വൈറ്റമിന്‍ സി സെറം രാവിലെയോ രാത്രിയിലോ പുരട്ടേണ്ടത്?
Authored by Saritha PV | Samayam Malayalam | Updated: 22 Jul 2023, 7:11 pm
ഇന്നത്തെ കാലത്ത് ചര്‍മസംരക്ഷണത്തിന് ഉപയോഗിയ്ച്ച് വരുന്ന ഒന്നാണ് വൈറ്റമിന്‍ സി സെറം. ഇത് രാവിലെയോ രാത്രിയിലോ ഏറ്റവും നല്ല ഗുണം നല്‍കുന്നതെന്നറിയൂ.
വൈറ്റമിന്‍ സി സെറം
വൈറ്റമിന്‍ സി സെറം ശരിയായ രീതിയില്‍ ഉപയോഗിച്ചില്ലെങ്കില്‍ അതിന്റേതായ ദോഷങ്ങളുമുണ്ടാകും. ഇത് ഉപയോഗിയ്ക്കുന്നതിനും ഇത് സൂക്ഷിയ്ക്കുന്നതിനും വരെ ഇതിന്റേതായ വഴികളുണ്ട്. ചിലര്‍ വൈറ്റമിന്‍ സി സെറം രാവിലെ പുരട്ടും, മറ്റു ചിലരാകട്ടെ, രാത്രിയിലും. വാസ്തവത്തില്‍ ഏത് സമയത്താണ് വൈറ്റമിന്‍ സി സെറം പുരട്ടാന്‍ നല്ലതെന്ന കാര്യം പലര്‍ക്കും സംശയമുള്ള ഒന്നാണ്.
രാവിലെ
രാവിലെയും രാത്രിയിലും ഇത് പുരട്ടുന്നതിന് അതിന്റേതായ ഗുണങ്ങളുണ്ട്. രാവിലെ ഇത് പുരട്ടുമ്പോള്‍ ഇതിലെ വൈറ്റമിന്‍ സി ചര്‍മത്തെ സൂര്യന്റെ അള്‍ട്രാവയലറ്റ് രശ്മികളില്‍ നിന്നും സംരക്ഷിയ്ക്കുന്നു. ഇതു പോലെ അന്തരീക്ഷ മലിനീകരണം, ഫ്രീ റാഡിക്കലുകള്‍ എന്നിവയില്‍ നിന്നും ഇത് ചര്‍മത്തെ സംരക്ഷിയ്ക്കും.
കടുത്ത വെയിലില്‍
എന്നാല്‍ വല്ലാതെ കടുത്ത വെയിലില്‍, സൂര്യപ്രകാശത്തില്‍ സമ്പര്‍ക്കത്തില്‍ വരുന്ന സമയത്ത് വൈറ്റമിന്‍ സിയ്ക്ക് ഇത് തടയാന്‍ സാധിയ്ക്കില്ലൈന്ന മാത്രമല്ല, നിങ്ങള്‍ക്കുള്ളത് സെന്‍സിറ്റീവ് ചര്‍മമെങ്കില്‍ ഇത് ദോഷം വരുത്തുകയും ചെയ്യുന്നു. ഇത് ചര്‍മത്തിന് ചിലപ്പോള്‍ അസ്വസ്ഥതകളുണ്ടാക്കിയേക്കാം. ഇതിനാല്‍ ഇത്തരം കടുത്ത വെയിലില്‍ ഇറങ്ങുന്നത് നേരത്തെ തന്നെ ഇത് പുരട്ടണം. അതായത് ഇത് പൂര്‍ണമായും ചര്‍മം വലിച്ചെടുക്കാന്‍ സാധിയ്ക്കുന്ന വിധത്തിലാകണം.
രാത്രി
പകലേക്കാള്‍ രാത്രിയാണ് വൈറ്റമിന്‍ സി പുരട്ടാന്‍ നല്ലതെന്നതാണ് വാസ്തവം. ഇത് സൂര്യപ്രകാശവുമായുള്ള അലര്‍ജിയുണ്ടാക്കുന്നില്ലെന്ന് മാത്രമല്ല, ചര്‍മത്തിന്റെ റിപ്പയറിംഗ് നടക്കുന്ന രാത്രി ഉറക്ക സമയത്ത് ഇത് ചര്‍മത്തിലുണ്ടാകുന്നത് കൂടുതല്‍ ഗുണകരമാണ്. ഇത് ചര്‍മത്തിലെ ചുളിവുകളും വരകളുമെല്ലാം തടയാന്‍ സഹായിക്കുന്നു. ഇതിനാല്‍ തന്നെ ഇത് കിടക്കുന്നതിന് മുന്‍പായി പുരട്ടുന്നതാണ് നല്ലത്.
പുരട്ടാന്‍
ഇത് പുരട്ടാന്‍ ആദ്യം അല്‍പ തുള്ളികള്‍ എടുത്ത് ചര്‍മത്തില്‍ കണ്ണിനടയില്‍ ഒഴികെ എല്ലാ ഭാഗത്തും പുരട്ടുക. തീരെ കുറവോ വല്ലാതെ കൂടുതലോ എടുക്കരുത്. കൂടുതല്‍ എടുത്താല്‍ ചര്‍മത്തിന് അസ്വസ്ഥതയുണ്ടാകാം. ഇത് മുഖത്ത് പുരട്ടി അല്‍പനേരം കഴിഞ്ഞ ശേഷം മോയിസ്ചറൈസര്‍ പുരട്ടണം.
രാവിലെ ഇത് പുരട്ടിയാല്‍ മോയിസ്ചറൈസര്‍ പുരട്ടിയ ശേഷം സണ്‍സ്‌ക്രീന്‍ പുരട്ടാന്‍ മറക്കരുത്. അല്ലെങ്കില്‍ ചര്‍മത്തില്‍ കരുവാളിപ്പ് പോലുള്ള പ്രശ്‌നങ്ങളുണ്ടാകാം.
ഈ സെറം ഇരുണ്ട കുപ്പിയിലാണ് സാധാരണ വരിക. ഇത് അധികം പ്രകാശമില്ലാത്തിടത്ത് സൂക്ഷിയ്ക്കുക. കാലാവധി കഴിഞ്ഞത് ഒരു കാരണവശാലും ഉപയോഗിയ്ക്കരുത്. ആദ്യമായി ഉപയോഗിയ്ക്കുന്നവര്‍ പാച്ച് ടെസ്റ്റ് ചെയ്ത ശേഷം മാത്രം മുഖത്ത് പുരട്ടുക.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
