ന്യൂനപക്ഷ സ്കോളർഷിപ്പ്: വിഡി സതീശനെതിരെ ലീഗ്; മലക്കം മറിഞ്ഞ് പ്രതിപക്ഷ നേതാവ്

തിരുവനന്തപുരം: ന്യൂനപക്ഷ സ്കോളര്‍ഷിപ്പിൻ്റെ പേരിലുള്ള വിവാദങ്ങള്‍ക്കു ശേഷം സര്‍ക്കാര്‍ സ്വീകരിച്ച നടപടികള്‍ക്ക് പിന്നാലെ പ്രതിപക്ഷത്ത് കടുത്ത ആശയക്കുഴപ്പം. സംസ്ഥാന സര്‍ക്കാരിൻ്റെയും എൽഡിഎഫിൻ്റെയും നിലപാടിനു സമാനമായ പ്രതികരണം ഇന്നലെ പ്രതിപക്ഷ നേതാവ് വിഡി സതീശൻ നടത്തിയതോടെ എതിര്‍പ്പുമായി ലീഗ് രംഗത്തെത്തുകയായിരുന്നു. ഇതിനു പിന്നാലെ സതീശൻ നിലപാട് തിരുത്തി.



ഹൈക്കോടതി ഉത്തരവിനു പിന്നാലെ വന്ന മാറ്റങ്ങള്‍ മൂലം മുസ്ലീം സമുദായത്തിനു നഷ്ടമുണ്ടായതായി താൻ പറഞ്ഞിട്ടില്ലെന്നും ഈ വാര്‍ത്ത വാസ്തവവിരുദ്ധമാണെന്നുമായിരുന്നു ഇന്നു രാവിലെ വിഡി സതീശൻ കോട്ടയത്ത് പറഞ്ഞത്. മുസ്ലീം വിഭാഗത്തിനുള്ള സ്കോളര്‍ഷിപ്പ് വിഹിതം കുറയ്ക്കാതെ മറ്റു സമുദായങ്ങള്‍ക്കുള്ള സ്കോളര്‍ഷിപ്പ് വിഹിതം വര്‍ധിപ്പിച്ച നടപടിയെ സ്വാഗതം ചെയ്യുന്നുവെന്നും അദ്ദേഹം പറഞ്ഞു. ലീഗിൻ്റെ ആവശ്യം യുഡിഎഫ് ചര്‍ച്ച ചെയ്യുമെന്നും സതീശൻ വ്യക്തമാക്കി.

Also Read: സംസ്ഥാനത്ത് ഇപ്പോൾ റവന്യൂ മന്ത്രിയുണ്ടോ? ഉദ്യോഗസ്ഥയ്ക്കെതിരായ നടപടിയിൽ പരിഹാസം

ന്യൂനപക്ഷ സ്കോളര്‍ഷിപ്പിൽ മുസ്ലീം സമുദായത്തിനു നഷ്ടമുണ്ടായെന്നായിരുന്നു ഇന്നലെ കാസര്‍കോട് വെച്ച് വിഡി സതീശൻ പറഞ്ഞത്. എന്നാൽ ഇന്ന് കോട്ടയത്ത് വെച്ച് അദ്ദേഹം അഭിപ്രായം തിരുത്തുകയായിരുന്നു. ഏതെങ്കിലും സമുദായത്തിനു നഷ്ടമുണ്ടാകുന്നില്ലെന്നായിരുന്നു വിവാദമായ 80:20 അനുപാതത്തെ സ്വാഗതം ചെയ്തു കൊണ്ട് സതീശൻ്റെ വാക്കുകള്‍. ഇതിനു പിന്നാലെയായിരുന്നു മുസ്ലീം ലീഗിൻ്റെ വിമര്‍ശനം. ഹൈക്കോടതി വിധി മുസ്ലീം സമുദായത്തിനു നഷ്ടമില്ലെന്നാണ് സതീശൻ്റെ നിലപാടെങ്കിൽ അത് തെറ്റാണെന്ന് ഇടി മുഹമ്മദ് ബഷീര്‍ എംപി പറഞ്ഞു. അനുപാതം എടുത്തു നീക്കുന്നതോടെ മുസ്ലീം സമുദായത്തിൻ്റെ പിന്നോക്കാവസ്ഥ പരിഹരിക്കാൻ സച്ചാര്‍ കമ്മീഷൻ നല്‍കിയ നിര്‍ദേശം ഇല്ലാതായെന്നും ഇടി മുഹമ്മദ് ബഷീര്‍ പറഞ്ഞു.

Also Read: മുഖ്യമന്ത്രി സ്ഥാനമൊഴിയാൻ യെദ്യൂരപ്പ? പ്രധാനമന്ത്രിയെ രാജിസന്നദ്ധത അറിയിച്ചതായി സൂചന

സ്കോളര്‍ഷിപ്പിൻ്റെ നൂറു ശതമാനവും മുസ്ലീം വിദ്യാര്‍ഥികള്‍ക്ക് അവകാശപ്പെട്ടതാണെന്നും വിഎസ് സര്‍ക്കാര്‍ കൊണ്ടുവന്ന 80:20 അനുപാതം തെറ്റാണെന്നും ഇടി പറഞ്ഞതായി ഏഷ്യാനെറ്റ് ന്യൂസ് റിപ്പോര്‍ട്ട് ചെയ്തു.. ഇത്തരത്തിൽ മുസ്ലീം വിഭാഗങ്ങള്‍ക്ക് അനുവദിച്ച സ്കോളര്‍ഷിപ്പ് എല്ലാ ന്യൂനപക്ഷങ്ങള്‍ക്കുമായി അനുവദിച്ചു നല്‍കിയ നടപടിയാണ് ഹൈക്കോടതി റദ്ദാക്കിയതെന്നും ഈ തെറ്റ് തിരുത്തി സ്കോളര്‍ഷിപ്പ് പുനസ്ഥാപിക്കണമെന്നും ഇടി മുഹമ്മദ് ബഷീര്‍ ആവശ്യപ്പെട്ടു. ഇക്കാര്യം പ്രതിപക്ഷ നേതാവിന് മനസ്സിലായിട്ടുണ്ടോ എന്നറിയില്ല. സച്ചാര്‍ കമ്മീഷൻ റിപ്പോര്‍ട്ടിലെ ശുപാര്‍ശകളൊന്നും നടപ്പാകില്ലെന്ന അവസ്ഥയാണ് കേരളത്തിലുള്ളതെന്നും ഇക്കാര്യം പ്രതിപക്ഷ നേതാവും സര്‍ക്കാരും തിരിച്ചറിയണമെന്നും അദ്ദേഹം ചാനലിനോടു പറഞ്ഞു.

അതേസമയം, ലീഗിൻ്റെ പ്രതികരണത്തിനു പിന്നാലെ വിഡി സതീശൻ വിശദീകരണത്തിൽ വ്യക്തത വരുത്തി. ന്യൂനപക്ഷ സ്കോളര്‍ഷിപ്പിൽ ലീഗിൻ്റെ അഭിപ്രായം യുഡിഎഫ് ചര്‍ച്ച ചെയ്യുമെന്നും വിഡി സതീശൻ വ്യക്തമാക്കി. സ്കോളര്‍ഷിപ്പുകളുടെ എണ്ണം കുറയില്ലെന്നാണ് താൻ ഉദ്ദേശിച്ചതെന്നും ലീഗിൻ്റെ അഭിപ്രായം തന്‍റെ പ്രതികരണം മനസ്സിലാക്കാതെയാണെന്നുമാണ് സതീശൻ പറയുന്നത്. പ്രതിപക്ഷം നല്‍കിയ ഫോര്‍മുല സര്‍ക്കാര്‍ ഭാഗികമായി അംഗീകരിച്ചിട്ടുണ്ടെന്നും എന്നാൽ മുസ്ലീം വിഭാഗത്തിനായി മാത്രം കൊണ്ടുവന്ന പദ്ധതി ഇല്ലാതായതോടെ അവര്‍ക്ക് നഷ്ടമുണ്ടായി എന്നത് വ്യക്തമാണെന്നും സതീശൻ വ്യക്തമാക്കി. അതേസമയം, സതീശൻ്റെ നിലപാടിൽ ലീഗിനുള്ളിൽ അതൃപ്തിയുണ്ടെന്നാണ് റിപ്പോര്‍ട്ടുകള്‍.

മുസ്ലീം വിഭാഗത്തിൻ്റെ പിന്നോക്കാവസ്ഥ പരിഹരിക്കാനായി സച്ചാര്‍ കമ്മിറ്റി റിപ്പോര്‍ട്ടിൻ്റെ അടിസ്ഥാനത്തിലാണ് സ്കോളര്‍ഷിപ്പ് കൊണ്ടുവന്നത്. എന്നാൽ ഇതിനെതിരെ ഹൈക്കോടതി വിധി വന്നതോടെ സര്‍ക്കാര്‍ സ്വീകരിക്കുന്ന നിലപാട് ഈ ശുപാര്‍ശകളെ അട്ടിമറിക്കുന്നതാണെന്നാണ് ലീഗിൻ്റെ പക്ഷം. എന്നാൽ ഹൈക്കോടതി വിധി നടപ്പാക്കണമെന്നും സര്‍ക്കാര്‍ തീരുമാനത്തെ പിന്തുണയ്ക്കണമെന്നുമാണ് കോൺഗ്രസ് നേതാക്കളുടെ വികാരം. ഇക്കാര്യത്തിലാണ് ലീഗും കോൺഗ്രസും തമ്മിലുള്ള ഭിന്നത.