പാലുത്‌പന്നങ്ങള്‍
പ്രോട്ടീനും കാത്സ്യവും കൂടുതലായി ശരീരത്തിലെത്തേണ്ട സമയമാണ് ഗർഭകാലം. പാലും പാലുത്പന്നങ്ങളും കഴിക്കുന്നത് വഴി ഇവ ധാരാളമായി അമ്മയുടെ ശരീരത്തിലെത്തുന്നു. ഗർഭിണികൾ ദിവസവും രണ്ട് ഗ്ലാസ് പാലെങ്കിലും കുടിക്കേണ്ടത് അത്യാവശ്യമാണ്.
മുട്ട
ഗർഭിണികളുടെ സൂപ്പർ ഫുഡ് ആയ മുട്ട ധാതുലവണങ്ങൾ, അമിനോ ആസിഡ് തുടങ്ങിയവയുടെ കലവറയാണ്. മുട്ട കഴിക്കുന്നതിലൂടെ ഉയർന്ന അളവിൽ കാത്സ്യവും പ്രോട്ടീനും ശരീരത്തിലെത്തുന്നു. ഗർഭസ്ഥശിശുവിന്റെ ആരോഗ്യത്തിനും പ്രോട്ടീന്റെ അളവ് അമ്മയുടെ ശരീരത്തിലെത്തേണ്ടത് ആവശ്യമാണ്. മുട്ടയിൽ ധാരാളമായി അടങ്ങിയിരിക്കുന്ന കോളിൻ ഗർഭസ്ഥശിശുവിന്റെ തലച്ചോറിന്റെ വളർച്ചയ്ക്കും നാഡീവ്യൂഹങ്ങളുടെ പ്രവർത്തനക്ഷമതയ്ക്കും അത്യാവശ്യമാണ്.
അവൊക്കാഡോ (Butter Fruit)
വെണ്ണപ്പഴം അല്ലെങ്കിൽ അവൊക്കാഡോ (Butter Fruit) എന്നൊക്കെ അറിയപ്പെടുന്ന ഈ പഴം ഗർഭകാല ഡയറ്റിന്റെ ഭാഗമാക്കുന്നതിലൂടെ ഗർഭകാലത്ത് സ്ത്രീകൾ അനുഭവിക്കുന്ന പല ആരോഗ്യപ്രശ്‌നങ്ങൾക്കും പരിഹാരമാകും. നാരുകൾ, പൊട്ടാസ്യം, മഗ്നീഷ്യം, ഫോളേറ്റ്, വിറ്റാമിൻ C, E, K, B5, B6 തുടങ്ങിയവയുടെ സ്രോതസ്സായതിനാൽ അവൊക്കാഡോ ഗർഭകാലത്തെ ഒഴിച്ചുകൂടാനാവാത്ത പഴങ്ങളിലൊന്നാണ്. ഗർഭകാലത്ത് അനുഭവപ്പെടുന്ന കോച്ചിവലിക്കൽ, ഛർദ്ദി തുടങ്ങിയ അസ്വസ്ഥതകൾക്ക് ആശ്വാസം നൽകാൻ ഈ പഴത്തിനു കഴിയും.
കോര (Salmon)
ഗർഭിണിയായ സ്ത്രീകൾ തുടർച്ചയായി മത്സ്യം കഴിക്കുന്നത് കഞ്ഞിന്റെ കാഴ്ചശക്തി വർദ്ധിക്കുന്നതിനും തലച്ചോറിന്റെ വളർച്ചയ്ക്കും ഏറെ സഹായിക്കുമെന്നാണ് പഠനങ്ങൾ തെളിയിക്കുന്നത്. കോര മത്സ്യത്തിൽ ഒമേഗ 3 ഫാറ്റി ആസിഡ് ധാരാളമടങ്ങിയിരിക്കുന്നു. ഇത് എല്ലുകളെയും സന്ധികളെയും കൂടുതൽ ബലപ്പെടുത്തും. കൂടാതെ പ്രോട്ടീൻ, വിറ്റാമിൻ B, D തുടങ്ങിയവയുടെ സ്രോതസ്സായതിനാൽ കോര മത്സ്യം ആഹാരത്തിൽ ഉൾപെടുത്തുമ്പോൾ ഗർഭിണികൾക്കും ഗർഭസ്ഥശിശുവിനും കൂടുതൽ ആരോഗ്യ ഗുണങ്ങൾ ലഭിക്കും.
ചുവന്ന ചീര
ധാരാളം വിറ്റാമിനുകളാൽ സമ്പന്നമായ ചുവന്ന ചീരയുടെ ആരോഗ്യഗുണങ്ങൾ കേട്ടാൽ ആരും ഇത് ആഹാരക്രമത്തിൽ നിന്ന് ഒഴിവാക്കില്ല. പ്രത്യേകിച്ചും ഗർഭിണിയായ സ്ത്രീകൾ. ഇതിലടങ്ങിയിരിക്കുന്ന വിറ്റാമിൻ A, C, E തുടങ്ങിയവ ഗർഭിണികളിലുണ്ടാകുന്ന കൊളസ്‌ട്രോൾ തടയാൻ സഹായിക്കും. ഫോളിക് ആസിഡ് കൂടുതലായി ചുവന്ന ചീരയിൽ അടങ്ങിയിരിക്കുന്നതിനാൽ ഗർഭിണികളിലുണ്ടാകുന്ന വളർച്ചയ്ക്കും ക്ഷീണത്തിനും ഒരു പരിഹാരവുമാകും. കൂടാതെ കുഞ്ഞിനെ ജനിതകപരമായ പ്രശ്നങ്ങളിൽ നിന്ന് സംരക്ഷിക്കുകയും ചെയ്യും. കൂടാതെ, ഗർഭിണികളിലുണ്ടാകുന്ന അമിത രക്തസമ്മർദ്ദം, മാസം തികയാതെയുള്ള പ്രസവം തുടങ്ങിയ പ്രശ്നങ്ങൾക്ക് ചുവന്ന ചീര കഴിക്കുന്നതിലൂടെ പരിഹാരം കണ്ടെത്താം. ചുവന്ന ചീരയിലടങ്ങിയിരിക്കുന്ന മഗ്നീഷ്യം രക്തത്തിൽ പഞ്ചസാരയുടെ അളവിനെ നിയന്ത്രിക്കുന്നു.
മധുരക്കിഴങ്ങ്
മധുരക്കിഴങ്ങിലടങ്ങിയിരിക്കുന്ന ബീറ്റാ കരോട്ടിൻ ഗർഭസ്ഥശിശുവിന്റെ ആരോഗ്യത്തിന് വളരെ ഗുണകരമാണ്. ഇതിലുള്ള കൊഴുപ്പിന്റെ അളവ് താരതമ്യേന കുറവായതിനാൽ ഗർഭിണികളുടെ ഡയറ്റിൽ വളരെ എളുപ്പത്തിൽ ഉൾപ്പെടുത്താം. ഭൂമിയ്ക്കടിയിൽ വളരുന്നതിലാൽ മധുരക്കിഴങ്ങ് നിരവധി ധാതുക്കളാലും വിറ്റാമിനുകളാലും സമ്പുഷ്ടമാണ്. ഭ്രൂണവളർച്ചയ്ക്കാവശ്യമായ വിറ്റാമിൻ A, ഗർഭിണികൾക്കാവശ്യമായ മറ്റ് ഫൈബറുകൾ, ഫോളിക് ആസിഡ്, വിറ്റാമിൻ C, വിറ്റാമിൻ B6, പൊട്ടാസ്യം തുടങ്ങിയവയുടെ ഒരു കലവറ തന്നെയാണ് മധുരക്കിഴങ്ങ്.
ഗർഭിണികൾ ഒഴിവാക്കേണ്ട ഭക്ഷണങ്ങൾ
ഗർഭാവസ്ഥയിൽ അമ്മ കഴിക്കുന്ന ഭക്ഷണങ്ങളിലൂടെ തന്റെ പൊന്നോമനയ്ക്ക് ആവശ്യമായ പോഷകങ്ങൾ ലഭ്യമാകുന്നുണ്ടോ എന്ന ആശങ്ക മിക്ക ഗർഭിണികൾക്കുമുണ്ട്. ഈ കാലത്ത് പല ആഹാരങ്ങളോടും കൊതി തോന്നുക സ്വാഭാവികം. എന്നാൽ ഗർഭിണികൾ കഴിക്കേണ്ട ഭക്ഷണങ്ങൾ പോലെ തന്നെ കഴിക്കാൻ പാടില്ലാത്ത ഭക്ഷണങ്ങളുമുണ്ട്.
കാപ്പി
പലർക്കും ഒഴിച്ച്‌ കൂടാനാകാത്ത പാനീയങ്ങളിലൊന്നാണ് കാപ്പി. ഇതിലടങ്ങിയിരിക്കുന്ന കഫീൻ ഗർഭസ്ഥശിശുവിന്റെ തൂക്കം കുറയാൻ കാരണമാകും. ചില സന്ദർഭങ്ങളിൽ ഗർഭം അലസിപ്പോകാനും സാധ്യതയുണ്ട്. കഫീൻ അമിതമായ അളവിൽ ശരീരത്തിലെത്തിയാൽ ഗർഭിണികളിൽ ഹൃദയമിടിപ്പ് കൂടുന്നതിനും അസിഡിറ്റി ഉണ്ടാകുന്നതിനും സാധ്യതയുണ്ട്. അതുകൊണ്ട്, കാപ്പി മാത്രമല്ല, കഫീൻ അടങ്ങിയ എല്ലാ പാനീയങ്ങളുടെയും ഉപയോഗം ഗർഭാവസ്ഥയിൽ ഒഴിവാക്കിയേ തീരൂ.
മുളപ്പിച്ച പയറുവർഗ്ഗങ്ങൾ
മുളപ്പിച്ച പയറുവർഗ്ഗങ്ങൾക്ക് ആരോഗ്യഗുണങ്ങൾ ഏറെയാണെന്ന് നിസ്സംശയം പറയാം. എന്നാൽ ഗർഭിണികൾ ഇത്തരം ഭക്ഷണം പൂർണ്ണമായും ഒഴിവാക്കണം. ഇത്തരം പയറുവർഗ്ഗങ്ങൾ മുളപ്പിക്കാൻ വെയ്ക്കുമ്പോൾ സാല്‍മോണല്ല എന്ന ബാക്ടീരിയ ഉണ്ടാകാനുള്ള സാധ്യത കൂടുതലാണ്. ശരീരത്തിൽ ഈ ബാക്റ്റീരിയയുടെ സാന്നിധ്യം അണുബാധയുണ്ടാകാൻ കാരണമാകും. ഈ പ്രശ്നങ്ങൾ പരിഹരിക്കാൻ തുളസി ഇങ്ങനെ ഉപയോഗിക്കാം
മദ്യം
ഗർഭിണികൾ പൂർണമായും ഒഴിവാക്കേണ്ട ഒന്നാണിത്. എത്ര കുറഞ്ഞ അളവിലാണ് കഴിക്കുന്നതെങ്കിലും മദ്യം ഗർഭസ്ഥശിശുവിനെ ദോഷകരമായി ബാധിക്കും. മദ്യപിക്കുന്ന ഗർഭിണികളിൽ നിന്നും മദ്യത്തിന്റെ അംശം പ്ലാസന്റ വഴി കുഞ്ഞിന്റെ ശരീരത്തിലെത്തുന്നു. മദ്യത്തിലടങ്ങിയിരിക്കുന്ന ചില രാസപദാർത്ഥങ്ങൾ fetal alcohol syndrome എന്ന പ്രത്യേകതരം രോഗം കുഞ്ഞിൽ ഉണ്ടാക്കും. കൂടാതെ ബുദ്ധിമാന്ദ്യം, ഹൃദയവാൽവിന്റെ തകരാർ, ലേർണിംഗ് ഡിസോർഡർ തുടങ്ങിയ പല വൈകല്യങ്ങളും കുഞ്ഞുങ്ങളിൽ രൂപപ്പെടും. കുഞ്ഞിന്റെ തലച്ചോറിന്റെ വളർച്ചയെയും ഇത് ബാധിക്കുമെന്ന് മദ്യം കഴിക്കുന്ന ഗർഭിണികൾ ഓർക്കണം.
കൈതച്ചക്ക (പൈനാപ്പിൾ)
പ്രോട്ടീനും വിറ്റാമിനുകളും കൊണ്ട് സമ്പുഷ്ടമാണ് പൈനാപ്പിൾ. എന്നാൽ ഗർഭകാലത്ത് പൈനാപ്പിൾ അമിതമായി കഴിയ്ക്കുന്നത്അബോർഷനുണ്ടാകാനുള്ള സാധ്യത വർദ്ധിപ്പിക്കുമെന്നാണ് പഠനങ്ങൾ തെളിയിക്കുന്നത്. ഇതിലടങ്ങിയിരിക്കുന്ന ബ്രോമിലെയിൻ എന്ന എൻസൈം ഗർഭപാത്രം സങ്കോചിക്കാൻ കാരണമാകുകയും ഗർഭം അലസാൻ സാധ്യത വർധിപ്പിക്കുകയും ചെയ്യും. ഇത് ഒഴിവാക്കുകയോ മിതമായി കഴിയ്ക്കുകയോ ആകാം.
പപ്പായ
പപ്പായയ്ക്കുള്ള ആരോഗ്യ ഗുണങ്ങൾ വളരെയേറെയാണ്. ഇത് അമിതമായി കഴിയ്ക്കുന്നത് ഒഴിവാക്കണം. ഗർഭം അലസാൻ സാധ്യതയുള്ള ചില എൻസൈമുകൾ പപ്പായയിലടങ്ങിയിരിക്കുന്നു. എന്നാല്‍ നല്ലപോലെ പഴുത്ത പപ്പായക്ക് പ്രശ്‌നമില്ല. മിതമായി കഴിയ്ക്കുന്നതിനാല്‍ പ്രശ്‌നമില്ല.പച്ച പപ്പായയിൽ അടങ്ങിയിരിക്കുന്ന പപ്പൈൻ എന്ന രാസപദാർത്ഥം ഗർഭപാത്രം സങ്കോചിപ്പിക്കാൻ കാരണമാകുനാകും അതുവഴി ഗർഭമലസുകയും ചെയ്തേക്കാം. പ്രസവസമയത്തെന്നപോലെയുള്ള വേദന ഗർഭിണികളിൽ അനുഭവപ്പെടാം.
