പരാമർശം മതവിശ്വാസത്തെ വേദനിപ്പിക്കുന്നതിനല്ല, വിശ്വാസികൾ തനിക്കൊപ്പം: സ്പീക്കർ ഷംസീർ

ഭരണഘടനാ സ്ഥാപനത്തിന്റെ തലപ്പത്തിരിക്കുന്ന ആളെന്ന നിലയിൽ ശാസ്ത്രബോധം വളർത്തണമെന്ന് പറയുന്നത് എങ്ങനെയാണ് വിശ്വാസികളെ മുറിപ്പെടുത്തുന്നതെന്നും ഷംസീർ ചോദിച്ചു. നിയമസഭാമ്മേളനം സംബന്ധിച്ച് നടത്തിയ വാർത്താസമ്മേളനത്തിലാണ് ഷംസീർ വിവാദങ്ങളിൽ വിശദീകരണം നടത്തിയത്.

തന്റെ ഈ പരാമർശം ഒരു മത വിശ്വാസിയേയും വ്രണപ്പെടുത്താനല്ലെന്നും ഒരു മതവിശ്വാസത്തേയും വ്രണപ്പെടുത്തുന്നയാളല്ല താനെന്നും വാർത്താസമ്മേളനത്തിൽ സ്പീക്കർ പറഞ്ഞു. താൻ എല്ലാ മതവിശ്വാസങ്ങളേയും ബഹുമാനിക്കുന്ന ആളാണെന്നും അദ്ദേഹം പറയുന്നുണ്ട്.

മതവിശ്വാസത്തെ വ്രണപ്പെടുത്താൻ ഉദ്ദേശിച്ചിട്ടില്ല. ഭരണഘടനയിൽ ഒരു ഭാഗത്ത് മതവിശ്വാസത്തേക്കുറിച്ച് പറയുമ്പോൾ മറ്റൊരു ഭാഗത്ത് ശാസ്ത്രീയ വശം പ്രോത്സാഹിപ്പിക്കണമെന്നും പറയുന്നു. ഭരണഘടനപദവിയിൽ ഇരിക്കുന്ന ആളെന്നനിലയിൽ ശാസ്ത്രീയവശം പ്രോത്സാഹിപ്പിക്കണമെന്ന് പറയുമ്പോൾ എങ്ങനെയാണ് മതവിശ്വാസത്തെ വേദനിപ്പിക്കുന്നതാകുന്നതെന്നും വാർത്താസമ്മേളനത്തിൽ സ്പീക്കർ.

തന്നെ സ്പീക്കറായി ആരും കെട്ടിയിറക്കിയതല്ലെന്നും ഷംസീർ കൂട്ടിച്ചേർത്തു. വിദ്യാർത്ഥി പ്രസ്ഥാനത്തിലൂടെ രാഷ്ട്രീയത്തിലെത്തിയ വ്യക്തിയാണെന്നും തന്റെ മതേതര മൂല്യങ്ങളിലുള്ള വിശ്വാസത്തെ ചോദ്യം ചെയ്യാൻ ആർക്കും അവകാശമില്ലെന്നും അദ്ദേഹം കൂട്ടിച്ചേർത്തു.

കേരളത്തിലേത് പോലെയൊരു സംസ്ഥാനത്ത് ഇത്തരത്തിൽ ഒരു വിവാദം നിർഭാഗ്യകരമാണെന്നും ഷംസീർ പറഞ്ഞു. സംഘപരിവാർ പലതും പ്രചരിപ്പിക്കുന്നുണ്ട്. വെറുപ്പിന്റെ പ്രചാരണം രാജ്യത്ത് നടത്തുകയാണ്. കേരളത്തിലും അതിനുള്ള ശ്രമങ്ങൾ നടത്തുകയാണ്. അതിനുള്ള ശ്രമം കേരളം തള്ളിക്കളയുമെന്നും വാർത്താസമ്മേളനത്തിൽ സ്പീക്കർ പറഞ്ഞു.

Also Read : ‘ഷംസീറിൻ്റേത് വർഗീയ ശക്തികൾക്ക് ആയുധം നൽകുന്ന പ്രസ്താവന’; തിരുത്തുന്നതാണ് നല്ലതെന്ന് വി ഡി സതീശൻ

സുകുമാരൻ നായർക്കും അഭിപ്രായം ഉണ്ട്. അത് മാറ്റണമെന്ന് പറയാൻ എനിക്ക് സാധിക്കുന്നില്ല. വിദ്വേഷ പ്രചാരണങ്ങളിൽ ബന്ധപ്പെട്ടവർ വിട്ടുനിൽക്കണം. ഏതെങ്കിലും വൈകാരികതയിൽ അടിമപ്പെട്ട് പ്രതികരിക്കുന്നവരല്ല കേരളത്തിലെ ബഹുഭീരിപക്ഷം ആളുകളും വിശ്വാസികളുമെന്ന് ഷംസീർ പറഞ്ഞു.

‌Read Latest Kerala News and Malayalam News