിഖി, ഇന്ത്യയിലെ ഏറ്റവും മികച്ച ഫോട്ടോ ജേണലിസ്റ്റുകളില്‍ ഒരാളായിരുന്നു. പക്ഷേ, ഡാനിഷിന്‍റെ മരണം ചിലര്‍ ആഘോഷിച്ചു, സോഷ്യൽ മീഡിയയിൽ വിദ്വേഷം നിറച്ചു. എന്തുകൊണ്ട്?
ഡാനിഷ് സിദ്ദിഖിയെ ഓർമ്മിക്കുമ്പോൾ. Photo: ANI
“ആരാണ് മാധ്യമപ്രവര്‍ത്തകനെ വധിച്ചതെന്ന് തങ്ങള്‍ക്ക് അറിയില്ല. മാധ്യമപ്രവര്‍ത്തകര്‍ ആരെങ്കിലും യുദ്ധം നടക്കുന്ന മേഖലയിലേക്ക് കടന്നാല്‍ അക്കാര്യം ഞങ്ങളെ അറിയിക്കാറുണ്ട്, അവര്‍ക്ക് ആവശ്യമുള്ള സുരക്ഷ നല്‍കാറുമുണ്ട്” — താലിബാന്‍ വക്താവ് സാബിനുള്ള മുജാഹിദ് പറഞ്ഞതായി വിവിധ മാധ്യമങ്ങള്‍ റിപ്പോര്‍ട്ട് ചെയ്തു.
ഡാനിഷ് സിദ്ദിഖിയുടെ മരണത്തില്‍ താലിബാന്‍ ദുഖം രേഖപ്പെടുത്തുന്നതായും വക്താവ് പറഞ്ഞു.
ഇന്ത്യയിലെ റോയിറ്റേഴ്സ് ചീഫ് ഫോട്ടോഗ്രഫറായിരുന്നു സിദ്ദിഖി. അദ്ദേഹത്തിന്‍റെ മരണത്തിന് പിന്നാലെ വലതുപക്ഷ ട്വിറ്റര്‍ ഹാന്‍ഡിലുകളും മാധ്യമങ്ങളും സിദ്ദിഖിയുടെ മരണം ആഘോഷിക്കാന്‍ ശ്രമിച്ചു — വിവിധ മാധ്യമപ്രവര്‍ത്തകര്‍ ആരോപിക്കുന്നു.
കടുത്ത ബി.ജെ.പി വിമര്‍ശകരായ മാധ്യമപ്രവര്‍ത്തകര്‍ റാണാ അയൂബ്, മുഹമ്മദ് സുബൈര്‍ എന്നിവര്‍ ഇത് ട്വീറ്റുകളിലൂടെ ചൂണ്ടിക്കാണിച്ചു.
“യാഥാര്‍ത്ഥ്യം തുറന്നു കാണിച്ചതിന് വലതുപക്ഷം അദ്ദേഹത്തെ വെറുക്കുന്നു. അധികാരങ്ങളുടെ ദുര്‍വ്യയം തുറന്നുകാട്ടിയതിന് വലതുപക്ഷം അദ്ദേഹത്തെ വെറുക്കുന്നു. മൃതദേഹങ്ങളോട് അപമര്യാദ കാണിച്ച അധികാരികള്‍ക്ക് മുന്നില്‍ സമൂഹത്തിന്‍റെ കണ്ണാടിയായി മാറിയ അദ്ദേഹത്തെ വലതുപക്ഷം വെറുക്കുന്നു. സര്‍ക്കാര്‍ അവരുടെ കടമ നിര്‍വഹിക്കാത്തത് ചൂണ്ടികാണിച്ചതിന് വലതുപക്ഷം അദ്ദേഹത്തെ വെറുക്കുന്നു. ആദരാഞ്ജലികള്‍ ഡാനിഷ് സിദ്ദിഖി.” –മുഹമ്മദ് സുബൈര്‍ ട്വീറ്റ് ചെയ്തു.
ഇന്ത്യയിലെ വലതുപക്ഷം ഡാനിഷ് സിദ്ദിഖിയുടെ മരണത്തില്‍ സന്തോഷിക്കുന്നതായി മാധ്യമപ്രവര്‍ത്തകയായ റാണാ അയൂബ് ട്വീറ്റ് ചെയ്തു. ഡാനിഷ് ധീരമൃത്യു വരിച്ചെന്നും നിങ്ങള്‍ പണം കൊടുത്ത് പടുവേല ചെയ്യിക്കുന്നവര്‍ക്ക് നിങ്ങളുടെ ഐഡന്‍റിറ്റി പുറത്തുവിടാനുള്ള ചങ്കൂറ്റം ഇല്ലെന്നും റാണാ അയൂബ് ആരോപിച്ചു. അനോണിമസ് ആയി ബി.ജെ.പി അനുകൂല ഉള്ളടക്കങ്ങള്‍ ട്വീറ്റു ചെയ്യുന്ന ഒരു അക്കൗണ്ട് റീട്വീറ്റ് ചെയ്‍തായിരുന്നു അയൂബ് പരാമര്‍ശം നടത്തിയത്.
കൊവിഡ് രണ്ടാം തരംഗം ഇന്ത്യയെ പിടിച്ചുലച്ച് കാലത്ത് ഡാനിഷ് സിദ്ദിഖിയുടെ ചിത്രങ്ങള്‍ അന്താരാഷ്ട്ര തലത്തില്‍ ശ്രദ്ധിക്കപ്പെട്ടിരുന്നു. ഡല്‍ഹിയിലെ ഒരു മൈതാനം നിറയെ ചിതകള്‍ കത്തുന്ന ഒരു ഫോട്ടോ റോയിറ്റേഴ്സിന് വേണ്ടി സിദ്ദിഖി പകര്‍ത്തി. ഇത് സ്വന്തം സോഷ്യല്‍ മീഡിയ അക്കൗണ്ടിലും അദ്ദേഹം പോസ്റ്റ് ചെയ്തിരുന്നു. ഏറെ ശ്രദ്ധിക്കപ്പെട്ട ഈ ഫോട്ടോയാണ് സര്‍ക്കാര്‍ അനുകൂലികളായ വലതുപക്ഷത്തെ സിദ്ദിഖിക്ക് എതിരെയുള്ള വിദ്വേഷ പോസ്റ്റുകള്‍ക്ക് പ്രേരിപ്പിച്ചത് — പലരും വാദിക്കുന്നു.
സിദ്ദിഖിയുടെ മരണവാര്‍ത്ത വന്നതിന് പിന്നാലെ റാണ അയൂബ് വിമര്‍ശിച്ച അതേ ട്വിറ്റര്‍ അക്കൗണ്ടില്‍ നിന്നും ഡാനിഷിനെ പരിഹസിക്കുന്ന തരത്തില്‍ ട്വീറ്റ് പ്രത്യക്ഷപ്പെട്ടിരുന്നു.
“നിങ്ങളുടെ അന്ത്യ കര്‍മ്മങ്ങള്‍ക്ക് ആരും ഡ്രോണ്‍ പറത്തില്ലെന്ന് ഞാന്‍ പ്രതീക്ഷിക്കുന്നു. എല്ലാവരും മരണത്തില്‍ അന്തസ് അര്‍ഹിക്കുന്നു.” — ഇതായിരുന്നു എമിനെന്‍റ് ഇന്‍റലെക്ച്വൽ എന്ന പേരിലുള്ള അക്കൗണ്ട് ട്വീറ്റ് ചെയ്‍തത്.
ആരാണ് ഡാനിഷ് സിദ്ധിഖി?
ലോകത്തിന്‍റെ കണ്ണുതുറപ്പിക്കുന്ന ചിത്രങ്ങളാണ് ഡാനിഷ് സിദ്ദിഖി പകര്‍ത്തിയത്. മാധ്യമ പ്രവര്‍ത്തനത്തിന് അമേരിക്കയില്‍ നല്‍കുന്ന ഏറ്റവും വലിയ പുരസ്‌കാരമാണ് പുലിറ്റ്സര്. മ്യാന്മറിലെ റോഹിങ്ക്യൻ അഭയാര്‍ഥികളുടെ ദുരിതജീവിതം ലോകത്തിന് മുന്നില്‍ എത്തിച്ചതിനായിരുന്നു 2018-ല്‍ ഡാനിഷ് സിദ്ദിഖിക്ക് പുലിറ്റ്സര് പുരസ്കാരം ലഭിച്ചത്.
‘തളര്‍ന്ന് അവശയായ ഒരു സ്ത്രീയുടെ നിസ്സഹായാവസ്ഥ ഈ ചിത്രത്തിലൂടെ നിങ്ങള്‍ക്കു കാണാന്‍ സാധിക്കും. പിന്നില്‍ എന്താണു സംഭവിക്കുന്നതെന്നറിയാതെ. ഇതാണു ലോകത്തെ കാണിക്കാന്‍ ഞാന്‍ ആഗ്രഹിച്ച ഫ്രെയിം’ — പുലിറ്റ്സര് പുരസ്കാരം നേടിയ ചിത്രത്തെക്കുറിച്ച് പിന്നീട് ഡാനിഷ് സിദ്ദിഖി പറഞ്ഞു.
കിഴക്കന്‍ ഡല്‍ഹിയിലെ കലാപകാലത്ത് ഒരു മുസ്ലിം യുവാവിനെ ഹിന്ദുത്വവാദികള്‍ കൂട്ടംചേര്‍ന്ന് മര്‍ദ്ദിക്കുന്ന ചിത്രം ഡാനിഷ് പകര്‍ത്തിയിരുന്നു. ഇന്ത്യയിലെ ഹിന്ദു ഭൂരിപക്ഷവും മുസ്ലിം ന്യൂനപക്ഷവും തമ്മിലുള്ള ഏറ്റുമുട്ടലിന്‍റെ അപകടം ഉയര്‍ത്തിക്കാട്ടുന്ന കലാപകാലത്തെ ചിത്രങ്ങള്‍ അന്താരാഷ്ട്ര തലത്തില്‍ വലിയ ചര്‍ച്ചയായി.
1983 മെയ് 19-നാണ് അഹ്മദ് ഡാനിഷ് സിദ്ദിഖി ജനിച്ചത്. ഡല്‍ഹിയിലെ ജാമിയ മിലിയ ഇസ്ലാമിയ സര്‍വകലാശാലയില്‍ നിന്നാണ് മാസ് കമ്മ്യൂണിക്കേഷനില്‍ ബിരുദാനന്തര ബിരുദം നേടിയത്.
ഹിന്ദുസ്ഥാന്‍ ടൈംസ് ദിനപത്രത്തിന്‍റെയും ടിവി ടുഡേ ചാനലിന്‍റെയും ലേഖകനായി പ്രവര്‍ത്തിച്ചതിന് ശേഷമാണ് 2010-ല്‍ റോയിറ്റേഴ്‍സില്‍ ചേര്‍ന്നത്. അഫ്ഗാനിസ്ഥാനിലെയും ഇറാഖിലെയും യുദ്ധങ്ങള്‍, റോഹിങ്ക്യൻ പ്രതിസന്ധി, ഹോങ്കോങ്ങിലെ ജനാധിപത്യ അനുകൂല പ്രതിഷേധം, ഇന്ത്യയിലെ കൊവിഡ് പ്രതിസന്ധി, കര്‍ഷക സമരം തുടങ്ങിയ വിഷയങ്ങള്‍ ക്യാമറയിലൂടെ പകര്‍ത്തി.
“പിന്തുടരുന്ന കഥകളെക്കുറിച്ച് ആഴത്തില്‍ മനസിലാക്കുകയും, സൂക്ഷ്മമായ ഗവേഷണം നടത്തിയതിന് ശേഷം മാത്രം ചിത്രങ്ങള്‍ ക്യാമറയില്‍ പകര്‍ത്തുകയും ചെയ്യും. വാര്‍ത്തകളില്‍ ഉള്‍പെടുന്ന ആളുകളില്‍ എല്ലായിപ്പോഴും അദ്ദേഹം ശ്രദ്ധ കേന്ദ്രീകരിക്കുകയും ചെയ്തിരുന്നു”– ഡാനിഷ് സിദ്ധിഖിനെ കുറിച്ച് സുഹൃത്തുക്കളുടേയും സഹപ്രവര്‍ത്തകരുടേയും വാക്കുകള്‍.
“ഈ മേഖലയില്‍ പല പരീക്ഷണങ്ങളും നടത്തിയാണ് തനിയെയാണ് ഞാന്‍ ഫോട്ടോഗ്രാഫിയുടെ തൊണ്ണൂറു ശതമാനവും പഠിച്ചത്.”– ഡാനിഷ് സിദ്ധിഖി ഒരിക്കല്‍ എഴുതി.
****
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : hindutva trolls on reuters photographer danish siddiqui killed in afghanistan taliban attack
Malayalam News from malayalam.samayam.com, TIL Network
