ബിഹാറിൽ മൂന്നുവയസ്സുകാരൻ കുഴൽക്കിണറിൽ വീണു; രക്ഷാപ്രവർത്തനം പുരോ​ഗമിക്കുന്നു

ശിവം കുമാർ എന്ന കുട്ടിയാണ് കിണറ്റിൽ വീണത് എന്നാണ് ഉദ്യോഗസ്ഥരെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്തിരിക്കുന്നത്.

എൻഡിടിവി റിപ്പോർട്ട് അനുസരിച്ച്, ഒരു കർഷകൻ കൃഷിയുടെ ആവശ്യത്തിനായി നിർമിച്ച കുഴൽക്കിണർ വെള്ളം കണ്ടെത്താത്തതിനേത്തുടർന്ന് ഉപേക്ഷിക്കുകയായിരുന്നു. കിണർ അടയ്ക്കാത്തതാണ് ദാരുണമായ സംഭവത്തിൽ കലാശിച്ചത്.

ഒപ്പം കളിച്ചിരുന്ന കുട്ടികളാണ് ശിവം കിണറ്റിൽ വീണ വിവരം മാതാപിതാക്കളെ അറിയിച്ചത്. തുടർന്ന്, ഉടൻ തന്നെ രക്ഷാപ്രവർത്തനം ആരംഭിക്കുകയായിരുന്നു.

“കർഷകൻ ഈ കുഴൽക്കിണർ ബോറിംഗിനായി നിർമ്മിച്ചതാണ്. എന്നാൽ ഇവിടെ കുഴിച്ചെങ്കിലും വിജയിച്ചില്ല, അതിനാൽ അവർ മറ്റൊരിടത്ത് ബോറടിക്കാൻ തുടങ്ങി, എന്നാൽ ഈ കുഴൽക്കിണർ അടച്ചില്ല”. രക്ഷാപ്രവർത്തനത്തിന് നേതൃത്വം നൽകുന്ന നളന്ദ നഗർ പഞ്ചായത്ത് വൈസ് പ്രസിഡന്റ് നളിൻ മൗര്യ വാർത്താ ഏജൻസിയായ എഎൻഐയോട് പറഞ്ഞു.

കുട്ടി ഇപ്പോഴും ജീവിച്ചിരിപ്പുണ്ടെന്നും കുട്ടിയുടെ ശബ്ദം കേൾക്കാൻ കഴിയുന്നുണ്ടെന്നും സർക്കിൾ ഓഫീസർ ശംഭു മണ്ഡല് രാവിലെ പറഞ്ഞിരുന്നു.

“ഒരു കുട്ടി കുഴൽക്കിണറ്റിൽ വീണതായി ഞങ്ങൾക്ക് വിവരം ലഭിച്ചു… കുട്ടിയെ രക്ഷിക്കാൻ ഞങ്ങൾ പരമാവധി ശ്രമിച്ചുവരികയാണ്. കുട്ടി ഇപ്പോഴും ജീവിച്ചിരിപ്പുണ്ട്, അവന്റെ ശബ്ദം ഞങ്ങൾക്ക് കേൾക്കാം…” അദ്ദേഹം പറഞ്ഞു.

ഓക്‌സിജൻ എത്തിച്ചുനൽകുന്നുണ്ടെന്നും കുട്ടിയെ കുഴൽക്കിണറിൽ നിന്ന് പുറത്തെടുക്കാൻ ജെസിബി യന്ത്രം കൊണ്ടുവരുമെന്നും അറിയിച്ചിട്ടുണ്ട്.

Also Read : വിമാനത്തിന്റെ നിലത്ത് മൂത്രമൊഴിച്ച് യുവതി: ശുചിമുറി ഉപയോഗിക്കാൻ വിമാനക്കമ്പനി അനുവദിച്ചില്ലെന്ന് വിശദീകരണം

കുട്ടിയെ സുരക്ഷിതമായി പുറത്തെത്തിക്കാനുള്ള ശ്രമങ്ങൾ തുടരുകയാണെന്ന് പോലീസ് സ്റ്റേഷൻ ഇൻ ചാർജ് ദിനേശ് കുമാർ സിംഗ് പറഞ്ഞു. സംഭവത്തെക്കുറിച്ച് മുതിർന്ന ഉദ്യോഗസ്ഥനെയും അറിയിച്ചിട്ടുണ്ട്. കൂടുതൽ പ്രദേശത്തേക്ക് എത്തുന്നുണ്ട്. സംഭവത്തിന്റെ വിശദവിവരങ്ങൾ പുറത്തുവരാനിരിക്കെയാണ്.

Read Latest National News and Malayalam News