സെല്‍ഫി എടുക്കണമെങ്കില്‍ 100 രൂപ നല്‍കണമെന്ന് ബിജെപി മന്ത്രി; പണം ആവശ്യപ്പെട്ടത് ഉഷ താക്കൂർ

ഭോപ്പാൽ: തനിക്കൊപ്പം നിന്ന് സെൽഫി എടുക്കുന്നവരിൽ നിന്നും പണം ഈടാക്കുമെന്ന് വ്യക്തമാക്കിയ മധ്യപ്രദേശ് മന്ത്രി ഉഷ താക്കൂർ വിവാദത്തിൽ. ഖാണ്ഡ്വയില്‍ ഞായറാഴ്ച നടന്ന പരിപാടിക്കിടെയാണ് സെൽഫിയെടുക്കാൻ താൽപ്പര്യമുള്ളവർ 100 രൂപ നൽകണമെന്ന് ടൂറിസം – സാംസ്കാരിക വികസന മന്ത്രികൂടിയായ ഉഷ പറഞ്ഞത്. ബിജെപി പ്രവർത്തകരോടും നേതാക്കളോടുമാണ് അവർ ഇക്കാര്യം പറഞ്ഞത്.



പെട്രോള്‍ മുതല്‍ പെഗാസസ് വരെ; പാര്‍ലമെന്‍റില്‍ മോദി നേരിടുന്ന ചോദ്യങ്ങള്‍

സെൽഫിയെടുക്കണമെന്ന ആവശ്യം വർധിക്കുകയാണെന്ന് മന്ത്രി പറഞ്ഞു. “സെൽഫിയെടുക്കാൻ നിന്ന് കൊടുക്കുന്നത് മൂലം ധാരാളം സമയം നഷ്ടമാകുന്നു. പലപ്പോഴും മണിക്കൂറുകളോളം സമയം ചെലവഴിക്കേണ്ടതായി വരുന്നുണ്ട്. മുൻകൂട്ടി നിശ്ചിയിച്ച പരിപാടികളിൾ വൈകുകയാണ്. ഇതോടെയാണ് സെൽഫിയെടുക്കാൻ ആഗ്രഹമുള്ളവരിൽ നിന്നും 100 രൂപ ഈടാക്കാൻ തീരുമാനിച്ചത്. ഈ രീതിയിൽ ലഭിക്കുന്ന പണം പ്രധാനമന്ത്രി നരേന്ദ്ര മോദിയുടെ പിഎം കെയർ ഫണ്ടിലേക്ക് നൽകും” – എന്നും മന്ത്രി പറഞ്ഞു.

സെൽഫിയെടുക്കാൻ ആഗ്രഹിക്കുന്നവർ അതത് മണ്ഡലത്തിന്റെ ചുമതലയുള്ള പാർട്ടി ട്രഷററുടെ കൈവശമാണ് 100 രൂപ നൽകേണ്ടത്. ഇത്തരത്തിൽ ലഭിക്കുന്ന തുക സംഘടനയ്ക്കും പ്രയോജനമുണ്ടാക്കും. ചടങ്ങുകളിൽ തന്നെ സ്വീകരിക്കുന്നതിനായി പൂച്ചെണ്ടുകളുടെ ആവശ്യമില്ല. പൂക്കൾക്കും പൂച്ചെണ്ടുകൾക്കും പകരമായി പുസ്തകങ്ങൾ നൽകിയാൽ മതിയാകും. അങ്ങനെയെങ്കിൽ അവ വായിക്കാനും പഠിക്കാനും കഴിയും. പൂക്കളില്‍ ലക്ഷ്മി ദേവി വസിക്കുന്നതിനാല്‍ ഭഗവാന്‍ വിഷ്ണുവിന് മാത്രമാണ് പൂക്കള്‍ നല്‍കാൻ പാടുള്ളൂ എന്നും മന്ത്രി പറഞ്ഞു.

ബുദ്ധിമുട്ടിക്കുന്ന ചോദ്യങ്ങൾ ചോദിച്ചോളൂ, പക്ഷെ ഉത്തരം പറയാൻ സമയം തരണം: പ്രധാനമന്ത്രി

പൂച്ചെണ്ടുകൾക്ക് പകരം പുസ്തകം നൽകണമെന്ന് പാർട്ടി പ്രവർത്തകരോടാണ് മന്ത്രി പറഞ്ഞത്. മാസ്ക് ധരിക്കാത്തതിലടക്കം മുൻപും വിവാദങ്ങളിൽ നിറഞ്ഞ നേതാവാണ് ഉഷ താക്കൂർ. പ്രാർഥനകളും പൂജകകളും നടത്തുന്നതിനാൽ തനിക്ക് കൊവിഡ് ബാധ ഉണ്ടാകില്ലെന്ന് ഇവർ പറഞ്ഞത് ഏറെ വിവാദമായിരുന്നു.