ഭാര്യയ്ക്കും ഭര്‍ത്താവിനും ജോലിയുണ്ടെങ്കില്‍ മക്കളെ വീട്ടില്‍ ആരെയെങ്കിലും ഏല്‍പ്പിച്ച് പോകണം. അല്ലെങ്കില്‍ ഒരാള്‍ ജോലി ഉപേക്ഷിച്ച് കുട്ടിയെ നോക്കണം. ചിലര്‍ കുട്ടികളെ നോക്കാന്‍ ആളം നിര്‍ത്തുന്ന അവസ്ഥയാണ് ഉള്ളത്. എന്നാല്‍, എല്ലാ വീട്ടുകാര്‍ക്കും ഇത് സാധിച്ചെന്ന് വരില്ല. ചിലര്‍ക്ക് സ്വന്തം വീട്ടില്‍ പോലും കുട്ടികളെ നിര്‍ത്താന്‍ ഭയമാണ്. കുട്ടികളെ അവരുടെ സുരക്ഷ ഉറപ്പാക്കാന്‍, അവരെ സ്വയം പര്യാപ്തരാക്കേണ്ടത് അനിവാര്യമാണ്. ഇതിനായി മാതാപിതാക്കള്‍ എന്തെല്ലാം കാര്യങ്ങള്‍ ശ്രദ്ധിക്കണം? എന്തെല്ലാം കാര്യങ്ങള്‍ കുട്ടികളെ പഠിപ്പിക്കണം എന്ന് നോക്കാം.
തെറ്റും ശരിയും പഠിപ്പിക്കാം
ഒരാള്‍ നമ്മളെ ചീത്ത ഉദ്ദേശത്തോടെ സ്പര്‍ശിച്ചാല്‍ അത് മനസ്സിലാക്കാനുള്ള ശേഷി മുതിര്‍ന്നവര്‍ക്ക് ഉണ്ട്. എന്നാല്‍, അത് കുട്ടികള്‍ക്ക് ഉണ്ടായിരിക്കണമെന്നില്ല. അതിനാല്‍, കുട്ടികളെ നല്ല രീതിയില്‍ സ്‌നേഹത്തോടെ സ്പര്‍ശിക്കുന്നതും ചീത്ത ഉദ്ദേശത്തോടെ സ്പര്‍ശിക്കുന്നതും തമ്മിലുള്ള വ്യത്യാസം പഠിപ്പിച്ച് കൊടുക്കാവുന്നതാണ്.
ഇതിനായി മാതാപിതാക്കള്‍ക്ക് അവരുടെ സ്‌നേഹപ്രകടനവും മറ്റൊരാള്‍ തൊടുമ്പോഴുള്ള വ്യത്യാസവും പഠിപ്പിക്കാം. ഇത് ആണ്‍കുട്ടികളേയും പെണ്‍കുട്ടികളേയും പഠിപ്പിക്കേണ്ടത് അനിവാര്യമാണ്. പെണ്‍കുട്ടികളെ മാത്രമല്ല, ഇന്ന് ആണ്‍കുട്ടികളേയും ലൈംഗികപരമായി പലരും ഉപയോഗിക്കുന്നുണ്ട്. സ്വന്തം വീട്ടില്‍ നിന്നു പോലും ഇത്തരം ബാഡ് ടച്ച് ഉണ്ടായാല്‍ കുട്ടികള്‍ക്ക് മനസ്സിലാക്കുന്ന വിധത്തില്‍ കാണിച്ച് കൊടുത്തും പറഞ്ഞ് കൊടുത്തും അവര്‍ക്ക് മനസ്സിലാക്കുന്ന വഴിയിലൂടെ പഠപ്പിച്ച് കൊടുക്കാവുന്നതാണ്.
കുട്ടികളെ അച്ചടക്കം പഠിപ്പിക്കാന്‍
കുട്ടികളെ എങ്ങനെ അച്ചടക്കമുള്ളവരാക്കി വളർത്താം
കുട്ടികളോടുള്ള സമീപനം
പല കുട്ടികളും തങ്ങള്‍ക്കുണ്ടായ മോശം അനുഭവങ്ങള്‍ മാതാപിതാക്കളോട് തുറന്ന് പറയാന്‍ മടിക്കും. അതിന്റെ പ്രധാന കാരണം, മാതാപിതാക്കളോടുള്ള പേടിയാണ്. ഇത്തരം കാര്യങ്ങള്‍ ചില മാതാപിതാക്കളോട് പറഞ്ഞാല്‍ ആദ്യം കുറ്റം പറയുന്നതും അടിയും വഴക്കും കേള്‍ക്കുന്നത് ഈ കുട്ടികള്‍ക്ക് തന്നെയാണ്. ഈ സമീപനം മാറ്റണം.
കുട്ടികളോട് മാതാപിതാക്കള്‍ കുറച്ചുംകൂടെ ഫ്രീ ആയിരുന്നാല്‍ മാത്രമാണ് കുട്ടികള്‍ക്കും എന്തും തുറന്ന് സംസാരിക്കാന്‍ തോന്നുകയുള്ളൂ. അതുപോലെ കുട്ടികളെ ചെറുപ്പം മുതല്‍ ഓരോ കാര്യങ്ങളും മാതാപിതാക്കളോട് ഷെയര്‍ ചെയ്യാന്‍ പഠിപ്പിക്കണം. അത് നല്ലതായാലും ചീത്തയായാലും കുട്ടികള്‍ മാതാപിതാക്കളോട് എല്ലാം തുറന്ന് പറയുകയാണെങ്കില്‍ കുട്ടികള്‍ക്ക് ഉണ്ടാകുന്ന മോശം അനുഭവങ്ങള്‍ മാതാപിതാക്കള്‍ക്ക് മുന്‍കൂട്ടി മനസ്സിലാക്കാന്‍ സാധിക്കുന്നതാണ്.
സുരക്ഷിതത്വത്തിനുള്ള ടിപ്‌സ്
വീട്ടുകാരോട് പറയാതെ പുറത്ത് ഇറങ്ങി നടക്കരുത് എന്ന് പറയണം. അതുപോലെ പരിചയമില്ലാത്തവര്‍ സ്‌നേഹം കാണിച്ച് വന്നാല്‍ അവരില്‍ നിന്നും ഒഴിഞ്ഞ് മാറി വീട്ടില്‍ കയറാന്‍ പഠിപ്പിക്കാനും അതുപോലെ, ഇത് മാതാപിതാക്കളോട് പറയാനും പഠിപ്പിക്കുക. സ്‌കൂളില്‍ പോകുമ്പോള്‍ മാതാപിതാക്കള്‍ സ്‌കൂള്‍ വണ്ടി വരുന്നത് വരെ കൂടെ നില്‍ക്കുക. അതുപോലെ തന്നെ, തിരിച്ച് ടീച്ചര്‍ അല്ലെങ്കില്‍ മറ്റുകുട്ടികളുടെ കൂടെ നിന്ന് വണ്ടിയില്‍ കയറാവുന്നതാണ്.
സ്‌കൂളില്‍ നിന്നും മോശം അനുഭവം ഉണ്ടായാല്‍ അല്ലെങ്കില്‍ വരുന്ന വഴിയില്‍ ആരെങ്കിലും ഉപദ്രവിക്കാനോ സ്‌നേഹപ്രകടനങ്ങളോ കാണിച്ചാല്‍ അത് ടീച്ചറോടെങ്കിലും പറയാന്‍ കുട്ടികളെ പഠിപ്പിക്കാവുന്നതാണ്. കുട്ടികളുടെ കയ്യില്‍ വീട്ടുകാരുടെ, അതുപോലെ, പോലീസിന്റെ, ടീച്ചറുടെ നമ്പര്‍ എന്നിവ എഴുതി വെച്ച ഒരു ബുക്ക് സൂക്ഷിക്കാന്‍ ഏല്‍പ്പിക്കാം.
പെട്ടെന്ന് എന്തെങ്കിലും കാരണവശാല്‍ ഒറ്റപ്പെട്ടാല്‍ ഒറ്റയ്ക്ക് നില്‍ക്കാതെ ആള്‍ക്കൂട്ടം ഉള്ള സ്ഥലത്ത് നില്‍ക്കാന്‍ പഠിപ്പിക്കാം. അതുപോലെ, പോലീസിനെ കണ്ടാല്‍ സഹായം തേടാന്‍ പഠിപ്പിക്കാം. കുട്ടികള്‍ക്ക് പൊതുവില്‍ പൊലീസിനെ പേടിയായിരിക്കും. ഈ പേടി മാറ്റണം. സുരക്ഷയ്ക്ക് പൊലീസിനെ ആശ്രയിക്കാന്‍ പഠിപ്പിക്കണം. അല്ലെങ്കില്‍, മാതാപിതാക്കളെ വിളിക്കാന്‍ മാര്‍ഗ്ഗം കണ്ടെത്താനും പഠിപ്പിക്കാം.
സ്‌കൂള്‍ വണ്ടി പോയി ഒറ്റപ്പെട്ടാല്‍ സ്‌കൂളിന് പുറത്ത് നില്‍ക്കാതെ വേഗം സ്‌കൂളിലേയ്ക്ക് തിരിച്ച് പോവുക. അവിടെ ഓഫീസില്‍ ചെന്ന് വീട്ടുകാരെ വിളിച്ച് വിവരം അറിയിക്കാനും മാതാപിതാക്കള്‍ വരുന്നത് വരെ അവിടെ തന്നെ ഇരിക്കാനും പഠിപ്പിക്കാം. മാതാപിതാക്കള്‍ പറഞ്ഞ് വിട്ടതാണ് എന്ന് പറഞ്ഞ് വേറെ ആരെങ്കിലും വന്നാല്‍ മാതാപിതാക്കളെ വിളിച്ച് ചോദിച്ച് ഉറപ്പ് വരുത്താനും പരിചയം ഇല്ലാത്തവരെ വിശ്വസിച്ച് പോകാതിരിക്കാനും പഠിപ്പിക്കുക.
മാതാപിതാക്കള്‍ ശ്രദ്ധിക്കേണ്ട ചില കാര്യങ്ങള്‍
കുട്ടികളുടെ സുരക്ഷയുടെ കാര്യത്തില്‍ മാതാപിതാക്കളും കുറച്ച് കാര്യങ്ങള്‍ ശ്രദ്ധിക്കേണ്ടത് അനിവാര്യമാണ്. അവര്‍ ബന്ധുവീട്ടില്‍ അല്ലെങ്കില്‍ പരിചയക്കാരുടെ കൂടെ പോയാല്‍ കുട്ടിയോട് ഇടയ്ക്ക് വിളിച്ച് സംസാരിക്കാം. അതുപോലെ, കുട്ടികളെ അയല്‍ വീട്ടില്‍ ആക്കി പോകുന്നവരും കുറവല്ല. അവിടെ അവര്‍ സുരക്ഷിതരായിരിക്കുമോ എന്ന് ഉറപ്പ് വരുത്തണം. അതുപോലെ, തിരിച്ച് വന്നാല്‍, കുട്ടികളോട് കാര്യങ്ങള്‍ വിശദമായി ചോദിച്ച് അറിയണം.
അതുപോലെ, കുട്ടികളെ ഒന്നും പറയാന്‍ സമ്മതിക്കാതെ അഭിപ്രായ സ്വാതന്ത്രം കൊടുക്കാതെ വളര്‍ത്തരുത്. അവര്‍ സംസാരിക്കട്ടെ. എന്നാല്‍ മാത്രമാണ്, അവര്‍ ഫ്രീ ആയി എല്ലാം തുറന്ന് സംസാരിക്കൂ. അതുപോലെ, പേടി കൂടാതെ, കാര്യങ്ങള്‍ തുറന്ന് പറയുകയുള്ളൂ. കുട്ടികളെ പരമാവധി ഒറ്റയ്ക്ക് വിടാതിരിക്കാന്‍ ശ്രദ്ധിക്കുക. അതുപോലെ, കുട്ടികള്‍ക്ക് അമിതമായി മൊബാല്‍ഫോണ്‍ ഉപയോഗിക്കാന്‍ കൊടുക്കുന്നത് കുറയ്ക്കാം. ഉപയോഗിക്കുമ്പോള്‍ അവര്‍ അതില്‍ എന്ത് ചെയ്യുന്നു എന്ന് നോക്കാം.
കുട്ടികളുടെ മുന്‍പില്‍ വെച്ച് മാതാപിതാക്കള്‍ സംസാരിക്കുമ്പോള്‍ ഭാഷയിലും അവര്‍ നടത്തുന്ന പരാമര്‍ശത്തിലും ആശയത്തിലും ശ്രദ്ധ ചെലുത്തുക. കുട്ടികള്‍ എല്ലാം വേഗത്തില്‍ ശ്രദ്ധിക്കുന്നവരും അത് ചിലപ്പോള്‍ അവരുടെ മനസ്സില്‍ പതിഞ്ഞ് കിടക്കാനും സാധ്യത കൂടുതലാണ്. അതിനാല്‍, ഇത്തരം സംസാരം മറ്റുള്ളവര്‍ കുട്ടികളോട് നടത്തിയാല്‍ അത് സ്വാഭാവികമായി സംസാരിക്കുന്നതാണ് എന്ന് സ്വയം വിചാരിക്കും. ഇത് അപകടത്തിലേയ്ക്ക് നയിക്കും. അതിനാല്‍, സംസാരത്തില്‍ ശ്രദ്ധിക്കുക.
