Conjunctivitis: ചെങ്കണ്ണ് തടയാൻ 5 നിർദ്ദേശങ്ങളുമായി ആരോഗ്യ മന്ത്രാലയം

കണ്ണിനുള്ളിലെ ചുവപ്പ്‌നിറം, വേദന, വീർത്ത കൺപോളകൾ, കണ്ണ് ഇപ്പോഴും നിറഞ്ഞൊഴുകുന്നത്, പീള കെട്ടുന്നത്, വെളിച്ചമുള്ള ഭാഗത്ത് നോക്കാനുള്ള ബുദ്ധിമുട്ട് തുടങ്ങിയവയെല്ലാം ചെങ്കണ്ണിന്റെ ലക്ഷണങ്ങൾ ആണ്.

അല്പമൊന്ന് ശ്രദ്ധിച്ചാൽ ചെങ്കണ്ണ് പടരുന്നത് തടയാൻ സാധിക്കും. രോഗം ബാധിച്ച് ചികിത്സ തേടുന്നവരുടെ എണ്ണം കൂടുന്ന സാഹചര്യത്തിൽ ചെങ്കണ്ണ് പടരാതിരിക്കാൻ ശ്രദ്ധിക്കേണ്ട കാര്യങ്ങൾ പങ്കുവെച്ചിരിക്കുകയാണ് കേന്ദ്ര ആരോഗ്യ – കുടുംബക്ഷേമ മന്ത്രാലയം.

മുഖത്തോ കണ്ണുകളിലോ സ്പർശിക്കുന്നതിന് മുമ്പും ശേഷവും കൈകൾ വൃത്തിയായി കഴുകുക. കൈകൾ വൃത്തിയാക്കാതെ കണ്ണുകളിൽ സ്പർശിക്കുന്നത്‌ അണുബാധയ്ക്ക് വഴിയൊരുക്കും.

രോഗി ഉപയോഗിക്കുന്ന തൂവാല, തോർത്ത് തുടങ്ങിയവയൊന്നും വേറൊരാളുടെ പങ്കുവെയ്ക്കരുത്. കൂടാതെ തലയിണ, ബെഡ്ഷീറ്റ്, പുതപ്പ് എന്നിവയും മറ്റാളുകളുമായി പങ്കിടുന്നത് ഒഴിവാക്കുക. ഉപയോഗശേഷം ഇവ വൃത്തിയാക്കേണ്ടതും പ്രധാനമാണ്.

ചെങ്കണ്ണ് പെട്ടന്ന് പടരുന്നതിനാൽ ഇത് ബാധിച്ചാൽ പൊതു സ്ഥലങ്ങളിൽ പോകുന്നത് ഒഴിവാക്കുക. കണ്ണിന്റെ ചുവപ്പ് കുറയുന്നത് വരെയെങ്കിലും സ്കൂൾ, ജോലി സ്ഥലം എന്നിവിടങ്ങളിൽ പോകുന്നത് ഒഴിവാക്കുന്നതായിരിക്കും നല്ലത്.