2003 മെയ് മാസത്തിൽ മാറാട് കൂട്ടക്കൊല നടക്കുന്നകാലം കേരളത്തിൽ എൻഡിഎഫിന്റെ പ്രവർത്തനം അതിന്റെ ഉന്നതിയിലെത്തിയ കാലമാണ്. ഈ കാലത്ത് എൻഡിഎഫിന് മുസ്ലീം ലീഗിന്റെ എല്ലാ പിന്തുണയും കിട്ടിപ്പോന്നതായി ശക്തമായ ആരോപണം നിലവിലുണ്ട്. സിപിഎം നേതാവായ പി ജയരാജൻ ആരോപിക്കുന്നത് “മുസ്ളിം ലീഗിന്റെ സംരക്ഷണത്തില്‍ എന്‍ഡിഎഫ് ആണ് രണ്ടാം മാറാട് കലാപത്തിന്റെ പിന്നില്‍ പ്രവര്‍ത്തിച്ചത്” എന്നാണ്. “എന്‍ഡിഎഫിനെ രക്ഷിക്കാന്‍ മുസ്ളിംലീഗും യുഡിഎഫ് ഗവണ്‍മെന്റും മുന്നോട്ടുവന്നു. മുസ്ളിംലീഗ് എംഎല്‍എ കെഎന്‍എ ഖാദര്‍ അടക്കം ശുപാര്‍ശ കത്തുകൊടുത്തതിന്റെ അടിസ്ഥാനത്തില്‍ എന്‍ഡിഎഫുകാര്‍ക്കെതിരായി ചാര്‍ജ്ജുചെയ്ത 9 കേസുകള്‍ മുഖ്യമന്ത്രി ആന്റണി പിന്‍വലിച്ചു. പിന്‍വലിച്ച 9 കേസുകളില്‍ മൂന്നെണ്ണം ദളിത് വിഭാഗം ആക്രമിക്കപ്പെട്ട കേസുകളായിരുന്നു,” ജയരാജൻ പറയുന്നു. അന്നത്തെ ആന്റണി സർക്കാർ മുസ്ലിം ലീഗിന്റെ സമ്മർദ്ദത്തിന് വഴങ്ങി പിൻവലിച്ച കേസുകൾ അക്കമിട്ട് പറയുന്നുണ്ട് പി ജയരാജൻ: “മലപ്പുറം കോടതി – 287/2000, 765/96, 766/96, 767/96, പരപ്പനങ്ങാടി കോടതി-553/99, 116/94, തിരൂര്‍ കോടതി -118/94, മഞ്ചേരി കോടതി – 151/2000, 587/2000, പൊന്നാനി കോടതി – 93/99 എന്നീ കേസുകളാണ് ആന്റണി സര്‍ക്കാര്‍ പിന്‍വലിച്ചത്.”
മഞ്ചേരിയിൽ മുസ്ലിം തീവ്രവാദ സംഘടനകളുമായി മുസ്ലിം ലീഗ് പുലർത്തിവരുന്ന സൗഹാർദ്ദപരമായ സമീപനം ഏറെ വിമർശിക്കപ്പെട്ടിട്ടുണ്ട്. എൻഡിഎഫ് നേതാക്കൾക്കെതിരെ നിലവിലുണ്ടായിരുന്ന 68 കേസുകൾ പിൻവലിക്കാൻ മഞ്ചേരി എംഎൽഎയായിരിന്നു ഇസ്ഹാക്ക് ഗുരുക്കൾ അക്കാലത്ത് മുൻകൈയെടുത്തുവെന്ന് ആരോപണമുയർന്നു. ഈ സംഭവം വലിയ വിവാദമാകുകയും ആന്റണി സർക്കാരിന് നീക്കങ്ങളിൽ നിന്ന് പിൻവാങ്ങേണ്ടി വരികയും ചെയ്തു.
ചരിത്രം
മലബാർ മേഖലയിൽ ആർഎസ്എസ്സിന്റെയും ഭാരതീയ ജനസംഘത്തിന്റെയും പ്രവർത്തനങ്ങൾക്കൊപ്പം മുസ്ലിം തീവ്രവാദ പ്രസ്ഥാനങ്ങൾ വളർന്നുവരുന്നതിനെക്കുറിച്ച് 1965ലെ പൊലീസ് അഡ്മിനിസ്ട്രേഷന്‍ റിപ്പോര്‍ട്ട് പരാമർശിക്കുന്നുണ്ട്. ഒരു മുസ്ലീംലീഗ് സ്ഥാനാർത്ഥിയുടെ തിരഞ്ഞെടുപ്പ് വിജയഘോഷയാത്രയെ ആർഎസ്എസ് ആക്രമിച്ച സംഭവം അക്കാലത്ത് റിപ്പോർട്ട് ചെയ്യപ്പെട്ടു. ഹിന്ദുത്വ തീവ്രവാദത്തിന്റെ വളർച്ചയെ പ്രതിരോധിക്കാനെന്നോണം മുസ്ലിം തീവ്രവാദവും വളർന്നുവന്നു. അക്കാലത്ത് കളരികളാണ് കായികാഭ്യാസത്തിനായി സ്ഥാപിക്കപ്പെട്ടത്.
കേരളത്തിലെ ആദ്യത്തെ വർഗ്ഗീയകലാപം തലശ്ശേരിയിലാണ് പൊട്ടിപ്പുറപ്പെട്ടത്. 1971 ഡിസംബറിൽ ഒരാഴ്ചയോളം നീണ്ടുനിന്നും ഈ കലാപം. ഈ കലാപത്തിൽ 63 മുസ്ലിം പള്ളികളും മദ്രസകളും മൂന്ന് ക്ഷേത്രങ്ങളും ആക്രമിക്കപ്പെട്ടു. കലാപം അമർച്ച ചെയ്യാൻ അജിത് ഡോവൽ അടക്കമുള്ള പൊലീസ് ഉദ്യോഗസ്ഥരെ അന്നത്തെ ആഭ്യന്തരമന്ത്രി കെ കരുണാകരൻ അയച്ചു. കലാപപ്രദേശത്ത് ഇന്നത്തെ മുഖ്യമന്ത്രി പിണറായി വിജയൻ അടക്കമുള്ള നേതാക്കളിടപെട്ട് നടത്തിയ സമാധാനപ്രവർത്തനങ്ങൾ ഏറെ പറയപ്പെട്ടിട്ടുള്ളതാണ്.
ഈ കലാപത്തീ മലബാർ മേഖലയിൽ പിന്നീടും കനലായി കിടന്നു. 87ൽ നായനാർ മന്ത്രിസഭയുടെ കാലത്ത് നാദാപുരത്തും പരിസരപ്രദേശങ്ങളിലും വർഗ്ഗീയ സ്വഭാവമുള്ള കലാപങ്ങളുണ്ടായി. ഈ കലാപങ്ങളെ ചൂണ്ടിക്കാട്ടി ചിലർ കളരികൾ സ്ഥാപിക്കാൻ തുടങ്ങി. ഇവരെല്ലാം സംഘടിച്ച് നാദാപുരം ഡിഫൻസ് ഫോഴ്സ് (എൻഡിഎഫ്) എന്ന സംഘടനയ്ക്ക് രൂപംനൽകപ്പെട്ടു. മുസ്ലിം ലീഗ് ഈ സംഘടനയുടെ പ്രവർത്തനരീതിയോട് യോജിച്ചില്ല. ഇതെത്തുടർന്നാണ് അന്നത്തെ സിമി നേതാക്കളെ എൻഡിഎഫുകാർ പോയിക്കണ്ടത്. കുറെക്കൂടി വൈപുല്യമുള്ള ഒരു സംഘടനാരൂപീകരണത്തിന് ഈ കൂടിക്കാഴ്ച വഴിയൊരുക്കി. നാദാപുരം ഡിഫൻസ് ഫോഴ്സ് എന്നത് നാഷണൽ ഡിഫൻസ് ഫോഴ്സായി മാറി. 1993 നവംബറിൽ കോഴിക്കോട് ടൗൺഹാളിൽ ചേർന്ന ഒരു യോഗത്തിൽ വെച്ച് വീണ്ടും പേരുമാറ്റമുണ്ടായി. നാഷണൽ ഡവലപ്മെന്റ് ഫ്രണ്ട് എന്നായി മാറി. അതായത്, ഡിഫൻസ്, ഫോഴ്സ് എന്നീ വാക്കുകൾ ഒഴിവാക്കി.
മലപ്പുറം ജില്ലയിൽ എൺപതുകളിൽത്തന്നെ എൻഡിഎഫിന്റെ ആദ്യകാലനേതാക്കൾ പ്രവർത്തനം ശക്തമാക്കിയിരുന്നു. മഞ്ചേരി കേന്ദ്രമാക്കിയാണ് പ്രവർത്തനങ്ങൾ. ആർഎസ്എസ്സിന് മറുപടിയെന്ന രീതിയിൽ അബ്ദുൾ നാസർ മദനി സ്ഥാപിച്ച ഐഎസ്എസ് എന്ന സംഘടന അക്കാലത്ത് നിരോധിക്കപ്പെടുകയും അതിലെ അംഗങ്ങളെ തങ്ങൾക്കൊപ്പം ചേർക്കാൻ എൻഡിഎഫിന് സാധിക്കുകയും ചെയ്തു. പള്ളികളെ കേന്ദ്രീകരിച്ച് പ്രവർത്തനങ്ങൾ വിപുലീകരിക്കാൻ അവർക്കായി. മഞ്ചേരി ഗ്രീന്‍വാലി മസ്ജിദ് ഇങ്ങനെയാണ് എൻഡിഎഫിന്റെ കൈകളിൽ ചെന്നുചേരുന്നത്. ഇതെല്ലാം നടക്കുമ്പോഴും സുന്നി വിഭാഗങ്ങളിലെ പരിണിതപ്രജ്ഞരായ പുരോഹിതന്മാർ എൻഡിഎഫിനെതിരെ ശക്തമായ നിലപാടെടുത്തു വന്നു.
മഞ്ചേരിയിലെ ഗ്രീൻവാലിയും ‘ആശ്രമ’ങ്ങളും
1965ലെ പൊലീസ് അഡ്മിനിസ്ട്രേഷൻ റിപ്പോർട്ടിൽ സൂചിപ്പിച്ച ‘കളരി’കളുടെ വിപുലീകരണമാണ് പിൽക്കാലത്ത് ഗ്രീൻവാലി ഫൗണ്ടേഷൻ പോലുള്ള സ്ഥാപനങ്ങളായി മാറിയത്. നിലമ്പൂരിൽ ആത്മീയതയ്ക്കുള്ള ആശ്രമമെന്ന നിലയിലും ചില സ്ഥാപനങ്ങളുണ്ടെന്ന് റിപ്പോർട്ടുകൾ വന്നു.
മലബാർ ഹൗസ്, പെരിയാർ വാലി, വള്ളുവനാട് ഹൗസ്, കാരുണ്യ ചാരിറ്റബിൾ ട്രസ്റ്റ്, ട്രിവാൻഡ്രം എജുക്കേഷൻ ആൻഡ് സർവ്വീസ് ട്രസ്റ്റ് എന്നീ സ്ഥാപനങ്ങളും ഇതിനകം എൻഐഎ കണ്ടുകെട്ടിയിട്ടുണ്ട്. മതപഠനകേന്ദ്രമെന്ന നിലയിലും വിദ്യാഭ്യാസ സ്ഥാപനങ്ങളെന്ന നിലയിലുമെല്ലാമാണ് ഈ സ്ഥാപനങ്ങൾ പ്രവർത്തിച്ചു വന്നിരുന്നത്.
തീവ്രവാദ പ്രസ്ഥാനങ്ങൾക്കെതിരായ എൻഐഎയുടെ ഇടപെടലിന് നേരത്തെയും വഴിയൊരുങ്ങിയിരുന്നെങ്കിലും അവ പലതരത്തിൽ തടസ്സപ്പെടുകയായിരുന്നു. 2010ൽ നിലമ്പൂർ പാസഞ്ചറിന്റെ ബ്രേക്ക് പൈപ്പ് മുറിച്ച സംഭവം തീവ്രവാദപ്രവർത്തനമാണെന്ന് ആരോപണമുയർന്നിരുന്നു. ഈ കേസ് എൻഐഎക്ക് വിടാൻ അന്നത്തെ സർക്കാർ തീരുമാനിച്ചെങ്കിലും കേന്ദ്രം ഏറ്റെടുക്കാൻ വിസമ്മതിച്ചു.
