ജ​ഗന് വെല്ലുവിളിയായി സഹോദരി; വിവേകാനന്ദ റെഡ്ഡി കൊലക്കേസിൽ സിബിഐയ്‌ക്ക് നിർണായക സാക്ഷി മൊഴി നൽകി വൈ എസ് ഷർമിള

മറ്റൊരു ബന്ധുവും വൈഎസ്ആർ കോൺഗ്രസ് കഡപ്പ എംപിയുമായ വൈഎസ് അവിനാഷ് റെഡ്ഡിയ്ക്കും പിതാവ് വൈഎസ് ഭാസ്കർ റെഡ്ഡിയ്ക്കുമെതിരാണ് മൊഴി നൽകിയിരിക്കുന്നത്. ജൂൺ 30ന് പ്രാദേശിക സിബിഐ കോടതിയിൽ സമർപ്പിച്ച രണ്ടാം അനുബന്ധ അന്തിമ റിപ്പോർട്ടിൽ ഇവർ ഇരുവരും പ്രതികളായിരുന്നു. കേസിൽ എട്ടും ഏഴും പ്രതികളാക്കിയാണ് സിബിഐ കേസ് അന്വേഷിക്കുന്നത്.

തന്റെ കുടുംബവും വൈ എസ് അവിനാഷ് റെഡ്‌ഡിയുടെ കുടുംബവുമായി പ്രശ്നങ്ങളുണ്ടായിരുന്നെന്നാണ് രഹസ്യ സാക്ഷിയായി വൈ എസ് ഷർമിള സിബിഐയോട് പറഞ്ഞു. രഹസ്യമൊഴി ഷർമിളയുടേതെന്ന് വ്യക്തമാക്കിയാണ് കോടതിയിൽ സിബിഐ അന്തിമ കുറ്റപത്രം സമർപ്പിച്ചത്.

ജഗന്റേയും ഷർമിളയുടേയും പിതാവ് വൈ എസ് രാജശേഖര റെഡ്ഡിയുടെ സഹോദരൻ വിവേകാനന്ദ റെഡ്ഡിയെ ആസുത്രണം ചെയ്ത് കൊലപ്പെടുത്തുകയായിരുന്നുവെന്നാണ് സിബിഐ കുറ്റപത്രത്തിൽ പറയുന്നത്. കടപ്പ ലോക്സഭാ സീറ്റ് ജഗന്റെ അമ്മ വൈ എസ് വിജയമ്മയ്‌ക്കോ, ഷർമിളയ്‌ക്കോ നൽകണമെന്ന് വിവേകാനന്ദ റെഡ്ഡി വാദിച്ചിരുന്നു. ഇതാണ് കൊലയ്ക്കിടയാക്കിയതെന്നാണ് സിബിഐ വാദം.

പ്രതി ഭാസ്കർ റെഡ്ഡിയുടെ സഹോദരിപുത്രിയാണ് ജഗന്റെ ഭാര്യ ഭാരതി. ജഗന്റെ അടുത്ത അനുയായിയാണ് അവിനാശ് റെഡ്ഡി. ഇപ്പോൾ സഹോദരി തന്നെ അടുത്ത അനുയായികൾക്കെതിരെ മൊഴി നൽകിയത് ജഗൻ മോഹൻ റെഡ്ഡിക്ക് കനത്ത തിരിച്ചടിയാണെന്നാണ് റിപ്പോർട്ട്.

Also Read : കൽക്കരി കുംഭകോണം: ഐഎഎസ് ഉദ്യോഗസ്ഥ അറസ്റ്റിൽ, ആഡംബര വാഹനങ്ങൾ, ആഭരണങ്ങൾ, പണവും കണ്ടുകെട്ടി

2017ൽ വിവേകാനന്ദ റെഡ്ഡിയെ എംഎൽസി തെരഞ്ഞെടുപ്പിൽ തോൽപിച്ചതിന് പിന്നിൽ ഭാസ്കർ റെഡ്ഡിയും മകൻ അവിനാശ് റെഡ്ഡിയുമാണെന്നും ശർമിളയുടെ മൊഴിയിൽ പറയുന്നു. തന്റെ കുടുംബവുമായി ഭാസ്കർ റെഡ്ഡിക്ക് പ്രശ്നങ്ങളുണ്ടെന്നും രണ്ട് മാസങ്ങൾക്ക് മുൻപ് വിവേകാനന്ദ റെഡ്ഡി തന്നെ വന്ന് കണ്ട് കടപ്പ സീറ്റിൽ മത്സരിക്കണമെന്ന് ആവശ്യപ്പെട്ടതായും എന്നാൽ, സഹോദരൻ സീറ്റ് തരുമെന്ന് ഉറപ്പില്ലായിരുന്നുവെന്നും ശർമിളയുടെ മൊഴിയിൽ പറയുന്നു.

Read Latest National News and Malayalam News